E to’alua ni ali’i na taofia faapagota e Leoleo i le vaiaso na te’a nei, e mafua mai i le fa’alavelave lea na tula’i mai i se fale inisinia i Tafuna, lea na fa’aoolima ai le isi i le tasi, ina ua masalomia le gaoi e le isi o le ta’avale a le tasi ali’i.

Ae ina ua sailia e Leoleo tino o nei ali’i ina ua mae’a ona fesiligia i laua i lenei fa’alavelave, ae maua ai fualaau fa’asaina i taga o la ofu sa fai.

O ali’i e to’alua na taofia faapagota e Leoleo e aofia ai Eletise Okesene ma Matthew Laupepa, lea na tutula’i i laua i luma o le Fa’amasinoga Fa’aitumalo i le vaiaso na te’a nei mo le la ulua’i iloiloga.

E 3 moliaga mamafa o lo o molia ai Okesene ae 2 moliaga mamafa o lo o molia ai Laupepa.

O moliaga ua faia faasaga ia Okesene e aofia ai le gaoi, tete’e atu i Leoleo ao taumafai e pu’e faapagota i latou, faapea ai ma le umia faasolitulafono o vaega o le laau fa’asaina o le mariuana. O Laupea o lo o molia i le faaoolima i le tulaga lua, faapea ai ma le umia faasolitulafono o vaega o le laau fa’asaina o le mariuana.

E $10,000 lea ua fa’atulaga e tatala ai i tua ia Okesene, ae $5,000 ua fa’atulaga e tatala ai i tua ia Laupepa.

TAGI A LE MALO

O le afiafi o le aso 20 o Setema na faafesoota’i ai e le to’alua a Laupepa le Ofisa o Leoleo i Tafuna mo se fesoasoani, ona o se fa’alavelave na tula’i mai i le va o Laupepa ma Okesene, lea na i’u ina faaoolima ai Okesene ia Laupepa ma manu’a ai ona foliga.

Sa taunu’u Leoleo i le nofoaga na tula’i mai ai le fa’alavelave ma amata loa a latou suesuega. Sa taunu’u atu ai fo’i ma sui o le vaega a le EMS, ma latou togafitiina ai loa le ali’i sa manu’a.

Na taua e le to’alua o Laupepa i Leoleo e fa’apea, o ia sa i totonu o le fale i le afiafi lea, sa tau fafaga si ona Tina matua, ae o Laupepa sa fai lava ana galuega masani i totonu o lana Fale Inisinia e tu i tafatafa o le latou fale.

Na faateia o ia ina ua ia faalogoina le pao o se leo tele mai totonu o le Fale Inisinia. Sa ia manatu, ai o se pao e mafua mai i galuega a Laupepa o loo faia. E lei umi se taimi ae ona toe faalogoina fo’i le toe sau o le leo tele lea, ma mafua ai loa ona ia nanati atu i fafo e vaai poo le a lea pao.

Na taua e le fafine e fa’apea, ina ua ia tatalaina le faitoto’a pito i tua o le fale, sa ia vaaia ai lona to’alua o Laupepa o loo taatia i lalo ae o loo ta tu’i e Okesene ona foliga. O le taimi lea na tamo’e atu ai loa ma ee atu ia Okesene e taofi ana gaioiga o lo o faia, ae sa fa’aauau pea ona ta tu’i e Okesene foliga o si ona to’alua. O le taimi lea na ia vaaia ai loa le isi ali’i na to’alua atu ma Okesene, na oso atu ma toso ese mai Okesene.

O le taimi lea lava na tago atu ai loa le fafine i lana telefoni ma vili ai loa Leoleo mo se fesoasoani.

Ina ua maua e Leoleo le autu o le fa’alavelave, na latou aga’i atu ai loa ma taofia faapagota Okesene e ala i le loka o ona lima, ma ta’ita’i atu o ia ua tuu i totonu o le ta’avale a Leoleo, ina ua vaaia e Leoleo le amata lea ona aga’i atu tagata o le aiga o Okesene e fia iloa le mafua’aga ua ala ai ona loka e Leoleo o ia. Ae o le taimi fo’i lea na taunu’u atu ai ma sui o le EMS.

O le maea ai ona fesiligia e Leoleo o le to’alua a Laupepa e tusa ai o lenei fa’alavelave, na latou aga’i atu ai loa i le Ofisa o Leoleo i Tafuna mo le fa’aauauina o le suesueina o Okesene e uiga i lenei fa’alavelave, ae o le susuga a Laupepa na auina sa’o atu lava o ia i le Falema’i mo togafitiga, ona o se manu’a tuga sa a’afia ai lona mata agavale, lea e masalomia na fa’aaoga e Okesene se mea malo e tu’i ai o ia.

A o lei fesiligia e Leoleo ia Okesene e uiga i lenei mataupu, sa faia muamua se suega i lona Tino ina ia mautinoa ai na te le o tauaveina ni a’upega poo nisi fo’i mea e ono aafia ai le saogalemu o Leoleo.

Ina ua saili e Leoleo le tino o Okesene, sa latou maua i ai se sikaleti mariuana ua mae’a ona taai i totonu o le taga o lona ofu sa faia. Na taua e Okesene i Leoleo e fa’apea, o le sikaleti mariuana sa aumai i sana uo e sau mai Vaitogi. Na taua atili fo’i e Okesene i Leoleo le mae’a lea ona faila lana tagi fa’asaga ia Laupepa, ona o le fa’alavelave e pei ona ia gaoia ai le ta’avale a lona uso ua leva ona tau saili.

Ina ua fesiligia e Leoleo ia Okesene i le mafua’aga o le fa’alavelave, sa ia taua ai e fa’apea, o ia na alu e saili le ta’avale pikiapu a lona uso na gaoia ese mai i le latou Fale Inisinia i le masina na te’a nei.

Sa ia maua le tala mai nisi o ana uo fai ta’avale, o le ta’avale a lona uso o loo i ai lea i le Fale Inisinia a Laupepa. Ina ua ia fesiligia Laupepa e tusa ai o le ta’avale a lona uso, sa ita Laupepa ma avaavau atu ia te ia. Sa lafo atu fo’i e Laupepa ni upu mamafa ma le tau fa’amata’u ia te ia, na mafua ai loa ona ita ma ia tu’iiina foliga o Laupepa.

Na taua atili fo’i e Okesene i Leoleo e fa’apea, e tusa ai o le molimau a Laupepa, e $2,400 lana tupe o lo o aitalafu e lona (Okesene) uso laititi, o le mafua’aga lena o lona taofia o le ta’avale a lona uso.

Na aga’i atu Leoleo ma aumai Laupepa e fesiligia i lenei mataupu. Ao lei fesiligia Laupepa, sa muamua saili e Leoleo lona tino poo i ai ni a’upega e ono lamatia ai lo latou saogalemu.

I totonu o le taga o le ofuvae a Laupepa sa faia, sa maua aie Leoleo se tama’i taga pepa iila o lo o i ai lau mamago o le mariuana, faapea ai ma se sikaleti mariuana ua uma ona taai.

Na taua e Laupepa i Leoleo e fa’apea, na alu i le Fale Inisinia a Okesene i Aua i le po ma gaoi mai ai le ta’avale pikiapu, ona sa ia manao e fa’aaoga le afi o le pikiapu lea e faaola ai lana ta’avale tuai ua leva ona tu e le fealua’i. Sa ia taua atili e fa’apea, o lana gaioiga lea na mafua ai loa ona tula’i mai i le vevesi i le va o ia ma Okesene.

I le tulaga o fualaau fa’asaina sa maua e Leoleo i lona ofu, na taua ai e Laupepa e fa’apea, o mariuana sa avatu e se tasi o ali’i na ia faia lana ta’avale, ma lana faaupuga e avatu e ula ma ia.

Na faalogoina e Leoleo le malosi o le manogi pia sa alu atu i le tino o Laupepa i le taimi na fesiligia ai o ia. Sa tete’e fo’i Laupepa i Leoleo ma taumafai e ato ese ona lima ao taumafai Leoleo e pu’e fa’apagota o ia.