E 46 tausaga o se ali’i na pu’e fa’apagota e Leoleo i le vaiaso na te’a nei, ona o tu’uaiga i lona faia lea o uiga mataga i se tama’ita’i e 16 tausaga le matua latou te tuaoi.

O le vaiaso na te’a nei na tula’i ai le susuga a Alefosio Solomona i luma o le Fa’amasinoga  Fa’aitumalo.

E 2 moliaga mamafa o le tagofia o itutinosa o se tama’ita’i i le tulaga muamua o lo o molia ai Solomona, lea e mafai ona fa’asala ai se tasi i le toese mo le umi e le silia i le 5 tausaga, pe faasala foi i le salatupe e le silia i le $5,000, pe fa’asala fo’i i fa’asalaga uma ia e lua; atoa ai ma le moliaga o le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, poo le fa’asala fo’i i le salatupe e lesilia i le $1,000, pe faasala fo’i i fa’asalaga uma ia e lua.

E $15,000 le vaega tupe lea ua fa’atulaga e le Fa’amasinoga e totogi ona fa’atoa mafai lea ona tatala le ua molia i tua mai le Toese i Tafuna.

Talu ai le vava lalata o le fale e nofo ai le ua molia ma le fale o le aiga o le tama’ita’i o lo o a’afia, ua poloaina malosi ai e le Fa’amasinoga le susuga a Solomona ina ia saili se isi nofoaga e aumau ai mo le taimi nei a o fa’agasolo ai lana fa’amasinoga.

Na teena e le Fa’amasinoga le talosaga a le itu tete’e ina ia faaitiitia i le $5,000 le tupe e tatala ai i tua Solomona.

O le aso Faraile o le vaiaso nei ua fa’atulaga e toe tula’i ai Solomona i luma o le Fa’amasinoga mo le faataunuuina o lana ulua’i iloiloga.

TAGI A LE MALO

E pei ona taua e le malo i le latou tagi ua faauluina fa’asaga ia Solomona e fa’apea, o Setema 08, 2019, na talosagaina ai e le aunty a le tama’ita’i na a’afia se fesoasoani a Leoleo, ona o se mataupu ua masalomia ai le faia e Solomona o uiga mataga i lona tei e ala i lona tagofia o ona itutinosa.

Sa maua fo’i le avanoa e fesiligia ai e Leoleo le tama’ita’i na a’afia e tusa ai o le faalavelave sa tula’i mai.

E tusa ai o fa’amatalaga na mafai ona tuuina atu i Leoleo, o le susuga a Solomona ma le aiga o le tama’ita’i ua a’afia, e nonofo i latou i le fanua e tasi, ae eseese fale e nonofo ai. O le tele lava o taimi e mafuta faatasi ai aiga nei e lua, ma ua pei ai lava aiga nei e lua o se aiga e tasi i le tele o taimi.

O se ulugali’i e nonofo i le fale o lo o i tua atu o le fale a Solomona sa laua faailoa i Leoleo i le po lea, e le o i ai  Solomona i lona fale, ae faatoa tula’i ese atu lava ina ua ia vaaia le aga’i atu o le ta’avale a Leoleo.

Na maua le avanoa e fesiligia ai e Leoleo le tama’ita’i na a’afia e tusa ai o lenei mataupu. Sa ia taua i Leoleo e fa’apea, i le afiafi o le Aso Sa, Sept. 8, na tuli ai o ia e le isi fafine o le latou tuaoi e igoa ia Kalala, e alu i le fale o Solomona pe mafai ona aumai sana sikaleti ona ua uma lana sikaleti.

Na alu le tama’ita’i na a’afia i le fale o Solomona ma ia tu’itu’i le faitoto’a, ma savali ane ai loa Solomona ua tatala le faitoto’a ae faaulufale o ia i totonu.

Na taua e le tama’ita’i na a’afia i Leoleo e fa’apea, ina ua tatala mai e Solomona le faitoto’a o le fale, sa ia faailoa i ai le mafua’aga o lona alu atu, o se sikaleti lea mo Kalala o lo o faatali mai i luma o le latou fale.

Na faaulufale e  Solomona le tama’ita’i na a’afia ma faatonu o ia e nofo i luga o le nofoa i totonu o le potu ma matamata i le TV, ae se’i alu i le faleoloa e fa’atau mai se sikaleti e avea ai se sikaleti ma Kalala.

E lei umi ona alu ese atu Solomona ma le fale ae toe ulufale atu loa i totonu o le fale ma lana fa’atau, o pepa sikaleti e 2, o apainu e 2 faapea ai ma le pepa chips lapo’a. Na ona savali atu lava o Solomona saofa’i loa i luga o le nofoa lea o lo o saofa’i ai le tama’ita’i na a’afia, ma faapipi’i atu lona tino i le tino o le tama’ita’i na a’afia.

Na taua e le tama’ita’i na a’afia i Leoleo lona popole atoa ai ma le le mautonu o lona mafaufau i le taimi lea, ina ua ia faalogoina le ese o uiga ia ua faaali atu e Solomona ia te ia.

Na sosoo ai loa ma le tago atu o Solomona ua tuu atu le pepa sikaleti fou ia te ia ma lana faaupuga, o le pepa sikaleti lea mo Kalala. Sa ia tuuina atu fo’i apainu e 2 ma le pepa chips lapo’a ia te ia ma lana faaupuga, “o lau mea’ai lea na ou tago fa’atau mai i le faleoloa.”

Na taua e le tama’ita’i na a’afia le faateia o ia ina ua tago atu lima o Solomona i lona fatafatafa, ma faasolo ifo ai lava i ona ogavae. Sa ia tago ma una’i ese ona lima peita’i sa atili ai ona tago atu pea le ua molia ia te ia, seia oo lava i lona tagofia o ona itutinosa.

Ao faia e le ua molia nei uiga, na taua e le tama’ita’i na a’afia lona faalogoina o le malosi o le manogi pia e sau mai le tino o Solomona. Sa ia iloa foi i totonu o le lapisi o loo i tua o le umukuka atigi fagu vailima lapopo’a e 2 o lo o taatitia ai ua uma ona inu.

Na tula’i faamalosi le tama’ita’i na a’afia o le a alu i fafo peita’i na tula’i fo’i Solomona ma savali i le faitoto’a ma pupuni le auala, ina ia le mafai ai ona alu i fafo le tama’ita’i na a’afia.

Mulimuli ane, sa mafai ai loa ona ulufafo le tama’ita’i na aafia mai le fale a Solomona ma aga’i atu loa i le nofoaga o lo o i ai Kalala, ma ia faamatala i ai le mafua’aga na ala ai ona tuai atu, ona o uiga mataga na faia e Solomona ia te ia, ma faafesoota’i ai loa e Kalala le Ofisa o Leoleo e uiga i lenei mataupu.

Ina ua fesiligia e Leoleo ia Solomona, sa ia ioeina ai le alu atu o le tama’ita’i na a’afia i totonu o lona fale e aisi sikaleti mo Kalala, peita’i sa ia teena lona faia o ni uiga mataga fa’asaga ia te ia.

Na ioeina fo’i e le ua molia lona tagofia o le ‘ava malosi e ala i ana fagu vailima lapopo’a e 2.