Pago Pago, AMERIKA SAMOA

E lua (2) tagi ua faila e le malo fa’asaga i le ali’i lea na pu’e faapagota i le masina na te’a nei, i le saoasaoa o lana ta’avale i luga o le alatele. O le tagi muamua e faatatau lea i fualaau faasaina na maua i totonu o le ta’avale ina ua sailia e Leoleo, ma le tagi lona lua e fesootai ma se mataupu na tula’i mai i le 2 tausaga talu ai, lea o lo o tu’uaia ai o ia i lona osofaia o se fale i Leone ae ave faagaoi ni mea aoga sa i totonu.

O le masina na te’a nei na tula’i ai Arona Filipo i luma o le Faamasinoga Faaitumalo mo lona ulua’i iloiloga. 

I le tagi muamua, ua molia ai Filipo i lona umia faasolitulafono o vaega o le pauta faasaina o le aisa; faapea ai ma le moliaga o le umia faasolitulafono o vaega o le pauta o le aisa ma le fa’amoemoe e faatau atu i isi tagata; o vaega ia o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, po o se salatupe e o’o atu i le $20,000; faapea ai ma le moliaga o le ave ta’avale ‘ona, lea e faasala ai se tasi i le Toese mo le umi e oo atu i le tasi le tausaga, pe faasala foi i se salatupe e o’o atu i le $1,000, po o le faasala fo’i i faasalaga uma ia e lua.

I le tagi lona lua a le malo faasaga ia Filipo, ua molia ai o ia i le moliaga o le talepe fale i le tulaga muamua ma le moliaga o le gaoi, e mafai ai ona faasala se tasi i le Toese mo le umi e o’o atu i le 7 tausaga, pe faasala I se salatupe e o’o atu i le $5,000, pe faasala foi i faasalaga uma ia e lua.

E $15,000 le vaega tupe lea ua fa’atulaga e le Fa’amasinoga e totogi ona faatoa mafai lea ona tatala Filipo i tua mai le Toese i Tafuna, e faatali ai taualumaga o lana mataupu.

Afai ae mafai ona tatala o ia i tua, ua poloaina Filipo e le Fa’amasinoga ina ia aua nei ona toe tagofia le ava malosi po o fualaau faasaina, e le mafai fo’i ona ia toe solia se tulafono a le malo, a ia avea o ia ma tagatanu’u e tausisi i tulafono i taimi uma. E le mafai ona toe taumafai e faafesootai molimau a le malo, e le mafai fo’i ona toe alu i le fale lea na ia osofaia i Leone.

E le i mana’o Filipo e fa’ataunuu lana ulua’i iloiloga lea na fuafua e faia i luma o le Faamasinoga Faaitumalo, e iloilo ai e le Fa’amasinoga mau a le malo, pe lava ma totoe mau e lagolago ai le tagi faasaga ia te ia, ae ua ia manatu e tuu sa’o atu loa lana mataupu i luma o le Fa’amasinoga Maualuga e fa’ataunuu ai sona faamasinoga autu.

O le masina fou lea ua faatulaga e toe tulai le ua molia i luma o le Faamasinoga Maualuga mo le isi ana iloiloga.

TAGI ALE MALO

O le afiafi o le aso 29 o Novema, na taofi ai e Leoleo se pikiapu lanu mumu i luga o le alatele i Avau, ona o le saoasaoa faapea ai ma le sese o le laisene sa faapipi’i i le pito i tua o le ta’avale.

E toalua tagata sa i totonu o le ta’avale, o le ali’i o lo o ia faafoeina le ta’avale faapea ai ma le tama’ita’i o lo o nofo i le nofoa o le pasese.  Na fesiligia e leoleo le ave ta’avale i lona igoa ma faailoa mai ai, o ia o Arona Filipo.

Ina ua fesiligia Filipo i lona laisene ave ta’avale, na tali le ua molia, o lo o galo i le fale lana ato tupe o lo o i ai uma ona ID e aofia ai le laisene ma le ID a le malo. Na siaki e Leoleo faamaumauga o le ta’avale i le Ofisa o Taavale Afi i Tafuna ma faamaonia ai, o le ta’avale o lo o lesitala i le igoa o Onosa’i Filipo, na mae’a fo’i le aoga o le laisene o le ta’avale i le tausaga ua te’a.  Ma o lea, e le tatau ona fealua’i le ta’avale i luga o le alatele, ma e le tatau fo’i ona faafoe e Filipo se ta’avale ona o le tulaga faaletonu i lona laisene ave ta’avale. 

Na faailoa e Leoleo ia Filipo, o le a taofia lana ta’avale i lalo o le vaaiga a Leoleo, ae o le a auina atu o ia ma lana pasese i le Ofisa o Leoleo i Tafuna mo nisi suesuega faaopoopo. Na malie le ua molia i le fautuaga a Leoleo.

A o le i auina atu le ta’avale i Tafuna, na muamua faia se suega faapitoa ina ia mautinoa e le o i ai ni aupega po o ni fualaau faasaina i totonu o le ta’avale. O lea suesuega faapitoa, na maua ai se paipa tioata sa i ai vaega o le pauta faasaina o le aisa.  Ma sa maua fo’I  i le nofoa i tua se tamai ato o lo o i ai ni pepa iila se lua sa i ai vaega o le pauta paepae o le aisa, faapea ai ma isi tamai pepa iila e masani ona fa’aaoga e utu ai le aisa ma faatau atu i tagata.

E leai ni fualaau faasaina po o ni aupega matautia na maua ia Filipo po o lana uo tamaitai i le taimi na sailia ai i laua e Leoleo.

Ina ua la taunu’u i le Ofisa o Leoleo i Tafuna, sa eseese potu na ave i ai Filipo ma lana uo tamaitai e fesiligia ai, ona o le manatu o Leoleo e le tatau ona tu’u faatasi i laua i le taimi o le suesuega. 

Na faailoa e le uo tamaitai a Filipo i Leoleo e faapea, na alu atu Filipo ma piki mai o ia i lona fale ma le faamoemoe la te tietie ma faasavili i le afiafi. Na muamua la afe i le nofoaga o Le Filifili ma faatau mai ai e Filipo fualaau faasaina i le $200 sa ia te ia, ma le faamatalaga a Filipo ia te ia, o fualaau faasaina e maua mai i le tupe lea na te toe faatauina atu i isi tagata ina ia maua ai sana tupe faasili.

A o la aga’i mai i luga o le alatele ma le faamoemoe e afe i se Fale’aiga e faatau ai se la mea’ai, ae faafuase’i ai loa ona taofi i laua e Leoleo i luga o le alatele i Faga’alu.

Sa na’o le pau le tali a Filipo I Leoleo e tusa ai o fualaau faasaina sa maua ia te ia, pau lava lona faanaunauga o lo o i ai, ia avea o ia o se tagata manuia. E le i tali Filipo i fesili a Leoleo po o fea na aumai ai fualaau faasaina sa maua i lana ta’avale.

TAGI O LE TALEPE FALE MA LE GAOI

A o faagasolo suesuega a leoleo, na alia’e ai i a latou faamaumauga se tusi saisai na sainia e le Faamasinoga i le 2018 e sailia ai Filipo, ona o tu’uaiga i lona osofaia o se fale i Ottoville, ia Setema 12, 2018, ma ave faagaoi le tele o mea aoga sa i ai, na aofia ai se masini uila mo galuega tau kamuta

O se molimau na te iloa lelei Filipo ma ana uo, na ia faailoa i Leoleo, o Filipo ma le isi ana uo na osofaia le fale o le aiga i Leone ma na ia faamatala atu e Filipo ia te ia le osofaiga o le fale ma gaoia mai ai ofu, seevae ma ni mea faigaluega kamuta.

O ni isi o mea faigaluega na faatau e Filipo e maua mai ai pia mo ia ma ana uo, e pei ona taua e le molimau i lana faamatalaga i Leoleo.

Ina ua  fesiligia e Leoleo ia Filipo e tusa ai o lenei mataupu, sa ia matua teena malosi ai lona aafia i le osofaiga sa faia i se fale i Ottoville.