Ads by Google Ads by Google

Molia le isi i le faaoolima ae taofia i le Falema’i le isi ona o manu’a o le tino


[ata: foa'i]
ausage@samoanews.com

 Pago Pago, AMERIKA SAMOA - O le faalavelave lea na tula’i mai i Nu’uuli i le masina na te’a nei ina ua fa’aaoga e se ali’i se naifi e faaoo ai manu’a i le isi ali’i, ua molia ai nei se tagata se toatasi i le faaoolima ae taofia i le falema’i i Faga’alu le isi ona o manu’a tuga na aafia ai lona tino.

 

I le taimi na pu’e faapagota ai e Leoleo le ali’i o lo o a’afia i lenei mataupu, le susuga a Mataio Vaega, na maua ai i faamaumauga a le Ofisa o Leoleo se tusi saisai na saini e le Fa’amasinoga i le tausaga na te’a nei, e pu’e faapagota ai Vaega ona o tu’uaiga i lona faia lea o uiga mataga i se tama’ita’i e 16 tausaga le matua.

 

O lenei mataupu na tofu atu i le Ofisa o Leoleo i Tafuna, ina ua talosagaina e se Tina le fesoasoani a Leoleo faasaga i le faalavelave lea na manu’a ai lona to’alua ua faaoolima i ai se isi ali’i o le latou lava aiga.

 

Na aga’i atu Leoleo i le nofoaga na aga’i atu ai le valaau ma le fa’amoemoe e amata le latou suesuega, peita’i na faafetaui mai e se ali’i i latou ma ia faailoa i Leoleo, o ia tonu lava lea na faatinoina le fa’alavelave e pei ona manu’a ai le to’alua o lona tausoga ina ua ia faaaoga se tama’i naifi e tui ai lona papatua ma lona tau’au.

 

O le taimi lea na taofia ai loa le ua molia i lalo o le vaavaaiga a Leoleo, a o faagasolo malie le latou suesuega e uiga i le faalavelave sa tupu. 

 

O se Leoleo Sinia sa i ai i le vaega o Leoleo na tali atu i le fa’alavelave, na faigofie ona ia manatuaina foliga o le alii o Vaega ma ia iloa ai, o le tagata tonu lava lea o lo o tau sailia i le fa’alavelave lea na tula’i mai i le tausaga na te’a nei, ina ua ia taumafai e faamalosi se tama’ita’i e 16 tausaga le matua.

 

Na taua e se molimau i Leoleo e fa’apea, sa latou auai faatasi ma i laua e to’alua na aafia i lenei mataupu i se ta’aloga fa’aafu o le afiafi. Ina ua mae’a le ta’aloga fa’aafu, na latou toe savavali faatasi uma fo’i lea i le fale, peita’i, sa i ai ni tala faaulaula na latou faia aga’i i le alii ua molia, na mafua ai ona ita o ia.

 

O nisi o ia tala faaulaula e aofia ai le latou tuuaia o le alii ua molia i lona tolotolo i le fale o le latou Faifeau i le 2 vaiaso talu ai. O le alii ua manu’a i lenei fa’alavelave, o ia lea na pito sili ona tele ana tala faaulaula na fai i le alii ua molia. 

 

Sa i ai le taimi na leai ai se isi e toe faia se tala faaulaula aga’i i le alii ua molia, peita’i o le alii ua manu’a, sa le’i malolo o ia, ae sa fai fai pea lana amio o le fai o tala ula aga’i i le alii ua molia, ma avea ai loa ma itu na ita ai loa le ua molia ma ia folafola lona fasiotia o le tagata e toe lafo atu se tala ia te ia.

 

Na taua atili e le molimau i Leoleo e fa’apea, e leai se isi na manatu e tula’i mai se faalavelave i lea afiafi, aua na latou taape faatasi uma lava ina ua oo mai le taimi o faiga lotu o le afiafi, na latou vaaia fo’i le aga’i atu o Vaega i lona fale, aga’i atu fo’i le alii na aafia i lona fale. Pe tusa o le afa itula talu ona latou taape ae faafuase’i loa ona salalau le tala o le latou uncle (le ua manu’a) lea ua faanatinati atu i le falema’i ina ua ta tui e le ua molia i se tama’i naifi.

 

Na maua le avanoa e fesiligia ai e Leoleo lea ua molia e uiga i lenei mataupu, ma ia ta’utino ai lona fa’aaoga o se tama’i naifi fai mea’ai e ta tui ai le papatua ma le tau’au o le alii na aafia, poo le to’alua fo’i lea o lona tausoga tama’ita’i.

 

Na taua e le ua molia i Leoleo le tiga o lona loto e tau i le lagi i le tele o tala faaulaula na fai atu e le alii ua manu’a ia te ia, o le mafua’aga lea na ia manatu ai loa, o le a ia fasiotia o ia e taui ai le tiga o lona loto. 

 

A o ia nofonofo na o ia i totonu o lona tama’i fale, sa ia faalogoina le alii na aafia o loo aga’i atu i lona fale. Na te le i toe faatali i le taimi lea, ae na ia tula’i loa i luga ma savali i tua i le umukuka ma vaai mai ai se tama’ita’i fai mea’ai maai lava sa i ai.

 

O le taimi lava na latalata mai ai le ua aafia i lona fale, na ia tula’i atu ai loa i luga ma tui o ia i le naifi. Na vave le faatafa a le ua manu’a ma aafia ai lona tau’au i le naifi. Sa ia toe sasau le isi tui peita’i o le taimi lea na ia vaaia ai le tamo’e i le atoa a le na aafia, ma manu’a ai loa lona papatua.

 

TAGI LONA LUA A LE MALO

 

Na ioeina fo’i e le ua molia lona faia o uiga mataga i le tama’ita’i e 16 tausaga le matua na aafia i lenei mataupu.

 

Sa ia ioeina lona alu i le fale o le aiga o le tama’ita’i na aafia i le po ina ua mae’a sa latou inugapia ma nisi o ana uo, e aofia ai ma le uncle a le tama’ita’i ua aafia, ma ia taumafai ai e faamalosi o ia e ala i lona ulufale faamalosi i totonu o le fale ma aga’i atu ai i totonu o le potu sa momoe ai le tama’ita’i na aafia ma nai ona tei laiti e to’alua.

 

Na taua e le tama’ita’i na aafia i Leoleo lona fiu e una’i ese le ua molia ae sa matua malosi lava o ia. Sa ia taua atili fo’i, e faalua ona taumafai le ua molia e faia uiga mataga ia te ia, e ala i lona ulufale faamalosi i totonu o lona potu ma faatino nei ituaiga amioga.

 

O le 2 vaiaso talu ai ona tula’i ai le ua molia i luma o le Fa’amasinoga.

 

E 2 tagi ua faila e le malo fa’asaga ia te ia. I le tagi muamua, o lo o tu’uaia ai o ia i le moliaga o le faaoolima i le tulaga 2 ma le faaleaga meatotino i le tulaga muamua, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe fa’asala foi i le salatupe e oo atu i le $5,000, poo le fa’asala fo’i i fa’asalaga uma ia e 2; faapea ai ma le moliaga o le faaoolima i le tulaga tolu, o le vaega A lea o solitulafono mamafa, lea e mafai ona faasala ai se tasi i le Toese mo le umi e oo atu i le tasi le tausaga, pe faasala i le salatupe e mafai ona oo atu i le $1,000, pe faasala fo’i i faasalaga uma ia e 2.

 

I le tagi lona lua a le malo, o lo o tu’uaia ai le ua molia i le faia o amioga faasotoma; tasi le moliaga o le faia o uiga mataga faafeusuaiga; tasi le moliaga o le tagofia o itutinosa o se tama’ita’i e talavou i lalo o le tulafono, o vaega C ia o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000, pe faasala foi i faasalaga uma ia e 2, faapea ai ma le moliaga e tasi o lona faia o amioga e lamatia ai le saogalemu o fanau laiti, o le vaega A lea o solitulafono mamafa, lea e faasala ai se tasi i le Toese mo le umi e oo atu i le tasi le tausaga, faasala i le salatupe e oo atu i le $1,000, pe faasala fo’i i faasalaga uma ia e 2.

 

Talu ai tulaga matuia o tu’uaiga faasaga i le alii ua molia, ua mafua ai ona taofia o ia i le Toese e aunoa ma se tupe e totogi.