Ua molia nei e le malo le ave ta’avale o le Pikiapu Lanumumu lea na taofi e Leoleo i se vaega o le alatele i Fatu ma Futi i le 2 vaiaso talu ai, ina ua maua i ai e Leoleo fualaau fa’asaina, pulufana faapea ai ma mea e fa’aaoga e faatau atu ai fualaau fa’asaina i isi tagata.

Ae ina ua mae’a ona pu’e fa’apagota e Leoleo le ave ta’avale, susuga Thomas Lelevaga, na faatoa iloa ai, e le gata o lo o i ai se tusi saisai faasaga ia te ia talu mai le 2018, ae ua 3 foi tausaga talu ona mae’a le aoga o lona pepa nofomau i Amerika Samoa.

O le vaiaso na te’a nei na tula’i ai Lelevaga i luma o le Fa’amasinoga Faaitumalo mo lana ulua’i iloiloga. E 3 tagi eseese ua faila e le malo faasaga i le ali’i ua molia.

I le tagi muamua, o lo o tuuaia ai o ia i le moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le pauta o le aisa ma le fa’amoemoe e tulei ma faatau atu i isi tagata; faapea ai ma le moliaga o le umia faasolitulafono o vaega o le laau fa’asaina o le mariuana, o vaega uma ia o solitulafono mamafa, lea e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000; faapea ai ma le moliaga e tasi o le umia faasolitulafono o pulufana, o le vaega A o solitulafono mama, lea e mafai ona faasala ai se tasi i le Toese mo le umi e le silia i le tausaga, poo le faasala i le salatupe e le silia i le $1,000, pe faasala foi i faasalaga uma ia e lua.

E $20,000 le tupe ua faatulaga e tatala ai i tua le ua molia.

I le tagi lona lua, o lo o tu’uaia ai Lelevaga i le moliaga o le gaoi faapea ai ma le moliaga o le talepe fale i le tulaga 2, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, poo le faasala fo’i i faasalaga uma ia e 2.

E $15,000 le vaega tupe lea ua faatulaga e tatala ai le ua molia i tua mai le mataupu lenei.

I le tagi lona 3, o lo o molia ai Lelevaga i le moliaga o le taumafai e gaoi ni mea totino, faapea ai ma le moliaga e tasi o le taumafai e talepe se fale o se aiga, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tauaga, pe faasala foi i le salatupe e le silia i le $5,000, poo le faasala foi i faasalaga uma ia e 2.

E $10,000 le vaega tupe lea ua faatulaga e tatala ai Lelevaga i tua mai le Toese i Tafuna i le mataupu lona 3 ua faila faasaga ia te ia.

O le aso Tofi o le vaiaso fou lea ua fa’atulaga e faia ai le ulua’i iloiloga o lenei mataupu.

TAGI A LE MALO

O le po o le aso 3 o Aperila a o tiute ai ni Leoleo i luga o le alatele i Vaitogi, na maitauina ai se pikiapu lanu uliuli o lo o aga’i atu i luga o le alatele ae le ola le moli o le laisene e faigofie ai ona iloa i le po.

Na siaki e Leoleo le numera o le laisene o le ta’avale ma faamaonia mai ai e le Ofisa autu o Leoleo i Fagatogo, o le laisene o le ta’avale (8042) na mae’a lona aoga i le 3 tausaga talu ai.

Na taofi e Leoleo le ta’avale pikiapu ina ua faamaonia e le o talafeagai le fealua’i o le ta’avale i luga o le alatele ae o lo o faaletonu le Lesitala o le ta’avale. Ina ua fesiligia e Leoleo le ua molia mo lana laisene ave ta’avale, na pepelo i ai le ua molia, o lo o galo i le fale lana laisene. Mulimuli ane faamaonia e Leoleo i a latou suesuega, ua 3 tausaga e le i toe faafoua le laisene ave ta’avale a le ua molia.

E to’atolu isi ali’i sa i ai i totonu o le ta’avale ma Lelevaga i le taimi na taofia ai i latou e Leoleo. O le faamaonia ai o le faaletonu o le lesitala o le ta’avale faapea ai ma le laisene a le ua molia, na faia ai loa le faaiuga ina ia taofia e Leoleo le ta’avale, ma avatu faatasi ai lava ma i latou uma sa i ai i totonu o le taavale i le Ofisa o Leoleo i Tafuna mo isi suesuega.

A o le i auina atu i latou nei i le Ofisa o Leoleo i Tafuna, na muamua siaki e Leoleo tino o i latou nei ina ia mautinoa latou te le o tauaveina ni fualaau faasaina poo ni a’upega e ono lamatia ai le saogalemu o Leoleo.

E leai ni mea na maua i tino o ali’i se to’atolu sa i ai faatasi ma Lelevaga i totonu o le ta’avale, se’i vagana ai Lelevaga na maua e Leoleo se pepa iila o lo o i ai vaega o le pauta faasaina o le aisa i le taga o lona ofu.

Ina ua taunu’u i le Ofisa o Leoleo i Tafuna, na sailia ai loa e Leoleo totonu o le ta’avale ae matamata ai Lelevaga. I lalo o le nofoa a le ave ta’avale, na maua ai e Leoleo se ato o lo o i ai vaega o le pauta faasaina o le aisa, o pulufana, faapea ai ma pepa iila e fa’aaoga e faatau atu ai fualaau faasaina i tagata lautele.

Ina ua fesiligia e Leoleo le ua molia e uiga i fualaau fa’asaina ma pulufana na maua ia te ia ma totonu o le ta’avale, na taua ai e le ua molia lona le iloa poo ai e ana mea uma sa maua ia te ia ma totonu o le ta’avale.

O le pepa iila sa maua i totonu o le taga o lona ofu, sa taatia i luga o le nofoa o le ave ta’avale i le taimi na oso ai i totonu o le ta’avale, o lea na ia tago ai loa ma tuu le pepa i totonu o le taga o lona ofu.

A o talanoa Leoleo ma Lelevaga, o le taimi lea na maua ai e Leoleo se fesootaiga mai isi Leoleo i totonu o le Ofisa, e i ai se tagata mai Ottoville o lo o tau saili sana pikiapu lanu uliuli na gaoia ese mai e se tagata mai lona fale, ae o lo o masalomia ai Lelevaga i le ave faagaoi o lea ta’avale.

Na taua e le alii e ana le ta’avale, o Lelevaga na alu atu ma talepe lona fale ma alu i totonu o le potu o loo i ai le ki o le ta’avale ma aveese mai, ma ia gaoia ai loa lana ta’avale e aunoa ma se faatanaga. E pei ona taua e le ali’i lea i Leoleo, talu ai le galuega inisinia a Lelevaga, o le mafua’aga lea la te masani ai, ona e masani ona fai e Lelevaga ana ta’avale pe a leaga.

Na taua e Lelevaga i Leoleo, na mafua ona ia gaoia le ta’avale a lana uo, ona e silia i le $1,200 le tupe o loo nofo aitalafu ai le ali’i lea ia te ia, i pili o galuega o ana ta’avale e le i uma ona totogi atu.

TAGI FAASAGA I LE OSOFAIA O SE FALE

O le masina o Oketopa o le tausaga e 2018 na logo ai e se Tina mai Kokoland le Ofisa o Leoleo i Tafuna, e faatatau i lona fale na taumafai se tagata e osofa’i ae tau gaoi meatotino sa i totonu o le Fale Taavale.

Na taua e le Tina e ana le fale i Leoleo e fa’apea, sa vaaia e le aiga tuaoi ia Lelevaga o ia taumafai e talepe le faitoto’a pito i tua o lona fale.

Ae ina ua le mafai e Lelevaga ona ulufale i totonu, na ia taumafai ai loa e gaoia le pusa faigaluega a lona to’alua sa taatia i totonu o le Fale Taavale. Na iloa atu e le aiga tuaoi taumafaiga a Lelevaga, ma latou valaau atu ai loa i le ua molia e alu ese ma le fale o lea ua latou vilia Leoleo.

Na taua atili e le Tina e ana le fale i Leoleo e fa’apea, o le faatolu ai loa ona faia e le ua molia gaioiga nei i lo la fale. O le masina o Iulai 2019 na talepe ai fo’i e Lelevaga le la Fale Taavale ae gaoi le tele o meaaoga sa i ai e silia i le $1,000 le tau aofa’i.

I le masina o Setema 2019, na talepe ai fo’i e Lelevaga le la fale ae gaoia lavalava, o pea seevae faapea ai ma nisi o meaaoga ae o le taimi lea o loo la malaga ai i fafo mo a laua Talavai.

La te lei manatu e faila se tagi i Leoleo faasaga ia Lelevaga, ona sa o atu ona matua ma faatoese atu, ma mafai ai loa ona toe teuteu i tua le mataupu.

Ina ua fesiligia e Leoleo ia Lelevaga e uiga i lenei mataupu, sa ia ioeina ai lona taumafai e osofa’i le fale a lona uncle ma lona to’alua i Kokoland, atoa ai ma lona taumafai e gaoi le pusa faigaluega sa i totonu o le Fale Taavale.