Ads by Google Ads by Google

Mae’a ona sua ma ua faalaugatasi le fanua mo le malae soka fou i Iliili


[ata: foa'i]

Pago Pago - AMERIKA SAMOA

Fai mai o se malaga o maila e selau, e amatalia i le ulua’i la’a.

E faapena foi le faatalitaliga o le malae soka fou, lea ua leva ona tatalia, a le Asosi Soka a Amerika Samoa (FFAS), lea ua fuafua e faia i tafatafa ane o le Stadium a le malo i Iliili, aua ta’aloga soka fa’avaomalo ma lotoifale.

O lenei male soka fou, ua fuafua e fausia i tulafono ma aiaiga faavaomalo a le FIFA.

 O le lona lua o malae soka, ua faamoemoe mo ta’aloga faalotoifale faapea ma toleniga a ‘au soka a le teritori ma e pei o le fausaga o le stadium a le malo, o le a faapea ona iai nofoa mo le aumaimoa, o fale le ta’ua ma fale e faatau ai taumafa, o potu e sui ai ‘au ta’a’alo ma potu mo ofisa a le asosi soka a le teritori.

O nei malae soka, e faitau miliona lona tau ma o lo’o faatupeina e le Asosi Soka Faavaomalo (FIFA), tauala mai i lana polokalama ua ta’ua o le ‘FIFA Forward’.  

Ae paga lea, ua fai sina umi o taofia lenei fuafuaga, a’o faatalia le faamae’aina o maliliega i le va o le FFAS ma le malo o Amerika Samoa, e tusa ai ma aiaiga o le lisi mo le fanua.

E le o mafai ona faamaonia mai ia ni ripoti i le tu’uina mai o le faatagana mo le fa’aauauina o le galuega, ona o lo’o fa’atalitalia le taunu’u mai a le Peresetene o le FFAS, le afioga ia Fai’ivae Iuli A. Godinet ma le Faatonusili ia Tavita Taumua, lea sa malaga atu i Bangkok, Thailand mo se fonotele a le FIFA, i le vaiaso ua tuanai.

Ae peitai, sa maitau e le Samoa News le mae’a ona faamamaina le laufanua ua faamoemoe e fau ai le malae soka, ma ua amata ona fa’alaugatasi le fanua mo le fausiaina o fale.

O lea galuega sa faatinoina e le kamupani a le Hollister General Services, ae peitai, na faamanino mai e nisi mai i le ofisa a le FFAS, e le i mae’a ona faia tauofoga, e saili ai se kamupani e faatinoina galuega mo lenei faamoemoe.

I se faatalanoaga a le Samoa News ma le afioga Fai’ivae ia Aukuso o le tausaga ua tuanai, sa ia fa’ailoa mai ai feutagaiga sa faia ma le malo mo le fanua uma lea o lo’o i tafatafa o le stadium aua le fausia o lenei faamoemoe, e aofia ai ma le faataunuuina ai o ni a’oa’oga ma o le a faapea ona fau ai ma ni fale e faamautu mai iai ‘au ta’a’alo mai atunu’u i fafo.

E lata i le $5 miliona le tau aofai o lenei faamoemoe, ma o le a faatupeina uma e le polokalama a le ‘FIFA Forward’, aua le atina’eina ma le fa’aleleia atili o lenei fa’agatama i totonu o le teritori.

Ae peitai, sa fa’aalia e Fai’ivae, o se taimi mulimuli ane na toe fa’ailoa atu ai e le malo le iai o se suiga i lenei fuafuaga ma ua vaeluaina ia le fanua lea ua faamama e le FFAS, mo lenei faamoemoe.  Ma o le fanua lea e latalata mai i le alatele, o le a fa’aaogaina e le malo, ae o le pito i totonu, o le a fa’aaoga e le asosi soka.

E le o manino mai po o le a le fuafuaga a le malo mo le fanua pito i le alatele, ae o lea sa ioe i le lisiina e le FFAS o le fanua atoa.  Ma sa saunoa Fai’ivae i le fa’ate’ia tele o i latou ma a latou fuafuaga, ona o le suiga mai i le malo.

Sa ta’ua e Fai’ivae, o lenei fuafuaga a le FFAS, o se meaalofa lea a le asosi mo tupulaga o le lumanai a Amerika Samoa, e le gata i latou o lo’o auai i lenei fa’agatama, ae faapea foi isi fa’agatama, aua o le a tatalaina le avanoa mo i latou, e latou te fa’aaogaina ai lenei malae ta’alo ma fale o le a fausia ai.

Ma sa ta’ua foi e Fai’ivae, afai ae le toe faafouina e le malo le latou lisi i le lumana’i, o lona uiga, o le a pulea e le malo nei mea uma o le a fausia e le latou asosi, ma o le a tu’uina atu mo le manuia o fanau talavou.  Aua o le faaiuga lava, e a le malo lea.

E ui i lea, sa fa’aalia e Fai’ivae le agaga faafetai ona o lenei ‘ele’ele ua o latou maua e mafai ona fau ai se malae soka mo a latou ta’aloga, e le gata i ta’aloga faalotoifale ae faapea foi ta’aloga faavaomalo.

Sa fa’amanino atili mai foi e le Faatonusili a le FFAS, ia Tavita Taumua, o le taua o lenei galuega, e mo le atina’eina o lenei fa’agatama i totonu o Amerika Samoa.  Ma e ui ua mae’a ona pasia le malae ta’alo i Pago Pago, ae peitai, o lo’o iai lava ni nai faafitauli o lo’o fetaia’i ma i latou, i Pago Pago.

Na ta’ua e Taumua le fa’aaloalo tele o le latou asosi i tulafono ma tapu a le afioaga i Pago Pago, e pei o a latou sa lea e fai i le 6:30 i afiafi uma, aua lotu afiafi.  Ma o le mafua’aga lea e tatau ai ona faamae’aina uma a latou fuafuaga, ae e le i taina le sa a le nu’u.

Ma o le mafua’aga foi lea e le o mafai ai ona fa’atutu ni moli tetele i le latou malae i Pago Pago, ona o le tausiga o le mamalu o le nu’u i afiafi taitasi.

Ae le gata i lea, e latalata tele le latou malae i Pago Pago, i le malumalu Katoliko ma e latou te fai ma le mafaufau ma le faaaloalo i polokalama a le ekalesia.

Ma o se tasi lea o tulaga o lo’o latou naunau ai lava e se’e mai le latou ofisa tutotonu i tafatafa o le stadium, ona o le a mafai ona faia a latou ta’aloga i le afiafi.