Ads by Google Ads by Google

Molia se ali’i i lona faia o uiga mataga i se tamaitai e 16 tausaga


[ata: foa'i]
ausage@samoanews.com

Pago Pago, AMERIKA SAMOA

 

O le ali’i e 42 tausaga le matua lea na tu’uaia i lona faia o uiga mataga i se tamaitai e aiga i ai e 16 tausaga le matua, ua molia nei o ia i lona faia o uiga mataga i se tamaitai e laititi i lalo o le tulafono, i le mae’a ai lea ona pu’e faapagota o ia e Leoleo i le masina na te’a nei. Ina ua pu’e faapagota e Leoleo le ua molia, na maua ai vaega o fualaau faasaina o le aisa ma le mariuana i lona tino.

 

Talu ai puipuiga i lalo o le tulafono i le ono afai lea ona iloa le tamaitai sa aafia i lenei mataupu, o le a le mafai ai e le Samoa News ona faailoa le suafa o le ali’i ua molia i lenei mataupu.

 

TAGI A LE MALO

 

O le masina o Novema 2020 na aga’i atu ai se Tama e 52 tausaga le matua i le Ofisa o Leoleo i Tafuna, ma faila sana tagi faasaga i le to’alua a lona afafine matua, i lona faia lea o uiga mataga i lona afafne e 16 tausaga le matua. Na taua e le Tama na ia faila le talosaga i Leoleo Suesue e faapea, o ia o le Tama fai o le tamaitai o loo aafia i lenei mataupu, sa ia tausia mai lava le tamaitai na aafia ina ua fatoa 8 masina lona matua.

 

A o faagasolo ai suesuega a Leoleo e uiga i lenei mataupu, ma manino ai i mau sa mafai ona tu’u faatasia e Leoleo, e i ai le isi tamaitai na tau aafia fo’i i gaioiga a le ua molia, o le isi lea afafine o le Tama na ia faila le talosaga, peita’i ua malaga atu nei o ia e nofo i lona Tina i Niu Sila. Na taumafai le ua molia e faia uiga mataga i le tamaitai ua malaga i Niu Sila i le taimi a o 15 ai tausaga o lona matua.

 

Na fesiligia e Leoleo Suesue le tamaitai na aafia i lenei mataupu, o lona Tina, faapea ai se tasi o ana uo tamaitai na taua e molimau na i ai i le taimi na tula’i mai ai se tasi o faalavelave i le masina o Mati o le tausaga na te’a nei.

 

Ina ua fesiligia e Leoleo Suesue le tamaitai na aafia, sa ia taua ai e faapea, e nonofo faatasi uma le latou aiga e aofia ai o ia ma le ua molia i le fale e tasi. O le ua molia o le to’alua a lona uso matua e 30 ona tausaga. Sa ia taua nisi o faalavelave na tutupu i le va o ia ma le ua molia, ina ua faaali atu e le ua molia lona itutinosa ia te ia, tagofia e le ua molia o lona fatafata ma ona vae ao moe, atoa ai ma isi gaioiga mataga na faia e le ua molia ia te ia i le masina o Mati ma le masina o Me o le tausaga e 2020.

 

Na taua e le tamaitai na aafia e faapea, o le isi faalavelave na tula’i mai i le taimi ao latou momoe ai ma ana uo tamaitai e to’alua i totonu o lona potu moe, ao faia le inugapia a le ua molia ma lona uncle i fafo o le fale.

 

Na faateia o ia i se taimi o le po ina ua ia faalogoina se tagata o tago atu i lona fatafata ma ona itutinosa. Na ala i luga le tamaitai na aafia ma ia vaaia ai le ua molia o loo tu i fatafata o lona moe e leai ma ni ofu o faia, ma tauanau o ia la te o i fafo la te talanoa ai. Sa ia ee atu i le ua molia e alu ese ma le potu. Na usita’i le ua molia ma savali i fafo ma le potu, ae tago ma faapau i luga o le fola o le fale le $20 ma lana faaupuga, “o le tupe lea ma oe.”

 

Ina ua savali ese atu le ua molia ma totonu o le potu, na taua e le tamaitai na aafia i Leoleo lona faalogoina o le manogi pia i totonu o le fale.

 

Na fesili Leoleo i le tamaitai na aafia pe sa i ai se tala a le ua molia na fai atu ia te ia i le taimi na ia vaaia ai o loo tu i tafatafa o lona moega e aunoa ma ni lavalava, na tali le tamaitai na aafia, na faapea atu le ua molia ia te ia, “ou te fia mafuta ia te oe i le po lenei.”

 

O le isi faalavelave na tula’i mai i le masina o Me o le tausaga lava lea e pei ona taua e le tamaitai na aafia i Leoleo, ina ua faateia o ia i le tago atu o se tagata i lona fatafata atoa ai ma lona tatala ese o lona mitiafu sa ofu e aunoa ma sona iloaina. Na ala i luga le tamaitai na aafia ma ia vaaia le ua molia o loo saofa’i i ona tafatafa, ona ia fesili lea i ai poo a ana mea o loo fai i totonu o le potu, ae na tali le ua molia, na alu atu e su’e lona afafine poo fea o loo moe ai.

 

Na ee i luga le tamaitai na aafia ma valaau i lona uso matua (to’alua o le ua molia) ma faailoa i ai gaioiga a le ua molia. O le taimi lea na tula’i ai i luga le ua molia ma savali i fafo ma le potu ma aga’i atu loa i fafo o le fale. Na taua e le ua molia i Leoleo e faapea, e tupu le faalavelave i le po lona lua lea ae o le taimi lea o loo la momoe ai ma lona tuagane e 7 tausaga le matua i totonu o le potu.

 

Na fesiligia e Leoleo le uo tamaitai a le tamaitai na aafia e tusa ai o sana faamatalaga i le faalavelave lea na tula’i mai i le masina o Mati. Na taua e le molimau e faapea, ao latou momoe i totonu o le potu, na ia lagonaina le taimi na valaau atu ai le ua molia i le igoa o le tamaitai na aafia, pe mafai ona alu atu i fafo la te talanoa ai. Sa ia tago ma fafagu le tamaitai na aafia ma fai i ai, e aua ne’i alu i fafo ma le potu.

 

A o latou momoe, na faateia o ia ina ua ia faalogoina se tagata ua pao atu i totonu o le potu, na ia ala i luga ma ia vaaia ai le ua molia ua savali atu i totonu o le potu e leai ni ona lavalava. O lona fefe tele na ia ponou ai loa i lalo ma pulou le ie afu, e lei umi ae ona faalogoina le tamaitai na aafia ua ala i luga ma ee i le alii ua molia e alu ese ma le potu. Na taua atili e le molimau lona faalogoina o le alii ua molia ua fai i le tamaitai na aafia, “ou te fia mafuta ia te oe i le po lenei.”

 

Na taua atili e le molimau i Leoleo Suesue, e le o se taimi muamua lenei ua talanoa atu ai lana uo (tamaitai na aafia) ia te ia e tusa ai o uiga mataga e faia e le to’alua o lona uso matua (le ua molia) ia te ia, ae na te lei manatu lava e moni, peita’i o le po lea na latou momoe ai i le fale o le tamaitai na aafia, na faatoa faamaonia ai loa i lona mafaufau faamatalga a lana uo e masani ona fai atu ia te ia.

 

Ina ua fesiligia e Leoleo Suesue le faletua o le ali’i ua molia e faatatau i lenei mataupu, sa ia taua ai lona manatuaina o le taimi na talanoa atu ai lona uso laititi ia te ia e faatatau i uiga mataga sa faia e lona to’alua (le ua molia) ia te ia. Sa ia talanoa i lona to’alua e faatatau i tu’uaiga faasaga ia te ia, peita’i sa ia teena malosi. Na talanoa le fafine i lona to’alua, afai ae toe faailoa atu e lona uso ni isi tu’uaiga faasaga ia te ia, o le a ia talanoa loa i ona matua e faatatau ia te ia.

 

Na faafuase’i ona tuua e le ua molia lona to’alua ma le latou aiga ae sola i le fale o lona tuafafine ma lona to’alua i Petesa, ina ua ia iloa ua tofu atu i le Ofisa o Leoleo le mataupu faasaga ia te ia. E 2 vaiaso o taumafai Leoleo e saili le ua molia peita’i e le i maua lava. Se tasi o aso, na faafuase’i ai loa ona maua e Leoleo le ua molia ma auina atu loa i le Ofisa o Leoleo i Tafuna mo suesuega. 

 

Ao le i auina atu o ia mo suesuega, na saili e Leoleo lona tino mo ni a’upega. Ina ua saili e Leoleo le ofu a le ua molia, sa maua ai i le taga o lona ofu vae se paipa tioata o loo i ai vaega o le pauta pa’epa’e. Sa toe saili le isi tagata o lona ofu ma maua i ai se pepa iila o lo o i ai vaega o lau mamago o le laau faasaina o le mariuana. 

 

Ina ua fesiligia o ia e tusa ai o tu’uaiga faasaga ia te ia, na teena ai e le ua molia lona taumafai e faia ni uiga mataga i le uso laititi a lona to’alua. Sa ia ioeina lona alu i le potu sa moe ai le tamaitai na aafia e su’e poo moe ai lona afafine, peita’i na ita le uso laititi a lona to’alua ma tuli o ia i fafo. 

 

Ina ua fesiligia o ia i fualaau faasaina sa maua i lona tino, na sisi’o le ua molia, o fualaau faasaina o le to’alua a lona tuafafine sa ia maua i totonu o le la ta’avale i le taimi na ia fa’aaogaina ai le ta’avale. 

 

E 5 moliaga ua tu’uaia ai e le malo le ua molia. O ia moliaga e aofia ai le moliaga e tasi o lona umia faasolitulafono o vaega o le pauta faasaina o le aisa, tasi le moliaga o lona umia faasolitulafono o vaega o le laau faasaina o le mariuana, 2 moliaga o lona tagofia o itutinosa o se tamaitai talavou, faapea ai ma le moliaga e tasi o lona taumafai e faamalosi se tamaitai, o vaega uma ia o solitulafono mamafa.

 

E $20,000 le vaega tupe lea ua fa’atulaga e tatala ai le ua molia i tua ao faagasolo ai taualumaga o lana mataupu.