Pago Pago - AMERIKA SAMOA

Ua fa’aalia mai e le susuga ia Paepaetele Mapu Jamias, le presetene o le Asosi Fusu a Amerika Samoa (ASBA), lona lagolago malosi i le finau a le Asosi Fusu Faavaomalo (IBA) e faasaga i le Komiti o Olimipeka Faavaomalo (IOC), e tusa ai ma a latou faaiuga sa faia i sailiga pine i fusuaga a tamaitai, lea sa faia i le Olimipeka na se’i mavae atu nei, i Paris.

Na saunoa Paepaetele, na mafua le fe’ese’esea’iga i le va o IBA ma le IOC, ona o ta’aloga olimipeka ia sa faia i Rio i le 2016, lea na tu’uaia ai nisi o faamasino i lo latou taliaina o tupe, e pei ona sa faamaonia mai e ni su’esu’ega tutoatasi.

Ma ua fa’asala ai e le IBA ia laufali uma sa a’afia i lenei mataupu ma faia ai sa latou lava su’esu’ega.  O lo’o su’esu’eina foi e le IBA ia nisi o tu’ua’iga o lo’o faasaga i nisi o a latou lava totino, o lo’o masalomia i le fa’aaogaina sese o tupe.

Na mafua lea faaiuga ina ua ta’ua e le IOC le fa’ata’apeina o le IBA, pe afai e le fa’amautuina ni suiga.

Ae ua tula’i mai nei le IOC e fa’afoeina taamilosaga fusu faavaomalo, i le Olimipeka i Iapani i le 2021 faapea ai ma ta’aloga na se’i mavae atu nei i Paris.

Peitai, o le tulaga ua atili le fiafia ai le IBA, ina ua toe filifilia e le IOC ia Umar Kremlev e avea ma Peresetene i le 2022.  O Kremlev, o alii faipisinisi mai Lusia, e iai ona sootaga i le faalapotopotoga a le Kremlin, lea na faasagatau i le IOC ma le Peresetene o Thomas Bach.

Ae o Iuni 2023, na palota ai le IOC e fa’ata’ape le IBA ina ia le toe avea ma sui o fusuaga polofesa faavaomalo.

Sa tali mai le IBA i lea faaiuga, o se faaiuga sese tele ma ua fa’aali mai ai le natura faapolokiki moni a le IOC.  Sa ta’ua foi e le IBA, e ui i le tele o lu’itau, ae ua tu’uto la latou asosi i le atina’eina o lenei fa’agatama ma le fa’asaoina o lona tutoatasi faapea le faatulagaina o ana ta’aloga faavaomalo.

Saunoa taitai o le IBA, o lo’o ia i latou le aia fa’aletulafono e fa’aauau ai pea le latou galuega ma ua nofo saunia e puipuia lea aia tatau i luma o so’o se faalapotopotoga.

Ma e ui ina ua fa’afoeina nei e le IOC ia fusuaga talu mai le Olimipeka i Iapani i le 2021, o lo’o fa’aauau pea ona faafoeina e le IBA ia fusuaga fa’avaomalo e pei o le sailiga siamupini faalelalolagi a tamaitai lea sa faia i Initia i le tausaga ua mavae, lea na a’afia ai ni tamaitai fusu se to’alua, ina ua pasia a la suega, e faamaonia ai po o la’ua o ni alii po o ni tamaitai.

I se faatalanoaga ma le Peresetene o le Asosi Fusu a Amerika Samoa, na ia saunoa ai e faapea, o le ‘a’ano moni o lenei mataupu, ona e le fa’atauaina e le IOC ia le saogalemu o tamaitai o lo’o fufusu ma i latou, e le o mautonu po o ni alii po o ni tamaitai.

Sa saunoa Paepaetele, na iloga le manino o lenei mataupu tau i le saogalemu o tamaitai fusu, i le fusuaga a Angela Carini mai Italia ma Imane Khelif mai i Algeria, lea na taofia ai e Carini le la fusuaga ina ua na’o le 46 sekone talu ona amata, talu ai le malosi o le tu’i a Imane, lea na motu ai lona ‘chinstrap’.

Sa faamatala ai e Carini i vaega fa’asalalau faavaomalo, le tiga pea o ona foliga ma lona isu ma le le mafai ona manava.  Ma sa ia mafaufau i lona aiga, ma ia tilotilo atu i lona tuagane o nofo mai i le aumaimoa, ma ia savali atu ai loa i lona tulimanu ma taofi le fusuaga.

Na ta’ua e Carini, fa’ato’a ia lavea lea i se tu’i sili ona malosi.  Sa le’i luluina foi e Carini le lima o Khelif ina ua sisi e le laufali le lima a Khelif, ae ua na’o ona to’otuli ifo ma tagi lotulotu.

Sa saunoa Paepaetele, o le fusuaga lea sa faalauiloa mai ai le mataupu i le saogalemu faapea ai ma le mataupu i tamaitai, i taimi e faatagaina ai alii i totonu o le maea fusu e fai ma a latou paga fusu.

Ua finau mai le susuga i le Peresetene, sa le’i pasia suega (gender) a Khelif ma Lin Yu-Ting mai i Taiwan, lea sa faia a la su’ega i Instabul i le 2022 ma Initia i le 2023, ma ua mae’a foi ona fa’alauiloa atu lea tulaga i le IOC, ae e le’i faia ta’aloga Olimipeka i Paris, ae peitai, e latou te le’i faia iai se fuafuaga, aua o le latou sini faatuina, ia talia so’o se tagata.

Sa saunoa foi Paepaetele, e le popole le IOC i le saogalemu a tamaitai po o le tulaga sa’o.  ae ua tali mai le IOC e ala i le taumafai e ta’uleagaina le suega lea e ta’ua o le ‘arbitrary test’, ma o latou faapea mai, o tulafono tau fusuaga i Paris, o tulafono lava ia e tasi sa fa’amamauina i Rio ma Tokyo, lea o lo’o e faatauaina ai le ‘sex’ o le tagata ta’alo, lea o lo’o i totonu o lana tusi folau.

Sa faamanino mai e le peresetene o le IOC la latou mau i lenei mataupu, i se feiloaiga ma vaega fa’asalalau ia Aukuso 2, 2024, lea sa ripotia mai ai e vaega fa’asalalau lana saunoaga e faapea, o lenei mataupu o fusuaga a tamaitai, e faatatau i ni tagata fufuse se to’alua sa fananau mai, o ni tamaitai, sa ola mai o ni tamaitai, o lo’o latou umia ni tusi folau e ta’ua ai i latou, o ni tamaitai, ma ua leva ona fusu, o ni tamaitai.  O le uiga moni lea o se tamaitai.

Na ia ta’ua foi, le leai o se taimi sa le manino ai le avea o i latou o ni tamaitai.  Ae o le tulaga ua va’aia nei, ua iai nisi ua foliga mai, ua fia avea ma tamaitai, ma o iina, sa valaaulia ai e le alii peresetene ia i latou nei, ina ia fa’ailoa mai se faamaninoga faasaienitisi, o le uiga fou, o se tamaitai.

Na ia saunoa foi e faapea, e faapefea e se tasi na fanau mai, tuputupu a’e, tauva ma umia se tusi folau o se tamaitai, ona le ta’ua o se tamaitai.

Ma na ia ta’ua foi le saunoaga a le tamaitai fusu mai Italia lea sa fusu ma le Algeria, o ituaiga fe’ese’eseaiga faapenei, e faanoanoa ai le agaga ma maua ai le loto alofa i lana paga fusu.

Sa fa’aalia foi e le alii Peresetene, o le agaga lea o le Olimipeka.  O le agaga fa’aloalo mo lau paga, pe faiaina pe malo.

Ae peitai, ua fa’amaonia mai e su’esu’ega fa’asaienitisi, sa fananau mai nisi o i latou o lo’o tauva i fusuaga a tamaitai, ma ‘XY chromosomes’ – lea e na o alii e maua ai – ae e a’afia i latou i le gasegase o le ‘Disorders of Sexual Development (DSD)’, lea e a’afia ai pepe i taimi e fananau mai ma itutino sa, e le tutusa ma o latou totoga faaletagata.

Na saunoa Paepaetele, se’ia vagana ai tagata i Algeria ma Taiwan faapea ma tagata ‘trans’ lea na tapua’i mo le tamaitai fusu mai Algeria, ae o le toatele o tagata o le lalolagi, na aofia ai ma ia, sa le fiafia i lea fusuaga.

Saunoa foi Paepaetele, e le tau avea se tagata ma saienitisi, e iloa atu i le vaai e tasi, le tino tama mai o le tamaitai fusu mai i Algeria ma afai ua faamaonia le iai ia te ia o le ‘XY chromosome’, e le tatau ona o la fusu ma se tamaitai.  Ma ia fa’aalia ai, na tatau i le IOC ona faia seisi vaega e fusu ai Khelfi ma Yu-ting, ona fa’ataga uma ai lea o ‘trans’, e tauva ai.

Na fa’aalia e le peresetene o le ASBA lona agaga fa’anoanoa i le IOC ona o le fa’atagaina o lenei tulaga, ma tu’uina ai se tulaga e ono a’afia ai soifua o tamaitai ma sa ta’ua foi e Paepaetele, o le fusuaga, o le fa’agatama pito sili ona mata’utia (dangerous) i totonu o fa’agatama pa’itino a le Olimipeka.

O manatu foi ia sa faaleoina e le peresetene o Komiti a Laufali a le IBA, le susuga ia Gabriele Martelli, lea na ia saunoa ai e faapea, o faaiuga faapenei e ono maliu ai se tasi.