Pago Pago - AMERIKA SAMOA

O le aso 29 o Mati, 2024 na suesueina ai ni alii se to’atolu, ina ua masalomia i lo latou gaoia o se taavale moa vao (tractor lawn mower), mai i le fale o se aiga, ma i’u ai ina molia i latou i le gaoi, faomea ma le solivale o fanua.

E tusa ai ma faamaumauga a leoleo o le taeao o le aso 29 o Mati, na valaau ai se tina i le Ofisa a Leoleo i Tafuna e lipotia le gaoia o sana taavale moa vao (tractor), mai lona maota i Nu’uuli.

Ina ua taunu’u leoleo i le maota o lenei tina, ma faia ni a latou su’esu’ega, sa maua ai i tafatafa o le fale na lokaina ai le moa vao, ia se se’evae (size 10).  Ma sa fa’ailoa atu e le tina i leoleo, na maua le seevae i tafatafa o le fa’amalama pito i tua o le fale na teu ai le moa vao.

Sa iai foi se ata vitio na tu’uina atu e le tina i leoleo, ma na va’aia ai i lenei ata vitio ia se tagata o la’ei uliuli ma se’evae pa’epa’e, o lo’o ia u’una’iina le taavale moa vao, mai i le fale o le tina.  Sa fa’aalia foi e le tina i leoleo, e $3,000 le tau o lana moa vao.

O le aoauli o le aso lava lea, na toe fa’afeso’ota’i ai e lenei tina ia le ofisa a leoleo ma fa’ailoa i leoleo seisi ata na pu’eina e le masini pu’eata a le faleoloa o le ‘Uso Store’ i leisi itu auala mai i lona fale, o lo’o maua ai ata o ni tagata se to’alua ma se ta’avale, o lo’o tosoina le moa vao a lenei tina.  Sa faapea ona agai atu leoleo i le faleoloa a le ‘Uso Store’ mo le iloiloina o lea tulaga.

Sa molimauina e leoleo i le ata mai i le masini pu’eata a le faleoloa, ia se taavale na agai atu i le faleoloa ma se tagata o lo’o savali atu i tua o le taavale, ae o lo’o fa’afoeina e seisi ia le moa vao, o lo’o toso e le taavale.

Na iloa e se tasi o leoleo ia le alii sa faafoeina le moa vao, o le susuga ia Lorenzo Sualoa, ma e nofo i le eria e tasi na gaoia mai ai le moa vao.  Sa faapea loa ona fesiligia e leoleo tagata sa iai i le faleoloa, pe iai se tasi e na te silafia le fale e nofo ai Sualoa.

Sa agai atu loa leoleo i le fale a Sualoa, ma talatalanoa ma nisi o lona aiga.  A’o talatalanoa leoleo ma aiga o Sualoa, sa va’aia e se tasi o leoleo ia Sualoa, o lo’o tu mai i tafatafa o le fale e tu’u ai le taavale ma o le ta’avale lea sa iai, e tali tutusa ma le taavale lea na va’aia i luga o le ata mai i le masini pu’eata a le ‘Uso Store’, lea sa tosoina ese mai le moa vao.

Na faapea ona valaau atu leoleo ia Sualoa e sau latou te talanoa ma sa faapea loa ona ave fa’apagota ai Sualoa i lea taimi.

Sa iai se tasi o alii o le aiga a Sualoa na fesiligia leoleo i le mafua’aga ua ave faapagota ai Sualoa ma sa fa’ailoa atu iai e leoleo le pueina o le ata a Sualoa o lo’o ia gaoia se moa vao, ma o le ta’avale sa fa’aaogaina i lea soligatulafono, e tutusa lelei ma le taavale o lo’o paka i totonu o le ‘garage’ a le aiga.

Na talosagaina e le alii o le aiga a Sualoa ia leoleo, pe mafai ona ia talanoa ia Sualoa, ona i sona talitonuga, e le mafai e Sualoa ona faia se tulaga valea faapea.

Ina ua fesiligia e le alii o le aiga a Sualoa ia Sualoa pe moni sa ia faia le tulaga e pei ona ta’ua e leoleo, na tali Sualoa, e moni, ma sa ia nanaina le moa vao i totonu o le ‘garage’ ma sa ia fa’aaogaina foi le taavale a le alii o le aiga, e toso mai ai le taavale moa vao.

Sa faapea loa ona ave e leoleo ia le moa vao faapea ma le taavale ale aiga, lea sa fa’aaogaina e toso mai ai le moa vao.

Ae ina ua taumafai leoleo e ave’ese atu Sualoa, sa a’apa Sualoa i totonu o lana taga ma na faapena ona feosofi atu ai leoleo ma taofi mai o ia.  Ina ua taumafai se tasi o leoleo e toso ese mai le lima o Sualoa, sa faapea mai le tala a Sualoa, o se mariuana.

Na su’esu’eina loa e leoleo ia la’ei o Sualoa ma o latou ave’esea mai ai se paipa tioata o lo’o iai se aisa, faapea ma se taga pepa iila o iai ni laula’au lanu meamata i totonu.

Ina ua taunu’u leoleo ma Sualoa i le ofisa a leoleo, sa faapea loa ona fa’afeso’ota’i le vaega a leoleo e gafa ma le mataituina o fualaau faasaina.

I le fa’atalanoaga o Sualoa e leoleo i lo latou ofisa, sa ta’ua ai e Sualoa e faapea, a’o agai atu lana taavale i lo latou fale, ae talotalo atu Hurry Magalasin (lea ua  molia faatasi ma Sualoa) i luma o le faleoloa a le ‘Uso Store’ i Nu’uuli.  Ma na talosagaina e Magalasin ia lana fesoasoani, e toso mai ai sana moa vao, ona e leai se taavale e toso mai ai.

Sa taua foi e Sualoa lona vaaia o lona tausoga o Ieti Soosemea (o lea foi e molia i lenei mataupu) o lo’o tu mai i tafatafa o le moa vao, i lo latou fale.  Na ioe Sualoa e fa’aaoga le taavale e toso ai le moa vao ma sa ia fa’ailoa atu ia Magalasin ma Soosemea, e na te le iloa ave se moa vao.  Ma sa ia faatonuina lona tausoga o Soosemea, e na te aveina atu le taavale ae savali atu i autafa ia Magalasin.

Sa ta’ua foi e Sualoa, lona fa’ailoa atu ia Soosemea ma Magalasin, ona o le moa vao, sa gaoia, e sili ai ona ave e nana i totonu o le latou ‘garage’ ma sa o latou faia faapea, ona o latou  ta’ape ai loa lea.

E tusa ai ma le faamatalaga a Sualoa, o latou uma e to’atolu, e faigaluega fa’atasi uma.

O le aso lava lea, na toe fa’afo’i ai e leoleo ia le moa vao i le tina e ana le moa vao.

Ina ua mae’a ona fa’atalanoaina e leoleo ia Sualoa, sa faapea lona ona o latou aga’i atu e saili mai ia Soosemea ma Magalasin.

O le fa’ata’amilo mai a leoleo i le Paka Liona ma fesiligia tagata sa iai iina, na mafai ona fa’asino ifo iai ia le fale e nofo ai Magalasin.  Ma ina o agai atu leoleo i le fale sa faasino ifo, sa va’aia ia se fa’alapotopotoga o tagata, o lo’o latou taumafai e taofiofi se alii, lea na iloa mulimuli ifo, o Magalasin.

Sa faapea loa ona lokaina mai e leoleo ia Magalasin ma aveina atu i le ofisa a leoleo.

Ae sa faailoa ifo e se tasi na iai i le mea na lokaina mai ai Magalasin (o se tasi o tuaoi a Sualoa) sa nanaina e Magalasin ia le moa vao i lona fale ma o se tulaga sa le fiafia ai ona sa iai leoleo i le fale o lona Aunty e su’e ia Magalasin ma Ieti.

Ina ua taunu’u leoleo ma Magalasin i le ofisa a leoleo, sa muamua ona fa’amaonia e Sualoa, o Magalasin le tagata lea ma o ia (Magalasin) lea sa savalivali i ona (Sualoa) tafatafa, a’o ia faafoeina le taavale moa vao.

I le faatalanoaga a leoleo ma Magalasin sa ta’ua ai e le ua molia, lona le iloa o se mea, ona o ia e nofo i le mea e faigaluega ai ma o le ta o le 10 i le po lea, na fai ai sana malologa, fa’ato’a toe ala ifo i le 7 i le taeao na soso’o ai.  Sa ta’ua foi e Magalasin, e le’i alu lava i se mea i lea po.

O le taeao o le aso na soso’o ai, Mati 30, 2024, na toe agai atu ai leoleo i le faleoloa a le ‘Uso Store’ mo le fa’aauauina o a latou suesuega ma sa fa’atalanoa ai e leoleo ia se tasi o tuaoi (lea na iloa mulimuli ifo, e aiga ia Sualoa ma Soosemea).  Ma sa faamatala e lenei tuaoi/molimau, o la’ei a Soosemea lea sa maua ai lona ata i luga o le masini pu’eata a le faleoloa, o ona la’ei lava ia e tasi sa la’eiina i le po na tupu ai le faalavelave, a’o ia aga’i atu i le fale o le tina lea na gaoia lana moa vao.

Sa ta’ua foi e le tuaoi/molimau lona vaaia o Soosemea ma Magalasin, o talanoa ae e le’i toe fo’i i lona fale.

O le tala a le tuaoi/molimau, o la’ei a Soosemea i le po lea, o se pulou paepae e iai ni tusitusiga papa’e, o se peleue uliuli, o ni seevae Nike uliuli ma sona ofuvae puupuu lanu uliuli.

O le aoauli o le aso lea, Mati 30, na va’aia ai e leoleo ia Soosemea o aga’i atu i se fale’aiga i Nu’uuli.  Ma sa fesiligia o ia e leoleo pe mafai ona o latou malaga atu i le ofisa a leoleo mo le talanoaina o se mataupu, lea na ioe iai le alii o Soosemea.

I le faatalanoaga a leoleo ma So’osemea, sa molimau ai So’osemea, o ia lea sa fa’ata’atia le fuafuaga atoa mo le gaoia o le moa vao, ona e na’o la’ua ma Magalasin e iloa le moa vao.  Sa ia faamatalaina foi ona la’ei sa faia i le po lea.

Sa faamanino foi e Soosemea le auala na o la gaoia ai le moa vao, ma lona iloa o mea pu’e ata i le fale o le tina e ana le moa vao, ona e masani ona ia faamamaina le fanua a lea tina.  Ma na ta’ua e So’osemea, o le alii o Magalasin sa ia va’ava’aia le sau o se tagata, a’o ia ave’esea mai le moa vao.

Ma na ta’ua e So’osemea lona u’una’ia o le moa vao i le fale tuai a Sualoa ma nana ai, ona e leai seisi o toe nofo i lea fale.

Ona ia toe alu lea i lona tausoga o Sualoa e ta’u iai le moa vao lea ua ia gaoia mai i le fale o le tina sa a’afia i lenei mataupu.  O le taimi lea, na o la o ai i le fale tuai a Sualoa e aumai le moa vao lea na nana ai, e faatali ai se taimi lelei, e fa’atau atu ai i seisi.

O lo’o ta’ua i fa’amaumauga a leoleo le pulouina e Soosemea o se pulou uliuli e iai ni tusitusiga papa’e.

Ua molia nei Hurry Magalasin, Lorenzo Sualoa ma Enzenauer “Ieti” So’osemea i moliaga, e aofia ai;

Faitauga 1:  Gaoi – o se vaega ‘C’ i solitulafono mamafa, e mafai ona loka ai se tasi i le o’o atu i le fitu (7) tausaga

Faitauga 2:  Faaleagaina (tampering) lona tulaga lua – o se vaega ‘A’ i solitulafono mama, e mafai ona nofosala ai se tasi i le falepuipui, i le tasi (1) tausaga, po o se sala tupe e le sili atu ma le $1,000; po o fa’asalaga uma e lua.

O isi moliaga faaopoopo, ua molia ai Enzenauer “Ieti’ So’osemea, e aofia ai:

Faitauga 3:  Faomea i lona tulaga e tolu – o se vaega ‘B’ i solitulafono mama, lea e mafai ona nofosala ai se tasi i le falepuipui, i le le sili atu ma le lima (5) tausaga

Faitauga 4:  Solivale o fanua – o se vaega ‘B’ i solitulafono mama, e mafai ona nofosala ai se tasi i le falepuipui, i le le sili atu ma le ono (6) masina, po o se sala tupe e le sili atu ma le $500; po o fa’asalaga uma e lua.

E $10,000 le vaegatupe fa’atulagaina e mafai ona tatalaina ai i tua So’osemea, ae $8,000 mo Magalasin ma Sualoa, e faatali ai o latou faamasinoga.