Pago Pago - AMERIKA SAMOA

O le po o Setema 27, 2024 na valaau atu ai se tina loto mafatia i le Ofisa a Leoleo i Fagatogo, e ripotia atu ai le fa’ao’olima o lona to’alua ia te ia.

(O le a le lomia e le Samoa News/Lali ia suafa o i latou ua aafia pe molia i lenei mataupu, ona o le puipuiga o fanau iti.)

Ina ua latalata atu leoleo i le nofoaga na tupu ai le faalave, sa savali mai i fafo le tina ma ina ua faatalanoaina o ia e leoleo, sa ia faamatalaina le fa’asuaava o lona toalua ma lona tu’iina o ona foliga.  Sa ia ta’ua foi lona tauanauina o lona to’alua e la te o i le fale, ae musu.  Ma na palauvale ma lafo atu ni upu faatiga e lona to’alua, ia te ia.

Na tete’eina e le tina ia se auaunaga a le EMS.  Ae sa ia tuuina atu i leoleo ia faamatalaga o foliga o lona toalua ma faasino le nofoaga o lo’o saofai mai ai i totonu o le ‘pavilion’.  

Ae ina ua agai atu leoleo ma le tina i le nofoaga sa iai le ua molia, ua leai seisi.  Na fesiligia e le tina ia se tasi o alii e galulue faatasi ma lona to’alua po o fea o iai, ae tali lea alii, o la na savali atu agai i sisifo.

Sa faapea loa ona toe agai atu le taavale a leoleo i sisifo ma na va’aia ai ni alii se toatolu o fai se latou inuga i luma o se ‘warehouse’ i leisi itu auala o le uafu i Satala.  O iina na maua atu ai le ua molia.

Na faapea loa ona o atu leoleo ma lokaina mai le ua molia ma aveina atu o ia ma le tina i le ofisa a leoleo.

Ma e tusa ai ma se molimau tusia a le tina, sa ia faamatalaina ai le faamanavaina o ana galuega e lona pule i le Starkist, i le 4 i le afiafi ona ua le lelei lana faalogo.  Ae peitai, sa fai atu lava lona toalua ia te ia, e nofo pea e faigaluega.

Ae o le 7:35 i lea afiafi, na alu atu ai se tagata ma faailoa atu i le tina, le le faigaluega lona to’alua.  Ae ina ua alu atu i le pamu kesi i Satala, sa vaaia ai lona toalua ma a’o ia taumafai e ave’ese atu lona toalua, sa ‘e’e mai le tamaloa ia te ia ma palauvale mai ma lafo mai ni upu faatiga.  Ma faai’u i le tu’iina o ona foliga e lona toalua.

Sa ta’ua e le tina, le taumafai o tagata na iai i lea nofoaga, e vaovao. le la misa.

Ua molia nei le tamaloa i moliaga e aofia ai;

Faitauga 1:  Faatupu Vevesi i totonu o le aiga (sauaga i le aiga), o se vaega ‘A’ o soligatulafono mama, e mafai ona loka ai mo le tausaga atoa, po o se sala tupe e i le va o le $150 ma le $1,000; po o faasalaga uma e lua.

E faapea foi i le Faitauga e Lua, o le Faao’olima i lona tulaga e tolu.

Sa faatulagaina se vaegatupe e $1,000 e tatalaina mai ai le ua molia, e faatalitali ai lona faamasinoga.