Pago Pago - AMERIKA SAMOA

O se vaitaimi o le ogatotonu o Oketopa, na fa’afeso’ota’i ai e le Ofisa  o Tiute ia le Ofisa a Leoleo, e tusa ai ma ni vaega o fualaau faasaina, sa masalomia i se su’esu’ega na faia i le malaevaalele i Tafuna.

E tusa ai ma fa’amaumauga a le malo, na ta’ua ai le taunu’u mai i le malaevaalele o ni pusa se tolu mo Mark Atafua (lea ua molia) ma lana pisinisi o AMA technology.

Sa ta’ua e vaega su’esu’e a le Ofisa o Tiute, le taunu’u mai o se uta ia Oketopa 14, 2024, na aofia ai ma ni atigipusa se tolu, ma aveina atu i le ofisa a le ICS i Tafuna.

Ma o le taeao o le aso 15 o Oketopa, 2024, na o’o atu ai sui o le Ofisa o Tiute i le ICS e fai a latou tiute masani, o le siakiina o uta a le ICS lea na taunu’u mai i le po o Oketopa 14, 2024.

O le su’esu’ega o faamaumauga i pusa e tolu a Atafua, na maitau ai le iai o se tulaga faaletonu, ina ua ‘ese’ese ia pauna o lo’o i luga o fa’amaumauga, ma pauna sa fuaina e le vaega a le Ofisa o Tiute.

O le mamafa o pusa uma sa ta’ua i faamaumauga, na ta’i 27 kilokalama, ae peitai, ina ua fuaina i suesuega a le Ofisa Tiute, sa maua ai e 31 kilokalama le mamafa o le pusa mo se Sony speaker, 21.50 kilokalama le mamafa o se pusa mo se nofoa ofisa ae 29 kilokalama le mamafa o se pusa o se ‘printer’.  

Na ave’ese atu loa nei pusa mai i le ICS ma aveina atu i le Ofisa o Tiute i Tafuna mo le fa’aauauina o su’esu’ega.

E tusa ai ma fa’amaumauga a le malo, ina ua tu’uina nei pusa i totonu o le ‘scanner’, sa va’aia ai ni tulaga e pei o ni ao lanu meamata i totonu o atigipusa ma faia ai loa le faaiuga o le a taofia nei atigipusa i le Ofisa o Tiute mo le toe faia o nisi suesuega.

O Oketopa 16 na o’o atu ai se sui o le ICS i le Ofisa o Tiute i Tafuna ma na fa’ailoa ifo iai e le Supavaisa a le vaega su’esu’e a le Ofisa o Tiute, o le a faia seisi su’esu’ega auiliili ma o lo’o manaomia ona auai atu ai Atafua.

Ae peitai, na fa’aalia e le sui o le ICS le iai o Atafua i atunu’u i fafo, o lea na talosagaina ai le sui o le ICS ina ia molimauina su’esu’ega o le a faataunu’uina.

Ina ua tatalaina le atigipusa lea sa tatau ona iai le ‘printer’, na maua ai se ato pa’epa’e, o tusia ai le igoa o ‘ROSS’, ma na maua ai i totonu ia se vaega o le ‘printer’.  I totonu o lea vaega o le ‘printer’, na maua ai ni taga pepa iila se tolu, o iai ni vaega e pei o se suka.

Ae i totonu o le vaega o le masini e iai le ‘toner’, na maua ai se ato faatau, e iai le igoa o le ‘JCPENNEY’, ma o i totonu iina, na maua ai foi nisi taga pepa iila se tolu, o iai foi ni vaega e pei foi o se suka.

O le aso lava lea na agai atu ai ni sui malu o le malo ma molimauina ia tulaga sa maua i totonu o atigi pusa ma fa’ataunu’uina ai loa a latou su’esu’ega, e faamautuina ai po o ni vaega o fualaau faasaina, pe leai.

O le i’uga o nei su’esu’ega, sa faamautuina ai, o vaega o fualaau faasaina, o le Aisa.

Ua ta’ua foi i faamaumauga a le malo, e faapea, ia Oketopa 18, 2024 na fa’afeso’ota’i ai loa e leoleo ia le pisinisi o le AMA Technology, i Nuuuli ma saunoa ai ia Mark Atafua, ma talosagaina se latou feiloaiga, e talanoaina ai atigipusa ia ua i a’ao o le ofisa a leoleo.

O le aso lava lea na o’o atu ai Atafua i le ofisa a leoleo i Tafuna ma sa fa’ailoa iai e leoleo, e le o lokaina o ia ma e mafai ona ia malaga ese atu i so’o se taimi e finagalo ai, a’o fa’agasolo le latou fa’atalanoaga.

Na fa’ailoa atu iai e leoleo ia Atafua le mauaina o vaega o fualaau faasaina (Aisa) i totonu o se tasi o atigi pusa, e tolu, ia na lafo mai mai Kalefonia.  Sa faamaonia e Atafua ia le lafoina mai o nei atigipusa mai Kalefonia, ae peitai, e na te le iloa o lo’o taofi e le ofisa o Tiute ia ana atigipusa.

Sa fa’amanino foi e Atafua, o lo’o iai le faatagana i le ICS e piki ai ana atigipusa, pe a taunu’u i le teritori.  Ma e na te le iloa foi na maua se vaega o fualaau faasaina (Aisa) i totonu o sana atigipusa.  Na fa’aali atu iai e leoleo ia le ata o le atigipusa lea na aumai ai le ‘printer’ ma na faamaonia e Atafua, o lana masini lea.

Ae peitai, sa ta’ua e Atafua, ina ua ia pikiina mai lana masini mai i le faleoloa, sa na’o le tasi lava le ‘tape’ na faamau ai luga o le pusa, ae o le ua va’aia i le ata sa fa’aali atu ia te ia, le tele o isi ‘tape’ ua fa’aopoopo i luga o le pusa, ina ua mae’a ona ia lafoina mai.

Sa fa’amaonia foi e Atafua isi ana oloa sa i totonu o isi pusa e lua na lafo mai, aua o ni oloa sa fa’atauina i  luga o uepesite ma ia pikiina i se taimi mulimuli ane, i se faleoloa.

Ua taofi Atafua, ua iai se tagata ua na faia se tulaga taulamalama ia te ia, ona o le avea o ia ma sui tauva i le tofi Faipule i le palota i le 2024.

Sa mae’a le fa’atalanoaga o Atafua ma ia toe fo’i atu i lona aiga.

Ae o le aso 21 o Oketopa, sa fa’atalanoaina ai e leoleo ia se tasi o taitai o le ofisa o tiute, i le ofisa leoleo i Tafuna ma sa sainia ai e lenei lava ta’ita’i ia se faamatalaga tusitusia, na faamatala auiliili ai se la talanoaga ma Atafua.

Sa faamatala e le taitai o le ofisa o tiute e faapea, a’o iai le ua molia, i atunu’u i fafo, na valaau mai ia te ia mo se fesoasoani, ina ia tatalaina i tua ia atigipusa e tolu lea o lo’o taofia e le ofisa o Tiute mo suesuega.

Sa fa’aalia foi e le sui o le ofisa o tiute, o le aso 15 o Oketopa, sa ia maua ai se valaau mai ia Atafua, ma o se taimi muamua lea ua o la talanoa ai i luga o le telefoni.  Ma e le na’o le pau lea o le taimi na valaau mai ai le ua molia, i le aso lava lea, e talosagaina lana fesoasoani ina ia tatalaina i tua ia ana atigipusa.

Na fa’ailoa atu e le taitai o le ofisa o tiute i le ua molia, ua na’o se su’esu’ega masani o lo’o faia e vaega o Tiute i uta o lo’o aumai.

Ae o le taeao o Oketopa 16, na toe valaau mai ai le ua molia, mai i le numera e tasi, mai i atunu’u i fafo, ae na ta’ua e le taitai o le ofisa o tiute, ua ia le taliina le telefoni, ona o le taimi lea sa fai ai se fonotaga a le latou ofisa.

Ma na ia ta’ua foi le alu o lea aso o valavala’au mai lava le numera lea e tasi, ae ua ia musu e toe tali le numera lea, ina ua ia nofo manino i le tulaga ua o’o iai lea mataupu.

Ina ua fa’atalanoaina e leoleo ia le ua molia ia Oketopa 18, sa fa’aali atu iai ia te ia ia se numera telefoni sa lomia i luga o le ‘invoice’ a le ICS mo faamomoli, ma na fa’amaonia e Atafua, o lana numera telefoni lea.  Ma o le numera telefoni lea e tasi, sa fa’aaogaina e Atafua mai i atunu’u i fafo, e fa’afeso’ota’i ai le sui o le ofisa o tiute.

Ia Novema 20, 2024, sa fa’atonuina ai loa e le Faamasinoga Faaleitumalo ia le tatalaina o isi atigipusa po o faamomoli, sa i luga o le ‘invoice’ a le ICS.

Ma o le aso lava lea e tasi, na fa’afeso’ota’i ai e le ofisa a leoleo ia Atafua, e fa’ailoa iai le latou fuafuaga mo le tatalaina o isi ana atigipusa e lua o totoe.  Ae peitai, na tali mai Atafua, e le mafai ona auai mai ona o lo’o iai ni ona tuatuagia.

Ia Novema 22, 2024, na toe fa’afeso’ota’i atu ai e le Ofisa a Leoleo mai i le ofisa o tiute i le malaevaalele, ia le ua molia, e tusa ai ma le tatalaina o ana atigipusa e lua o totoe.  Ae sa tali mai Atafua, i sona talitonuga ua avea lenei fa’afitauli ma tulaga ua ta’uleagaina ai lona igoa ma lona tagata, ma e fa’ato’a ia nofo malamalama i lenei mataupu ina ua fa’ailoa atu e leoleo ia te ia, i le latou talanoaga ia Oketopa 18.

O le aso lava lea, na tapaina ai e le ofisa a leoleo ia atigipusa e lua e le’i tatalaina, a Atafua, mai i le ofisa o tiute i le malaevaalele, ma tatalaina ai loa i luma o sui o le ofisa o tiute.  Ae e le’i maua ai nisi tulaga e ono solia ai le tulafono.

E le i ta’ua i fa’amaumauga a le malo pe na ave faapagotaina ia Atafua, ma po o le a le aso na ave faapagotaina ai o ia, ma pe na molia o ia.  Se’ia vagana ai le lagolagoina o le Faatonuga aloaia mai i le faamasinoga, mo le avefaapagotaina ma le o’o atu o le ua molia, i luma o le faamasinoga.

Ae ua molia nei Atafua i faitauga o moliaga, e tolu, e aofia ai;

Faitauga 1:  Umia fa’asolitulafono o vaega o fualaau faasaina ma se faamoemoe e fa’atauina atu, o se vaega o solitulafono mamafa, e mafai ona lokaina ai i le va o le 5 ma le 20 tausaga, po o se sala tupe e $20,000; po o faasalaga uma e lua.

Faitauga 2:  Umia fa’asolitulafono o se vaega o fualaau faasaina (Aisa), o se solitulafono mamafa, e mafai ona nofosala ai i le falepuipui i le va o le 5 ma le 10 tausaga, po o se sala tupe i le va o le $5,000 ma le $20,000; po o faasalaga uma e lua.

Faitauga 3:  Auina mai i totonu o le teritori, i auala faasolitulafono, ia se vaega o fualaau faasaina (Aisa), o se solitulafono mamafa, e mafai ona lokaina ai i le o’o atu i le lima tausaga, po o se sala tupe e le silia ma le $5,000; po o faasalaga uma e lua.

E $60,000 le vaegatupe sa faatulagaina e mafai ona tatalaina ai le ua molia, mai i le falepuipui, e faatalitali ai lona faamasinoga.