Pago Pago, AMERIKA SAMOA

O le ali’i lea o lo o faagasolo lana mataupu i luma o le Fa’amasinoga Faaitumalo i lona faia lea o sauaga i lona to’alua, ua toe taofia nei o ia i le Toese i Tafuna ona o tu’uaiga fou i lona faaoolima i lona to’alua, atoa ai ma lona taumafai e fai i ai ni uiga mataga.

O le a le mafai e le Samoa News ona faailoa suafa o i latou o loo aafia i lenei mataupu, ona o le puipuiga lava i le ono avea lea ma auala e silafia ai e le lautele le Tina sa faia faasaga i ai nei uiga mataga.

O moliaga faasaga i le alii ua molia e aofia ai le taumafai e faia uiga mataga atoa ai ma le taumafai e faiaiga faamalosi ma le na aafia, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala foi i faasalaga uma ia e lua; faapea ai ma moliaga mama e 2 e aofia ai le faatupu vevesi i nofoaga faitele ma le faaoolima i le tulaga tolu. 

E $25,000 le vaega tupe lea ua fa’atulaga e tatala ai i tua le ali’i ua molia.  O le aso Tofi o le vaiaso nei lea ua fa’atulaga e faia ai le ulua’i iloiloga o lenei mataupu.

TAGI A LE MALO

O lenei mataupu na tofu atu i le Ofisa o Leoleo i Tafuna, ina ua talosagaina e se tama’ita’i se fesoasoani a Leoleo, ona o le faalavelave sa tula’i mai i lona fale, ina ua alu atu le ua molia ma faaoolima i lona to’alua sa la tafafo.

O le alii ua molia, o loo i ai sana mataupu o loo faagasolo i luma o le Faamasinoga o Aiga, ona o le mataupu lea o loo tu’uaia ai o ia i lona faia o sauaga faasaga i lona to’alua. Ina ua tatala i tua le ua molia mai le ulua’i mataupu na tula’i mai i le masina o Me o le tausaga nei, na fautuaina ai o ia e le Fa’amasinoga e aua nei toe taumafai e faafesootai lona to’alua i soo se auala.

Ae o le aso 2 o Aokuso 2020 na tea nei, na alu ai le ua molia e fia talanoa i lona to’alua sa tafafo i le fale o lana uo tama’ita’i, ma i’u ina tula’i mai ai loa le mataupu e pei ona toe loka ai nei o ia i le Toese i Tafuna.

Na taunuu Leoleo ma amata ai loa ona fesiligia molimau sa i ai i le taimi o le faalavelave, e aofia ai ma le Tina na aafia i lenei mataupu. Na maitauina e Leoleo se ali’i o loo tu i tafatafa o le fale o loo sulu i se ie ufi moega lanu pa’epa’e, lea na iloa mulimuli ane, o le alii tonu lea o loo molia i lenei mataupu.

Ina ua faamaonia e Leoleo o le alii o loo tu i le pito i tua o le fale, o ia lea o loo masalomia, na faanatinati atu loa nisi o Leoleo ma loka ona lima ae ta’ita’i mai i totonu o le ta’avale a Leoleo mo lona saogalemu.

Na taua e le tama’ita’i e ana le fale lea na tula’i mai ai le faalavelave, o laua ma le Tina na aafia na faatasi atu i se faatasiga ma nisi o aiga ma uo, ina ua mae’a lea faatasiga, na la fo’i ai loa i lona fale ma le Tina na aafia ma le faamoemoe e faaauau ai le evaga ma la momoe ai. Na faateie o ia ina ua alu atu le ua molia e saili atu lona to’alua (Tina na aafia).

Na maua le avanoa e fesiligia ai e Leoleo le Tina na aafia mo sana faamatalaga e uigai lenei mataupu. Na taua e le Tina na aafia e faapea, ina ua mae’a le fiafia sa la faatasi atu i ai mal ana uo tama’ita’i, na la aga’i atu ai loa i le fale o lana uo tama’ita’i lea ma le faamoemoe la te momoe ai.

Na faateia o ia a o moe i le fale o lana uo ina ua fafagu e lana uo o ia ma musumusu atu, o lona to’alua (le ua molia) o loo i fafo o le fale, na alu atu e fia talanoa ia te ia. Na tula’i le Tina na aafia ma savali i fafo o le fale ma fai i le ua molia e sili pe a toe fo’i, e le tatau ona alu atu ia te ia la te talanoa, e mafua mai i le poloaiga a le Fa’amasinoga. Sa finau pea le ua molia i lona to’alua mo se avanoa la te talanoa ai peita’i na faailoa i ai e le na aafia e le tatau ona alu atu i le fale a lana uo.

Ina ua sauni le Tina na aafia e toe savali i totonu o le fale, o le taimi lea na tago atu ai loa le ua molia ua toso mai i tua le kola o lona ofu sa fai ma i’u ina pau mai ai o ia i tua ma taatia i luga o le mutia.

E pei ona taua e le malo i le latou tagi, o le taimi lea e le i toe faatali ai loa le ua molia ae ua tago atu nei ua uu le ua a lona to’alua ma taumafai e titina i lalo, ae o le isi ona lima o loo taumafai e taofi ai lona gutu mai lona ee i luga.

Na taumafai le Tina na aafia e minoi ina ia mafai ai ona sao ese mai le ua molia, peita’i sa matua malosi le tatao e le ua molia o lona toalua i lalo ma tuu atoa i ai lona mamafa ina ia le mafai ai e le na aafia ona toe minoi. Fai mai le malo i le latou tagi, ole taimi lea na faia ai loa e le ua molia uiga mataga i lona to’alua, e ala i lona tagofia o lona itutinosa ma taumafai e faiaiga faamalosi ma ia ao tete’e ma musu i ai lona to’alua ma taumafai e una’i ese le ua molia.

O le pine faamau e pei ona taua e le malo i le latou tagi, o le vaaia lea o le toto (tulou) i vaega o itutinosa o le Tina na aafia e mafua mai ina ua faaaoga e le ua molia lona tama’i lima e faia ai uiga mataga i lona to’alua. Sa ia taumafai fo’i e tatala ese lavalava o lona to’alua ae taumafai la te faiaiga faamalosi peita’i sa taumafai malosi le Tina na aafia e tete’e ese lona to’alua.

Na lagona mai e le uo a le Tina aafia le valaau atu o le na aafia mo se fesoasoani, ma mafai ai loa ona tamo’e atu ma toso ese le ua molia ae faatu mai i luga le Tina na aafia. Mulimuli ane na vili ai loa ma Leoleo mo se fesoasoani.

Ina ua fesiligia e Leoleo le ua molia, sa ia faamatala ai loa i Leoleo lana molimau e tusa ai o le faalavelave sa tula’i mai. 

Fai mai le alii na molia, o ia sa nofonofo i lona fale ae na te’i ina ua fesoota’i atu lona to’alua ma talosaga atu pe mafai ona alu atu e piki mai o ia o loo i le fale o lana uo. Na alu le ua molia e piki mai lona to’alua mai le fale o lana uo peita’i na faailoa i ai e le uo a lona toalua, ua leva ona toe fo’i lona to’alua i le fale.

Na toe fo’i le ua molia ma lona talitonuga ua toe fo’i lona to’alua i lo latou aiga, peita’i na te’i ina ua toe fesoota’i atu lona to’alua, o ia o loo i totonu o le potu o le fale a lana uo. Na taua e le ua molia lona to’alua i le fale o le uo a lona to’alua ma maua atu ai lona to’alua, ma la momoe ai loa i fafo o le potu malolo o le fale.

E pei ona taua e le ua molia i Leoleo, o lana tala sa musumusu i le taliga o lona to’alua, ma ia fesili i ai, poo ai le alii lea na la momoe muamua i le taimi ae lei oo atu ai o ia i le fale, na mafua ai ona ita lona to’alua ma ee i luga, ma faafoliga ai ua i ai se mea sese ua ia faia.

Na avea lea gaioiga a lona to’alua ma itu na ia tu ai loa i luga ma savali i fafo ma le fale ma tu tu ai, ina ua ia faalogo atu ua vili e le uo a lona to’alua le Ofisa o Leoleo.

Na taua atili e le ua molia e faapea, na musu e alu i le fale sa i ai lona to’alua ona o le poloaiga a le Faamasinoga, peita’i o lona to’alua lava na augani atu ia te ia e alu atu la te o mai i fale.