Ads by Google Ads by Google

Le mafai tulaueleele va'alele & pasese i Ofu Manu’a


Manu'a Islands [ata: NPAS]

O le malaga a le Va’alele Twin Otter a le Samoa Airways na tu’uva’a ese atu mo Ofu Manu’a i le aso ananafi i le itula e 8:30 i le taeao na toe taliu mai i le Malaeva’alele fa’avaomalo i Tafuna, ua le mafai ona tulaueleele i le tetele o puao ua ufitia ai le ala sese’e o le Malaeva’alele i Ofu.

 

E ui ina puaoa i tatou iinei, ae le maua le puao to’a i Ofu ma ua le mafai ai ona iloa atu  e pailate le ala e sese’e ai, ma ua le mafai fo’i e la’ua ona fosi se laua fa’ai’uga ona o le soifua o le pasese o lo’o i o la’ua a’ao.

 

“O lea ua tatou toe fo’i mai i Tafuna nei, ia malilie fo’i outou le pasese, ana faapea e i ai lava se mea e mafai ona faia e tulaueleele ai le tatou va’a, e faia lea ma le mautinoa, ae ona o le tulaga o le saogalemu e ao ina fa’amuamua i mea uma lava, ua tatau ai ona toe taliu mai i tatou i fanua nei. E i ai lava taimi e mafai ai ona fa’ataunuu le tatou malaga.” O se tala lea a le ali’i pailate sa la’ua fa’afoea le va’alele i le malaga lea.

 

Ua le mautonu le pasese i se aso e toe vala’au mai ai le Ofisa Va’alele o le Samoa Airways ina ia fa’aauau le malaga lea. Ua le mautinoa fo’i pe toe totogi pasese pe leai fa’ato’a toe malaga ai.

 

Peita’i o lenei malaga ia alu i Ofu ua faato’a iloa ai, ua totogia au atopa’u e te fia alu ma oe. Afai e tasi lau ato, e te alu lava ma ta’ita’i i luga, ae lua loa au ato e ave la i le cargo ma totogi ese ona pauna.

 

O se tala mai a le aufaigaluega a le Samoa Airways, “Ua mafua ona totogia atopau ma uta uma lava, o lo ua pasia mai e le FAA faigamalaga a va’alele a le Samoa Airways i le va o Tafuna ma malae va’alele o le Manu’atele, ae leai ni fa’atagaga e ave fua ai nisi uta faaopoopo.”

 

O le pasese na malaga i lea uluai faigamalaga a le Samoa Airways, e toa 13 i latou e lua Matagaluega o le Malo sa tuu e faia latou semina fa’aauau mo tautua i le mamalu lautele o tagata o lo’o alaala tumau i Ofu, Olosega ma Sili.

 

O le vaega ale Land Grant i lana polokalama o le FCR ma le polokalama a le Tobacco Diabetes Coalition a le Matagaluega o le Soifua Maloloina. O lo ua fa’ailoa mai i le pasese, “Tusia lou suafa ma le telefoni e maua ai oe, e vala’au atu ina ia fa’ailoa atu le taimi tonu o le tatou malaga, ae o i tou aiga e vala’au atu lava.”