Ads by Google Ads by Google

Molia ni ali’i se to’alua umia faasolitulafono o le pauta o le ‘cocaine’


[ata: SN]
ausage@samoanews.com

Pago Pago, AMERIKA SAMOA

 

E to’alua ni ali’i ua molia nei e le malo i le umia faasolitulafono o vaega o le pauta faasaina o le cocaine, e mafua mai i le faalavelave lea na taofia ai e Leoleo se ta’avale i luga o le alatele i le po o le aso 25 Iulai i lona le usitaia o tulafono i luga o le alatele, ae maua ai vaega o le pauta faasaina o le cocaine.

 

O se taimi muamua lenei e pei ona taua e Leoleo i le latou ripoti ua maua ai i ni a latou suesuega vaega o le pauta o le cocaine.

 

O i laua e to’alua ua molia e aofia ai le susuga a Matavale Fiu ma Gaisoa Mapo, lea na la tutula’i i luma o le Fa’amasinoga Faaitumalo i le vaiaso na te’a nei. 

 

E ta’i 2 moliaga mamafa ua faila e le malo fa’asaga ia Fiu ma Mapo. O ia moliaga e aofia ai le umia faasolitulafono o vaega o le pauta faasaina o le cocaine, atoa ai ma le moliaga o le umia faasolitulafono o le pauta o le cocaine ma le faamoemoe e tulei ma faatau atu i isi tagata, o ni solitulafono mamafa e mafai ona fa’asala ai se tasi i le Toese mai le 5 e oo atu i le 10 tausaga, pe faasala i le salatupe e oo atu i le $20,000, poo le faasala foi i faasalaga uma ia e lua.

 

E $15,000 lea ua fa’atulaga e le Faamasinoga e totogi ona faatoa mafai lea ona tatala le tagata e to’atasi i tua mai le Toese i Tafuna. 

 

TAGI A LE MALO

 

O le tagi faasaga ia Fiu ma Mapo na alia’e mai ina ua taofia e Leoleo se ta’avale i luga o le alatele i Iliili i le soona alu saoasaoa i luga o le alatele atoa ai  ma lona laasia o le laina e le tatau laasia. Na tuliloa e Leoleo le ta’avale na taofi i luma o le magatolu e agai atu i Ottoville. 

 

E 2 ta’avale Leoleo faatasi ai ma ni isi o Leoleo na i ai faatasi i le taimi na taofia ai le ta’avale sa soltulafono i luga o le alatele. Na talanoa Leoleo i le ave ta’avale ma faamaonia ai, o le ave ta’avale e suafa ia Alesana Tipi. Na fesiligia Tipi mo lana laisene ma faamaonia ai, e leai sona laisene ave ta’avale o i ai, e leai fo’i ni faamaumauga i le Ofisa o Ta’avale a le malo e faamaonia ai, o loo lesitala le ta’avale i lalo o le suafa o Tipi.

 

Sa manatu Leoleo e na o Tipi o loo i totonu o lana ta’avale, peita’i na toe iloia mulimuli ane e Leoleo, e to’atolu isi alii sa i ai faatasi ma Tipi i totonu o le ta’avale i le taimi na taofia ai e Leoleo lana ta’avale.

 

A o talanoa atu Leoleo i le susuga a Tipi, na faalogoina e Leoleo le sau o le manogi ‘ava malosi mai lona tino, o iina na masalomia ai loa, o lo o i ai Tipi i lalo o le ava malosi. Talu ai le masalomia o Tipi i lona tagofia o le ‘ava malosi a o ia faafoeina se ta’avale, na mafua ai loa ona faia se suega e faamaonia ai pe faamaonia sa tagofia e Tipi le ‘ava malosi ma faafoe le ta’avale. 

 

O le taimi fo’i lea na faatonuina ai loa e Leoleo alii e to’atolu o loo i totonu o le ta’avale a Tipi ina ia aga’i uma i fafo. O se tasi o i latou e to’atolu i ai le pasese o le susuga lea a Matavale Fiu, se tasi o ali’i e to’atolu i ai alii o loo molia i lenei mataupu. 

 

O le taimi lava na oso mai ai i fafo Fiu ma le ta’avale, na faigofie ai lava ona iloa o ia e Leoleo mai se tasi o mataupu sa latou suesuenina, lea o loo i ai se tusi saisai e pu’e faapagota ai Fiu. Na vave le faaiuga a Leoleo ma taofia ai loa Fiu mo se taimi le tumau ao faatali gaioiga e saili faamaumauga pe faamaonia o loo i ai se poloaiga mai le Fa’amasinoga e pu’e faapagota ai Fiu.

 

Na saili e Leoleo isi alii e toalua sa i totonu o le taavale a Tipi mo ni aupega ma fualaau faasaina, ma faamaonia ai le leai o ni aupega poo ni fualaau faasaina na maua ia i laua, o lea na tatala ai loa i laua e toe fo’i atu i o laua aiga.

 

A o talatanoa Leoleo ma Tipi, na faafuase’i ona savavali atu ni ali’i se to’alua, o i laua ia o Gaisoa Mapo, se tasi e toalua i ai alii ua molia i lenei mataupu, ma le susuga a Elijah Leasau. Na faailoa e alii nei e to’alua i Leoleo o laua suafa, faapea ai ma le latou fesootaiga ma Tipi, o i latou o ni uo.

 

Na savali atu Mapo ma talosaga i le Leoleo pe mafai ona alu atu e talanoa ia Fiu mo se mataupu taua, lea fo’i na talia e le Leoleo ma savali atu ai loa Mapo ma talanoa ia Fiu. 

 

A o talanoa i laua nei e to’alua, na vaaia e Leoleo le tago atu o le lima o Mapo ma popo le fatafata o Fiu. Ina ua sauni Mapo e savali ese mai i le vaega o loo tu ai Fiu, na vaaia e Leoleo se pepa iila o loo uu i le lima o Mapo. Na oso atu le Leoleo ma fai ia Mapo e avatu le pepa iila o loo i lona lima ia te ia, peita’i na musu Mapo e ave le pepa iila i le Leoleo, ae sa ia tago ma tuu i totonu o le taga o lona ofu o loo fai.

 

O le taimi lava lea na taofia ai loa Mapo i lalo o le vaavaaiga a Leoleo ma auina faatasi atu ai loa i laua ma Fiu i le Ofisa o Leoleo i Tafuna mo le faatalatalanoaina o lenei mataupu.

 

Na taunuu Fiu ma Mapo i le Ofisa o Leoleo i Tafuna ma faatonuina ai loa e le Leoleo lutena ia Mapo e faaali atu mea o loo i totonu o le taga o lona ofu o loo faia. Na faaali e Mapo mea uma o loo i totonu o le taga o lona ofu o loo fai ma vaaia ai e Leoleo se pepa iila feololo o loo i ai vaega o le pauta paepae. Sa maua ai fo’i ma se tama’i straw e fa’aaoga o se  sipuni e asu ai le pauta.

 

Ina ua maea ona fesiligia e Leoleo ia Mapo ma Fiu e uiga i le pepa iila sa maua ai fualaau faasaina, na toe tatala ai loa i laua e toe aga’i atu i le fale. E le i umi ae aga’i atu i totonu o le Ofisa o Leoleo le susuga a Leasau ma ia faailoa i Leoleo, ua mae’a ona ia talanoa ia Fiu ma Mapo e uiga i le pepa iila na maua ia Mapo, ma ua ta’utino atu Fiu ia te ia, o ia (Fiu) e ana le pepa iila o lo o i ai vaega o le pauta faasaina o le cocaine sa maua ia Mapo.

 

O le mae’a ai ona fesiligia e Leoleo o i laua e to’alua ua molia i lenei mataupu, na faia ai loa se suega faapitoa i le pauta sa maua ma faamaonia ai, o vaega ia o le pauta o le cocaine. 

 

O le tele o le valga o le cocaine sa maua ia Mapo na mafai ona faamaonia e Leoleo, e le o ni vaega ia e fa’aaoga mo le tagata lava ia, ae o vaega e umia ma le faamoemoe e tulei ma faatau atu i isi tagata.

 

O le alia’e mai ai o lenei mataupu e faatatau i le maua i le atunuu o le fualaau faasaina o le cocaine, na taua ai e le Faamasinoga Maualuga se atugaluga o loo i ai, i le maitauina lea o le faatupulaia o lenei faafitauli i Amerika Samoa.

 

Saunoa le afioga i le Faamasino Sili ia Michael Kruse i le taimi na lau ai le faasalaga a se alii na ta’usala i le umia faasolitulafono o vaega o le pauta o le aisa e faapea, na amata mai lenei faafitauli o le mariuana, sosoo mai ai ma le aisa, a o lea ua faasolo atu i le cocaine.

 

O alii e to’alua o loo taua o la suafa i le tagi a le malo, le susuga ia Tipi ma le susuga ia Leasau, sa aafia muamua fo’i i laua i le tulafono.

 

O Leasau na molia e le malo i ni tausaga ua mavae i lona umia faasolitulafono o vaega o le laau faasaina o le mariuana, lea na mulimuli ane solofua e se Vaega Iloilo iuga, ina ua le mafai e le malo ona faamaonia le latou tagi faasaga i lenei alii.

 

O le susuga a Tipi, e 2 tagi eseese e aafia ai le umia faasolitulafono o fualaau faasaina o loo aafia ai o ia i luma o le Faamasinoga Maualuga. O lo o faagasolo pea taualumaga o ia mataupu faasaga ia Tipi i luma o le Faamasinoga Maualuga.