Ads by Google Ads by Google

Molia se ali’i Leoleo taumafai ave faanana fualaau faasaina totonu Toese

ausage@samoanews.com

Ua molia nei e le malo se ali’i Leoleo o le Toese i Tafuna i lona taumafai lea e faaulufale faasolitulafono fualaau faasaina ma ni telefoni i totonu o le Toese i se auala e le tusa ma le tulafono.

 

O le vaiaso na te’a nei na pu’e faapagota ai e Leoleo Suesue le susuga a Ofisa Enoka Leifi Jr, ma tula’i ai loa o ia i luma o le Fa’amasinoga.

 

O moliaga ua tu’uaia ai Leifi Jr e aofia ai le moliaga e tasi o le umia faasolitulafono o fualaau faasaina o le aisa ma le faamoemoe e tulei ma faatau atu i isi tagata; tasi le moliaga o le umia faasolitulafono o vaega o le pauta o le aisa; faapea ai ma le moliaga e tasi o lona taumafai lea e ufiufi se solitulafono.

 

E $30,000 le tupe lea ua fa’atulaga e le afioga i le ali’i Fa’amasino ia Elvis P. Patea e totogi ona fa’atoa mafai lea ona tatala Leifi Jr i tua mai le Toese, e fa’atali ai taualumaga o lana mataupu lea ua amata ona fa’agasolo i luma o le Fa’amasinoga i le taimi nei.

 

O le aso Tofi o le vaiaso lea ua fa’atulaga e faia ai le ulua’i iloiloga o lenei mataupu i luma o le afioga i le ali’i Fa’amasino ia Patea.

 

TAGI A LE MALO

 

O lenei mataupu na tofu atu i le Vaega Suesue a Leoleo, ina ua talosagaina e le Sui Komesina se suesuega faapitoa faasaga i ni fualaau faasaina na taumafai se ali’i Leoleo o le Toese e ave faanana i totonu o le nofoaga o loo taofia ai pagota.

 

Na maua i suesuega a Leoleo Suesue e fa’apea, o le taeao o le aso 3 o Mati mai le itula e 6:00 e oo atu i le itula e 6:00 i le afiafi, o le taimi lea sa tiute ai le susuga a Leifi Jr i le nofoaga o le Alpha Building mo le vaavaaia lea o pagota.

 

A o tiute ai Leifi Jr i le taeao lea, sa talosaga atu le ali’i pagota o Pati Lepou mo se avanoa e alu ai i luma o le Ofisa e ave le tupe i lana uo tiene o lo o fa’atali mai ai. Na teena e Leifi Jr le talosaga a le alii pagota ia Lepou, peita’i mulimuli ane, na malie Leifi Jr e alu e momoli le tupe a Lepou i lana uo tama’ita’i o lo o fa’atali mai i luma o le pa.

 

Na taua e le malo i le latou tagi e fa’apea, na aga’i atu lava Leifi Jr faasasa’o i le faitoto’a tele o le lotoa ma aga’i atu ai lava i fafo, ma ia vaaia ai le tama’ita’i e suafa ia Josephine Siaumau o lo o faatali mai i totonu o lana ta’avale, ma ia tuu ai loa le tupe i le tama’ita’i lea.

 

I le taimi na ulufafo ai Leifi Jr ma le faitoto’a o le lotoa, sa iloa atu o ia e se ali’i Leoleo Lutena o loo tiute i totonu o le Ofisa, peita’i na avea le maualuga o le pa sima o lo o si’omia ai le lotoa ma auala na faigata ai i le ali’i Leoleo Lutena ona ia toe iloa atu le vaega tonu na aga’i i ai Leifi Jr.

 

I se taimi o le aoauli o le aso lea, na toe aga’i mai ai Leifi Jr i luma o le Ofisa ma talosaga i le Leoleo Satini, e siaki pe ua taunuu le ticket a le ali’i pagota o Lafaele Tauiliili lea ua faamoemoe na te tuua le teritori ae toe fo’i atu i Samoa i le taimi lava e uma ai ona totogi e lona aiga lona pasese.

 

A o talanoa Leifi Jr ma le Leoleo Satini, na iloa atu e Leifi Jr le tama’ita’i o Siaumau lea na ia tuua i ai le tupe na aumai i le alii pagota o Lepou, o loo tu mai i luma o le faitoto’a ole lotoa. E lei toe faatali Leifi Jr ae ua savali atu loa i le vaega o loo tumai ai le tamaitai lea, ma tuu atu ai loa e le tama’ita’i lea se nusipepa o loo afiafi ai se pepa sikaleti faapea ai ma ni telefoni se 2. O nei gaioiga uma sa mafai ona iloa atu e le ali’i Leoleo Lutena.

 

Na ona uma lava ona tuu atu e le tama’ita’i lea o le nusipepa ia Leifi Jr, faliu loa ma Leifi Jr ma sauni e savali aga’i atu i le Alpha Building, peita’i na taofi e le ali’i Leoleo Lutena ma fesili i ai, poo le a le mea lea na tuu atu e le tama’ita’i ia te ia. Na tali Leifi Jr, o le nusipepa.

 

Na avea le masalosalo o le ali’i Leoleo Lutena na mafua ai loa ona faatonu Leifi Jr e avatu le nusipepa se’i siaki, ma aumai fo’i taga o lona ofu se’i siaki poo i ai ni mea e ono masalomia le ave faanana i totonu o le nofoaga.

 

Na tatala le nusipepa ma maua ai se pepa sikaleti o le Kool ma se telefoni. Na saili e Leoleo le tino ma le ofu o Leifi Jr ma maua ai se pepa sikaleti o le Benson faapea ai ma ni telefoni feavea’i se 2.

 

I totonu o le pepa sikaleti o le Benson na maua ai e Leoleo se pepa iila o lo o i ai vaega o le pauta faasaina o le aisa.

 

Na pepelo Leifi Jr i Leoleo i le ulua’i taimi na fesiligia ai o ia e faatatau i lenei mataupu, peita’i ina ua faagasolo pea suesuega, na malie ai loa le ua molia e ta’utino i Leoleo le mea atoa sa tupu.

 

I lana faamatalaga i Leoleo Suesue, na ta’utino ai Leifi Jr, e faamaonia tu’uaiga i lona taumafai lea e faaulufale faasolitulafono fualaau faasaina ma telefoni i totonu o le toese. Sa ia ta’utino e fa’apea, sa talosaga atu le alii pagota o Lepou ia te ia, e alu e ave le tupe i lana uo tamaita’i o loo faatali mai i luma o le lotoa.

 

Sa ia iloaina lelei lava, o le tupe na aumai ia Lepou e ave ia Siaumau e faatau ai fualaau fa’asaina. Sa ia ioe atili fo’i i Leoleo Suesue, lona toe alu i le aoauli e piki mai fualaau faasaina na aumai ia Siaumau ma le faamoemoe e momoli i le alii pagota o Lepou.

 

Sa ia taumafai malosi fo’i ina ia aua ne’i iloa atu e Leoleo o loo tiute i totonu o le Ofisa ana gaioiga uma sa faatinoina, ona o lona naunau lava ina ia taunuu i totonu o le Toese fualaau fa’asaina.

 

I le 3 vaiaso talu ai ae le i tula’i mai lenei fa’alavelave, na taua ai e Leifi Jr i Leoleo Suesue, lona fesoasoani fo’i ia Lepou i le aumaia faasolitulafono o fualaau faasaina i totonu o le Toese.

 

Na taua e Leifi Jr e fa’apea, na tuu atu e Lepou le tupe ia te ia, ona alu lea ma ave i le tama’ita’i o Siaumau, ae avatu e Siaumau fualaau faasaina ia te ia, ma alu atu ai loa ma tuu atu ia Lepou fualaau fa’asaina, ae avatu ai e Lepou ia te ia le $80 i tua o le Fale’ai a le Toese.

 

Na ta’utino atili Leifi Jr i Leoleo Suesue, o le tamaitai lea na avatua le nusipepa o loo i ai fualaau faasaina, o le tamaitai lava fo’i lea e tasi na tuuina atu ia te ia fualaau fa’asaina i le 3 vaiaso talu ai e ave ia Lepou.

 

O lo o i ai le faamoemoe o le malo o se taimi e le o toe mamao ona molia fo’i lea o isi e to’alua o loo aafia i lenei mataupu.