O le alii lea na pu’e faapagota e Leoleo ona o tu’uaiga i lona osofaia lea o se fale i Ottoville i le 2 masina talu ai, ua molia fo’i o ia e le malo i lona umia faasolitulafono o fualaau fa’asaina.

O le vaiaso na te’a nei na tula’i ai Akeripa Malele i luma o le Fa’amasinoga Faaitumalo.

E 2 tagi ua faila e le malo fa’asaga ia Malele. I le tagi muamua, o lo o tu’uaia ai o ia i moliaga e 2 o le talepe fale i le tulaga lua; faapea ai ma moliaga e 2 o le gaoi, o le vaega C lea o solitulafono mamafa, lea e faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala fo’i i faasalaga uma ia e lua.

I le tagi lona lua, ua molia ai o ia i le solitulafono o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e oo atu i le $20,000, poo le faasala foi i faasalaga uma ia e lua.

E $25,000 le tupe lea ua faatulaga e le afioga i le alii Faamasino ia Elvis P. Patea e totogi ona faatoa mafai lea ona tatala Malele i tua mai le Toese.

O le aso 17 o Mati lea ua fa’atulaga e faia ai le ulua’i iloiloga o lenei mataupu.

TAGI A LE MALO

O le taeao o le aso 11 o Ianuari na faafesootai ai e se Tina le Ofisa o Leoleo i Tafuna mo se fesoasoani, ona o lona fale i Ottoville na osofa’i e se tagata ae ave faagaoi le tele o meatotino sa i ai i totonu. E to’atele Leoleo na tali atu i le valaau ma amata ai loa le latou suesuega.

Na taua e le Tina e ana le fale i Leoleo e fa’apea, i le po o le aso 10 o Ianuari, sa ia faatonuina ai lana tama ma nisi o lana aufaigaluega e o e siaki le fale i Ottoville ma ia mautinoa e loka uma faitoto’a ma ki moli pe a latou tuua le lotoa. A o le i tuua e le aufaigaluega le lotoa, sa latou ki uma moli o le fale ma loka mau uma faitoto’a i luma ma tua.

O le taeao na sosoo ai, aso 11 o Ianuari, ina ua usupo le aufaigaluega e siaki le lotoa ma vaai le fale, na latou molimauina ai le faitoto’a pito i tua ua malepe, ma ua aveesea fo’i le tele o meatotino sa i totonu o le fale.

Na aga’i atu le Tina e ana le fale ma ia molimauina mea totino ua faaleagaina ma aveesea, ma ia pueina fo’i ata e faamaonia ai vaega o lona fale na faaleagaina i lenei osofaiga.

Na muamua fesiligia e Leoleo le aufaigaluega atoa ai ma le tama a le Tina e ana le fale, mo le tuuina atu o fa’amatalaga e tusa ai o lenei mataupu.

Ina ua mae’a, sa amata ai loa ona galulue Leoleo e saili ni molimau e mafai ona fesoasoani i le latou suesuega, aemaise ai o le tau sailia lea o i latou o lo o aafia i lenei mataupu.

A o naunau ai Leoleo i lo latou fia maua o se molimau na te tuuina atu sina faamatalaga e faatatau i lenei faalavelave, na faateia ai Leoleo ina ua telefoni atu se Tina ma ia faailoa atu se faamatalaga na mafai ona fesoasoani i le latou sueseuga.

Na taua e le Tina lea i Leoleo e fa’apea, i le po o le aso 10 o Ianuari i le te’a laititi o le itula e 12:00 i le po, sa ia vaaia ai ni alii se to’alua o savavali solo i totonu o le lotoa o le fale na aafia. Sa ia fesili i alii ia e to’alua i le mafua’aga o le la i ai i totonu o le lotoa, ae na tali i laua, o lo o tau saili le tagata na taumafai e talepe le latou fale, lea na sau i le atoa i totonu o le lotoa.

Na taua e le molimau i Leoleo, na te iloaina le igoa tau valaau o le isi alii o le to’alua lea, lea e valaau e tagata ia “Shooty”. O Shooty, o le isi igoa lea o Malele, le alii ua molia i lenei mataupu. Na taua atili e le molimau i Leoleo, o le ofu o Malele na faia i le po lea e aofia ai le ofuvae uumi lanu uliuli atoa ai ma le mitiafu lanu mumu.

Na maua le avanoa o Leoleo e talanoa ai i le molimau lona 2 e uiga i lenei mataupu, o se alii ave taxi e nofo latalata i le nofoaga na faatino ai le solitulafono. Na taua e le alii lea lona vaaia o le pikiapu lanu moana a le susuga a Malele o lo o paka i se vaega o le alatele e le mamao ma le nofoaga o lo o i ai le fale na aafia.

Na taua e le isi molimau e 39 tausaga le matua, o se alii e le i leva ona magalo mai i tua i le Toese i Tafuna, le alu atu o Malele ma faatau atu ia te ia se laptop fou lava i le tau e $60. Na faailoa atu e Malele i le molimau, na te mana’omia le tupe e totogi ai le pili a lona atalii i le falema’i. E na o le $40 na ave e le molimau ia Malele mo le laptop. O lea laptop na toe faafo’i e le molimau i Leoleo, ma mafai ai loa ona toe faafo’i atu i le Tina e ana le fale na osofaia.

Na faafesootai e Leoleo se tasi o alii e masani ona tafafao ma Malele, mo se avanoa na te faatulaga ai se la feiloaiga ma Malele i se nofoaga, ina ia maua ai le avanoa o Leoleo e pue faapagota ai o ia. Na malie i ai lea alii ma ia faatulaga loa le nofoaga la te eva ai ma Malele.

Na faateia Malele ina ua lolofi atu se vaega to’atele o Leoleo ma pu’e faapagota loa o ia ma auina atu i le Ofisa o Leoleo i Tafuna mo suesuega.

A o le i fesiligia e Leoleo ia Malele, na muamua saili lona tino pe maua i ai ni fualaau faasaina poo ni a’upega. Na su’e e Leoleo le tino o Malele ma maua i ai ni pepa iila laiti se 2 o lo o i ai vaega o le pauta faasaina o le aisa. Na faailoa e Malele i Leoleo, o pepa aisa e lua sa ia faatau mai i lana uo i le $40.

Na ioe Malele i Leoleo, o laua ma lana uo na osofaia le fale i Ottoville ae ave faagaoi le tele o meatotino sa i ai, e ala i lo la talepe o le faitoto’a pito i tua ae la’u meatotino i tua o lana ta’avale pikiapu, lea sa paka i se nofoaga e le mamao mai le fale na osofaia.

Na ta’utino Malele, e $40 na ia faatau ai le laptop i se tasi o alii e masani ai, ae o isi meatotino na gaoia e pei o mea faigaluega e alu i le uila, o seevae, lavalava ma isi mea aoga e alu i le uila, na faatau solo i isi tagata e masani ai.

Na taua e le malo, o lo o galulue pea mo le tau sailia o le alii na toalua ma Malele i le faatinoina o lenei solitulafono.