Ads by Google Ads by Google

Molia se ali’i i le faaoolima ma le faia o uiga mataga i se tamaitai talavou


[ata: SN]
ausage@samoanews.com

Pago Pago, AMERIKA SAMOA

 

O le ali’i e 36 tausaga le matua lea o lo o tu’uaia i lona fa’aoolima lea i se isi ali’i i Nu’uuli i le masina na te’a nei, ua taofia nei o ia i le Toese i Tafuna ina ua pu’e faapagota o ia e Leoleo i lalo o se poloaiga mai le Fa’amasinoga. 

 

Ina ua pu’e faapagota e Leoleo le alii ua molia, na maua ai se paipa tioata i lana taga o loo i ai vaega o le pauta faasaina o le aisa. 

 

Ina ua tula’i le ua molia i luma o le Fa’amasinoga Faaitumalo i le masina lava foi na to’a nei, na talosaga ai le itu a le malo mo se avanoa e toe faatulaga ai se isi iloiloga faapitoa o le mataupu faasaga i le susuga a Mekala Tevita, ona o lo o i ai isi tu’uaiga mamafa faasaga ia te ia, ma ua i ai le fuafuaga a le malo i le ono faila lea o se latou tagi faasaga i le ali’i ua molia e uiga i lea mataupu.

 

Mo le mataupu e fa’atatau i le faalavelave lea na fa’aoolima ai Tevita i se isi ali’i mai Ottoville, ua tu’uaia ai nei o ia i le moliaga mamafa e tasi o lona umia faasolitulafono o vaega o le pauta faasaina o le aisa; atoa ai ma le moliaga e tasi o le faaoolima i le tulaga tolu; faatupu vevesi i nofoaga faitele; umia o se a’upega, faapea ai ma le tu fua i le fanua o se isi tagata, o solitulafono mama uma i le vaega A, lea e mafai ona faasala ai se tasi i le Toese mo le umi e oo atu i le tasi le tausaga, pe faasala foi i le salatupe e mafai ona oo atu i le $1,000, poo le faasala fo’i i faasalaga uma ia e lua.

 

E $5,000 le vaega tupe lea ua fa’atulaga e le Fa’amasinoga e tatala ai i tua Tevita, a o faatalitali ai lana iloiloga faapitoa lea ua faatulaga e faia i le vaiaso fou, lea ua faamoemoe le itu a le malo e tatau ona oo atu i ai ua uma ona latou faila le tagi fou fa’asaga i le ali’i ua molia.

 

Afai ae tatala i tua Tevita, ua poloaina o ia e aua ne’i toe tuvae i le fale o le aiga na tula’i mai ai le fa’alavelave, pe taumafai fo’i e faafesoota’i le Tama na aafia ma lona afafine i soo se auala.

 

Ua poloaina le ua molia ina ia auai i soo se taimi e valaau ai lana mataupu, fesoota’i vava lalata ma lana loia ma aua ne’i ona toe solia se tulafono a le malo.

 

TAGI A LE MALO

 

O lenei mataupu na tofu atu i le Ofisa o Leoleo i le masina na te’a nei, ina ua talosagaina e se Tina se fesoasoani a Leoleo, ona o le faalavelave e pei ona faaoolima ai se alii i lona tuagane ma manu’a ai ona foliga. O le ali’i na faaoolima i le tuagane o le Tina na ia logoina le Ofisa o Leoleo, o le susuga lea ia Mafi Tevita, le ali’i ua molia i lenei mataupu. 

 

E to’atele Leoleo na tali atu i le valaau ma maua ai le avanoa latou te fesiligia ai i latou uma na aafia i lenei mataupu, e aofia ai ma le Tina na ia logoina Leoleo mo se fesoasoani.

 

Na taua e le Tina na ia logoina Leoleo mo se fesoasoani e faapea, o ia sa faasavili i fafo o lona fale, ae faafuase’i loa ona ia faalogoina ni leo o ni tagata e sau mai le itu o lo o i ai le fale o lona tuagane, e foliga mai o lo o fufusu i latou. Na tula’i le Tina lea na aga’i atu i le fale a lona tuagane ma lona aiga, lea e 2 fale e va ai mai lona fale.

 

Na taunuu le Tina ma ia vaaia ai lona tuagane o loo saofa’i i lalo o le mutia ae o loo taumafai lona to’alua e lomi le ulu. Ina ua ia fesili poo le a le mea ua tupu, na tali le to’alua a lona tuagane, ua manu’a lona tuagane na faaoolima i ai Mafi. O le taimi lea na faafesoota’i ai loa e le Tina lea le Ofisa o Leoleo i Tafuna mo se fesoasoani.

 

Na taua e le to’alua o le ali’i na aafia i Leoleo e faapea, o ia sa matamata le latou TV ma lana fanau i luma o le potu malolo, ae o lona to’alua sa ula lana sikaleti i fafo o le Fale Ta’avale. Na faateia o ia ina ua faalogo mai o loo vevesi ai lona to’alua ma se isi tagata. E fetaui lava lona taunuu mai i fafo ae pau loa lona to’alua ua tu’i e Mafi. Na ona uma lava ona tu’i e Mafi o lona to’alua, tamo’e loa i le isi itu o le fale ma aga’i atu ai i le auala.

 

Na fesiligia e Leoleo le ali’i na aafia i le mafua’aga o le fa’alavelave. Na taua e le ali’i lea i Leoleo e faapea, i le aso Toona’i mulimuli lava o le masina o Iulai o le tausaga nei, na telefoni ai ia Tevita e alu atu e moa lana vao ma faamama lona fanua ma fesoasoani i le faamae’aina o le si’o o lana umukuka, ona o Tevita o se tagata e lelei lana Kamuta. 

 

Na taua e le ali’i na aafia i Leoleo, ua silia i le 15 tausaga o faia pea e Tevita le galuega o le moa o lana vao ma faamama lona fanua ae maua lona totogi.

 

A o galue le ua molia i le teuina o le fanua a le ali’i na aafia, na manatu ai le na aafia e o ma lona to’alua e asi lona uso matua ma lona aiga i Leone ona toe malaga mai ai lea. Na tuua e le ua molia ma lona to’alua le fale ao faagasolo pea le galuega teu fanua a le ua molia, ae o le taimi lea, o lo o momoe ai i totonu o le fale le fanau a le ali’i na aafia, e aofia ai lona afafine e 15 tausaga le matua ma lana fanau tama laiti.

 

Na toe fo’i mai le ulugali’i i le fale i le afiafi ae o le taimi lea ua leva ona mae’a le galuega a le ua molia ma ua toe fo’i atu i lona fale. Ina ua fo’i mai le na aafia ma lona to’alua i le afle, na alu atu lona afafine ma faafetaui o ia ma faailoa atu i ai uiga mataga na faia e Tevita ia te ia ao moe i luga o le nofoa i totonu o le potu malolo. 

 

Na taua e le tamaitai talavou lea i lona Tama e faapea, a o moe i luga o le nofoa, na faateia o ia ina ua tago atu se tagata i lona fatafata ma ona oga vae. Na ala i luga ma ia vaaia ai Tevita o loo too tuli i autafa o le nofoa o loo taoto ai, o le taimi lea na ia tu ai loa i luga ma savali i le isi pito o le fale, ma ia faatonuina loa le ua molia e alu ese ma le fale. Na usita’i le ua molia ma ia tuua ai loa le fale. Na faalogoina e le tamaitai na aafia le malosi o le manogi pia na alu atu i le vaega tonu na tu ai le ua molia.

 

Na taumafai le alii na aafia e faafesootai Tevita i lana telefoni peita’i ua le talia lana telefoni. E faa 3 fo’i ona alu le na aafia i le fale o Tevita peita’i e lei maua atu ai o ia.

 

Ae i le tuana’i ai o aso e 2 talu ona tuana’i le faalavelave, na alu ai Tevita i le fale o le ali’i na aafia e fesiligia o ia i tala ua ia faalogo ai e faatatau i lona afafine. Na taua e le ali’i na aafia e faapea, ao ia taumafai e faamalamalama ia Tevita le tala a lona afafine e faatatau i le faalavelave na tula’i mai, na faafuase’i ona tu’i e Tevita o ia ma pau ai i lalo, sosoo ai ma le kiki e Tevita o ona foliga ma lona tino, ona tamo’e ese loa lea o Tevita.

 

Na maua le avanoa e fesiligia ai e Leoleo le ua molia e uiga i lenei mataupu. Na ioeina e Tevita lona faaoolima i le ali’i na aafia ona o tu’uaiga sese e faatatau ia te ia ma lona afafine. Na matua teena malosi e Tevita lona faia o ni uiga mataga i le tamaitai na aafia. 

 

Sa ia taua i Leoleo e faapea, talu mai le silia i le 10 tausaga o ia galue e faamama le fanua o le aiga na aafia, e le i faatasi lava ona ta’u leaga lona igoa i se mea faaletonu e tula’i mai ai. Ae ua faateia o ia i tu’uaiga na faia e le afafine o le ali’i na aafia faasaga ia te ia. 

 

Na taua e le ua molia e faapea, e i ai le taimi na alu ai i totonu o le fale e aumai se vai asi ma se mea’ai mo ia ao faatino ai lana galuega o le faamamaina o le fanua. O lana masani lava lea i le tele o taimi e galue ai e faamama le fanua ma le lotoa a le aiga na aafia, e masani ona alu i totonu o le fale e aumai se vai aisa poo se mea’ai mo ia. 

 

I le faalavelave e pei ona tula’i mai, e le i iloa e Tevita o loo i ai le fanau a le ali’i na aafia i totonu o le fale. Sa ia taua lona alu i tua i le umukuka e aumai se vai aisa ma se mea’ai mo ia, ae na te’i ina ua valaau atu le afafine o le ali’i na aafia ia te ia e alu i fafo ma le fale. 

 

Na taua e le susuga a Tevita lona taumafai e faamanino i le tamaitai le mafua’aga na alu atu ai i totonu o le fale, peita’i na tuli lava e le tamaitai o ia i fafo ma le fale. Sa ia usita’i ma alu ese loa ma le fale.

 

Ao lei auina atu e Leoleo le ua molia i le Ofisa o Leoleo i Tafuna mo suesuega, na saili muamua e Leoleo lona tino pe maua ai ni fualaau faasaina. I totonu o le taga o lona ofu sa faia, na maua ai vaega o le pauta faasaina o le aisa.

 

Ina ua fesiligia e Leoleo le ua molia e faatatau i fualaau faasaina, na ia taua ai e faapea, o le paipa tioata na avatu e se tasi o ana uo ia te ia.