Ads by Google Ads by Google

Molia ni ali’i se to’alua i le taumafai e faamalosi se tama’ita’i talavou


[ata: SN]
ausage@samoanews.com

Pago Pago, AMERIKA SAMOA

 

E to’alua ni ali’i na pu’e faapagota e Leoleo i le vaiaso na te’a nei ona o tu’uaiga i lo la aafia i le faalavelave lea na la taumafai ai e faamalosi uiga mataga i se tamaitai talavou e aafia i le gasegase o le mafaufau.

 

O i laua e to’alua ua molia e aofia ai Luteru Pedro ma Tavita Tuigamala. 

 

O le vaiaso na te’a nei na tutula’i ai Pedro ma Tuigamala i luma o le Fa’amasinoga Faaitumalo mo le la ulua’i iloiloga. 

 

O Pedro, 39 tausaga le matua, o lo o tu’uaia i le moliaga o le taumafai e faiaiga faamalosi i se tama’ita’i, ae o Tuigamala, 28 tausaga le matua, o lo o tu’uaia i le moliaga e tasi o le taofi faapagota lea o se tagata e le tusa ma le tulafono, o le vaega C lea o solitulafono mamafa, lea e mafai ona fa’asala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala uma fo’i i faasalaga ia e lua.

 

E $5,000 lea ua faatulaga e le Fa’amasinoga e tatala ai i tua Pedro ma Tuiagamala. 

 

Afai ae tatala i laua i tua, e le mafai ona la toe taumafai e faafesootai le tamaitai na aafia i lenei mataupu, poo nisi fo’i o lona aiga, a ia avea i laua ma tagatanu’u e tausisi i tulafono a le malo i taimi uma. E le mafai ona la tuua le atunuu, e le tatau ona misi aso e faatulaga ai a laua iloiloga, ma ia fesootai vavalalata ma le la loia fautua.

 

O le aso lea na faia ai le ulua’i iloiloga o lenei mataupu, na fa’aagafua ai fo’i e Pedro ma Tuigamala la aia tatau faaletulafono e faia ai le la ulua’i iloiloga, ae manatu e tuu sa’o loa le la mataupu i luma o le Fa’amasinoga Maualuga.

 

O le vaiaso lava fo’i na te’a nei na tutula’i ai Pedro ma Tuigamala i luma o le Fa’amasinoga Maualuga, ma la teena ai tu’uaiga faasaga ia te i laua. O le masina fou o Oketopa lea ua fa’atulaga e faia ai le la ulua’i iloiloga i luma o le afioga i le ali’i Fa’amasino Sili lagolago ia Fiti Sunia.

 

TAGI A LE MALO

 

O le po o le aso 20 o le masina na te’a nei o Aokuso, 2020, na maua ai e le Ofisa o Leoleo i Tafuna se telefoni mai se tagata i Nu’uuli, e talosagaina ai le fesoasoani a Leoleo mo le faato’afilemuina o se vevesi o loo tula’i mai i luma o se Faleoloa i Nuuuli lava. Na taua e le tagata na ia faafesootaia Leoleo, e to’afa tagata o loo fufusu i autafa o le Faleoloa, e aofia ai ni tama’ita’i se to’alua faapea ai ma ni ali’i se to’alua.

 

E silia i le to’a 6 Leoleo na tali atu i le valaau ma maua ai loa le avanoa e fesiligia ai le tagata na vilia le Ofisa o Leoleo mo se fesoasoani. Na faasino e le ali’i na ia vilia Leoleo le vaega tonu o loo tula’i mai ai le faalavelave, ma faapea ai loa fo’i ona aga’i atu i ai Leoleo.

 

Na taunu’u Leoleo i le nofoaga tonu na tula’i mai ai le faalavelave ma latou molimauina ai ni ali’i se to’alua o loo taumafai e toso se tamaitai, ao taumafai atu fo’i isi tamaitai e to’alua e toso ese mai le tamaitai o loo taumafai alii nei e to’alua e toso. O le taimi na iloa mai ai e alii nei Leoleo, na la tia’i ai loa le lima o le tamaitai na la taumafai e toso ae sosola ese loa mai le vaega na tula’i mai ai le fa’alavelave. 

 

Na aga’i atu Leoleo ma fesiligia tamaitai e to’alua sa i ai i le vaega na tula’i mai ai le faalavelave, ma iloa ai, o le uso lea o le tamaitai na aafia ma lana tama sa fesoasoani e toso ese mai le tamaitai na aafia mai lima saua o alii ua molia.

 

Na taua e le uso o le tamaitai na aafia i Leoleo e faapea, o laua ma lana tama teine na o e tau saili lona uso poo fea o i ai. Ina ua la taunuu atu i luma tonu o le Faleoloa, na la faalogoina ai se tagata o loo alaga mai mo se fesoasoani mai tua o le Faleoloa.

 

Na la taufetuli i tua o le Faleoloa i le vaega na sau ai le leo mo se fesoasoani, ma la iloa ai lona uso laititi o loo taatia i lalo ae o loo taumafai le alii o Pedro e faamalosi o ia i tulaga tau feusuaiga, a o taofi e Tuigamala lona. 

 

La te le i toe faatali ae na la taufetuli atu loa ma la taumafai loa e feosoasoani. Na taua e le uso o le tamaitai na aafia, o lana tama teine lava na muamua tamo’e i le vaega tonu na tula’i mai ai le faalavelave, ma ia taumafai e fusu atu ia Pedro ma Tuigamala ina ia mafai ai ona faamaamulu ese mai lona uso o loo aafia, ae sa fa’aauau pea ona taumafai Pedro e faia uiga mataga faafeusuaiga faamalosi i lona uso.

 

Na ia tamo’e atu ma fesoasoani i lana tama teine e ala i lona taumafai e toso ese mai le lima o lona uso, seia oo ina faamaamulu e Pedro ma Tuigamala le lima o lona uso ina ua la vaaia le ta’avale a Leoleo ua aga’i atu.

 

O le pogisa o le po na faigata ai ona tuliloa e le uso o le tamaitai na aafia ma lona uso le au alii ua molia, 

 

Na vaaia e Leoleo le tamaitai na aafia o loo saofa’i i luga o se poloka sima ma ona foliga fefe ma lona tino o loo gatete. Sa vaaia fo’i e Leoleo laei o lenei tamaitai ua masae, e atagia mai ai taumafaiga faamalosi na tau fai ia te ia. Na mafai ona auina atu le tamaitai na aafia e le ta’avale a le EMS mo togafitiga i le Falema’i i Faga’alu, ae auina atu molimau mo le fa’aauauina o le faatalatalanoaga.

 

O se ali’i e masani lelei i alii e to’alua ua molia na ofo mai lona taimi e fesoasoani ai i Leoleo i le tau sailia o le vaega tonu na sosola aga’i i ai Pedro ma Tuigamala. O tua lava o le Faleoloa lea na tula’i mai ai le faalavelave, o iina na faia ai se inugapia, lea fo’i sa faatasi atu i ai Pedro ma Tuiagamala. 

 

I se taimi o le po lava lea, na osofa’i ai loa e Leoleo fale o Pedro ma Tuigamala ma pu’e faapagota ai loa i laua, ma auina atu ai loa i le Ofisa o Leoleo i Tafuna mo le faatalatalanoaina o le mea moni sa tupu.

 

I le taimi na pu’e faapagota ai e Leoleo ia Pedro ma Tuigamala, na lagona e Leoleo le malosi o le manogi ‘ava malosi sa sau mai tino o le au alii ua molia, faatasi ai ma isi faailoga e faamaonia ai lo la tagofia o le ‘ava malosi e pei o le mumu o mata toe faateletelegese le tautala. 

 

Na maua le avanoa e fesiligia ai e Leoleo le tamaitai na aafia ina ua te’a mai o ia mai tua i le Falema’i. Na taua e le tamaitai na aafia i Leoleo e fa’apea, o ia sa auai i le inugapia sa faia i tua o le Faleoloa faatasi ai ma nisi o ana uo, ae faafuase’i loa ona aga’i atu Pedro ma Tuigamala ma tula’i mai ai loa le fa’alavelave e pei ona la taumafai ai e faamalosi o ia.

 

Na taua e le tamaitai na aafia le taumafai o Pedro e tatala ese ona lavalava (tulou) ae faamalosi o ia la te faiaiga, ae o le taimi lea o lo o taofi ai e Tuigamala lona lima ma una’i o ia i lalo ina ia le mafai ai ona ia tamo’e ese.

 

O le taimi lea na ia ee ai loa i luga mo se fesoasoani ma ia vaaia ai loa le tamomo’e atu o lona uso ma lana tama e fesoasoani ia te ia. 

 

O se molimau sa i ai i le taimi o le faalavelave na ia faamaonia i Leoleo faamatalaga a isi molimau e tusa ai o le faalavelave sa tula’i mai. Sa ia faamaonia fo’i i Leoleo le taumafai e Pedro e faamalosi le tamaitai na aafia i faiga faafeusuaiga, ao toso e Tuigamala lona lima ma taumafai e taofi o ia i lalo.