O le vaiaso na te’a nei na pu’e fa’apagota ai e Leoleo se ali’i ave taxi e 41 tausaga le matua mai Samoa, ona o tu’uaiga i lona faia lea o uiga mataga i se tama’ita’i e 16 tausaga le matua e aiga i ai. E pei ona taua e le malo i le latou tagi, e uso le Tama o le ali’i ua molia ma le Tama o le ali’i e fanauina le tama’ita’i o lo o a’afia i lenei mataupu..

Talu ai puipuiga i le ono mafai lea ona silafia e le lautele o le atunu’u le tama’ita’i na a’afia, o le a le mafai ai e le Samoa News ona fa’ailoa le suafa o le ua molia i lenei mataupu.

O le vaiaso na te’a nei na tula’i ai le ua molia i luma o le Fa’amasinoga Fa’aitumalo mo lana ulua’i iloiloga.

O le ua molia, o se Tama e to’afa lana fanau o loo tu’uaia i moliaga mamafa e 5 e aofia ai moliaga e 2 o le tagofia o itutinosa o se tama’ita’i e laititi i lalo o le tulafono; 2 moliaga o le faiaiga ma se tama’ita’i e laititi i lalo o le tulafono; faapea ai ma le moliaga e 1 o le faia o uiga mataga fa’asotoma. O loo tu’uaia fo’i o ia i le moliaga mama e tasi o lona faia lea o ni gaioiga e lepeti ai le saogalemu o fanau laiti.

E $40,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atalitali ai taualumaga o lana fa’amasinoga.

Afai ae mafai ona tatala o ia i tua, ua fautuaina o ia ina ia aua ne’i ona toe taumafai e faafesoota’i le teineititi o lo o a’afia i lenei mataupu i soo se auala, pe taumafai fo’i e fa’afesoota’i nisi o lona aiga.

O le aso Faraile o le vaiaso fou lea ua fa’atulaga e faia ai le ulua’i iloiloga o lenei mataupu.

TAGI A LE MALO

O lenei mataupu na tofu atu i le Ofisa o Leoleo i Tafuna, ina ua faila e matua o le tama’ita’i na a’afia se tagi fa’asaga i le ali’i ua molia. O le mae’a ai ona fa’agasolo o suesuega a Leoleo e uiga i lenei mataupu, na latou talosagaina ai loa se poloaiga mai le fa’amasinoga e pu’e fa’apagota ai lenei ali’i.

Na taua e le malo i le latou tagi e fa’apea, o le ua molia, e galue o ia o se ave taxi, ma o lana galuega i le tele o aso. O le tele o taeao, e valaau ai e le aiga o le teineititi na aafia le taxi a le ua molia, ona alu atu lea e piki mai le ua a’afia ma nai ona tei laiti  ma momoli i le aoga. E i ai fo’i aso e toe piki ai e le ua molia le teineititi na a’afia ma nai ona tei ma toe momoli i le fale pe a tuua le aoga, aemaise lava pe afai e leaga le tau ma timuga.

I le fa’aiuga o le masina o Oketopa 2019, na tula’i mai ai se fa’alavelave i Kokoland, ina ua aga’i atu le Tama o le tama’ita’i na a’afia e fa’atino sa latou galuega kamuta ma ni isi o le latou aufaigaluega, ae tau atu ai le Tama i le taxi a le ua molia o loo paka i se vaega e latalata i le nofoaga o loo latou nonofo ai.

E nonofo fa’atasi le aiga o le teineititi ma le aiga o le ua molia i le fanua e tasi i se vaesga o Tafuna.

Na avea le masalosalo o le Tama o le tama’ita’i i le fa’afuase’i lea ona paka le taxi a le ua molia i le vaega lea o le alatele e latalata i le latou fale ae le masani ai, na mafua ai loa ona ia talosaga i le ave ta’avale o le pikiapu o loo malaga ai, e taofi le ta’avale ae se’i alu e siaki le taxi poo ai o loo alu atu ai.

E le i iloa mai e le ua molia le aga’i atu o le Tama o le tama’ita’i i lana ta’avale, na te lei manatu fo’i o le a aga’i atu le Tama o le teineititi i lana ta’avale i lea taimi o le aso. E latalata atu loa le Tama o le tama’ita’i i le vaega o loo paka ai le taxi, ae ona vaaia loa le matala o le faitotoa i le itu o le pasese, ma ia vaaia ai lona afafine ua oso mai i fafo ma le ta’avale.

Na sola ese le ta’avale a le ua molia i le taimi lea ina ua ia faalogo i le leo o le Tama o le teineititi. Ae ina ua fesiligia e le Tama lona afafine, sa ia fa’amatala uma i ai tulaga e pei ona tula’i mai, ma mafua ai loa ona tofu atu lenei mataupu i Leoleo.

Na taua e le tama’ita’i i Leoleo e fa’apea, o le masina o Aperila 2019 na fai atu ai le ua molia ia te ia, mo se avanoa e alu atu ai e piki o ia pe a tuua le aoga, ona o loo fia talanoa ia te ia. O iina na amata mai ai le la masaniga faaleuo, seia oo lava ina le fa’atinoina tulaga faaleulugali’i.

Na taua e le tama’ita’i i Leoleo le tu’u atu e le ua molia o tupe ia te ia e fa’atau ai mea e mana’o ai, o le tele fo’i o taimi na te fa’atauina ai ona lavalava ma seevae mo le aoga e aunoa ma le iloa e ona matua.

Na taua fo’i e le tama’ita’i na a’afia ina ua fesiligia e Leoleo o ia, le i ai o taimi e tagofia ai e le ua molia ona itutinosa, aemaise lava taimi la te ti’eti’e ai i totonu o lana ta’avale la’u pasese.

Na teena e le ua molia tu’uaiga fa’asaga ia te ia ina ua fesiligia o ia e Leoleo i le taimi muamua, ae ina ua fa’aauau pea le fa’atalatalanoaga, na ia ioeina ai loa lona tuuina atu o tupe i le teineititi e fa’atau ai mea e mana’o ai e pei o lavalava, seevae ma maea, ona e lima vaivai lona aiga. Na taua fo’i e le ua molia lona fa’atau o se telefoni ma tuu i le tama’ita’i, ina ia fa’a faigofie ai ona la fesoota’i.

Na ioe le ua molia i le la mafutaga faaleuo ma le tama’ita’i, peita’i sa ia teena lona faia i ai o uiga mataga faafeusuaiga. E le i mana’o le ua molia e tuuina atu sana fa’amatalaga tusitusia i Leoleo, ona sa manatu o ia, ua lava lana faamatalaga tuu gutu e fa’ailoa atu ai i Leoleo le mea atoa sa tupu.

MATAUPU TUAI

E tusa ai ma fa’amaumauga a le Fa’amasinoga, o le tausaga e 2009 na faamaonia ai e le Fa’amasinoga Maualuga le moliaga o le umia faasolitulafono o fualaau faasaina faapea ai ma le talia o oloa na ave faagaoi sa tu’uaia ai e le malo lenei ali’i.

E ui i se finagalo o le Fa’amasinoga i lea taimi e faasala lenei ali’i i le Toese mo le umi e 10 tausaga, peita’i na manatu e fa’amalumalu lona tuliina o lea fa’asalaga, ae faanofovaavaaia o ia mo le 5 tausaga i lalo o tuutuuga e ao ona ia usita’i i ai.

O nisi o ia tuutuuga e aofia ai lona tuliina o masina e 20 i le Toese i Tafuna, totogi le salatupe e $2,000, atoa ai ma le tupe e $1,051 mo le tau o oloa sa ia ave fa’agaoi.

E pei ona taua e le malo i le latou tagi, e to’atolu ni ali’i na latou osofaia se faleoloa Asia i Ottoville ae ave faagaoi le tele o oloa ma fa’atau atu i isi tagata. O i latou nei e to’atolu e aofia ai le ali’i ua molia nei i lenei mataupu.