Ads by Google Ads by Google

Fesiligia Faipule mafua’aga ua le tu’uina atu ai le Pone i luma Fono


[ata: foa'i]
ausage@samoanews.com

O le iloiloga a le Komiti o le Sailiga o Alamanuia a le maota o sui i le vaiaso nei, e fesiligia ai le pili a le faigamalo lea ua fa’amoemoe e totogi ai le pone e $50 miliona lea na aumai i le tausaga na te’a nei e fa’atupe ai nisi o gaioiga mo le Ofisa o Fesootaiga a Amerika Samoa (ASTCA), na fesiligia ai e Faipule le Teutupe a le malo, i le mafua’aga ua le tuuina atu ai le pone e pasia mai e le Fono lona fa’aaogaina.

 

O le Teutupe a le malo ia Ueligitone Tonumaipe’a ma le Faatonusili o le Ofisa o le Paketi a le malo ia Cathy A. Saelua na molimau i le pili. O le afioga i le ali’i faipule ia Tupua Shaun Va’a, o ia lea o le ta’ita’i komiti na fa’atautaia le iloiloga.

 

A o fa’agasolo le iloiloga, sa fesiligia ai e le afioga i le ali’i faipule ia Larry Sanitoa molimau a le malo, i le mafua’aga na ala ai ona le tuuina atu le pone e pasia mai e le fono lona fa’aaogaina.

 

Na tali Tonumaipe’a e fa’apea, o le faaiuga sa faia e lona Pule, o le afioga lea i le Kovana Sili o le malo ia Lolo Matalasi Moliga, ina ua mae’a ona soalaupule ma Ta’ita’i o le Fono Faitulafono i le tausaga na te’a nei, ina ua tula’i mai le manaoga mo se pone e fa’atupe ai nisi o auaunaga a le ASTCA.

 

Saunoa Sanitoa e fa’apea, e manino le Fa’avae ma le Tulafono, o le Fono Faitulafono o lo o i ai le malosiaga e pasia ai soo se tupe a le malo.

 

Sa ia taua atili fo’i e fa’apea, o loo manino i le pili o lo o talanoaina e le komiti, le tatau lea ona tuuina mai i luma o le fono o soo se tupe fou e pasia atu ai lona fa’asoasoaina.

 

Na lagolagoina e le afioga i le Faipule Tama’ita’i ia Andra Samoa le finagalo o Sanitoa ma ia saunoa e fa’apea, i lalo lava ia o le Fa’avae ma le Tulafono, o le Fono o loo i ai le malosiaga e pasia ma faasoasoa ai soo se alagatupe fou e ulufale mai i totonu o le malo.

 

Saunoa le afioga i le ali’i faipule ia Gafatasi Afalava e fa’apea, e o o lava fo’i i lona sui faipule na te le o manino i le auala o lo o fa’aaoga i ai le tupe e $50 miliona o le pone lea na fa’atoa maua mai i le fa’aiuga o le tausaga na te’a nei.

 

Na tali Tonumaipe’a e fa’apea, o le tupe o le pone e pei ona fesiligia, o lo o aofia ai le $15 miliona lea na tuuina atu i le ASTCA e totogi ai le sao o le malo mo le uaea o fesootaiga i lalo o le sami, le Hawaiki cable.

 

I le pili e pei ona talanoaina i luma o le Komiti, o lo o taua ai le siitaga e 2 sene mo le totogi o le suauu e ulufale mai i le atunu’u, ma le fa’amoemoe e fesoasoani i le toe totogiina o le pone e $50 miliona.

 

Na manino i ripoti sa tuuina atu i luma o le Komiti, e tatau ona $800,000 le tupe e maua mai e le malo i le tausaga mai le si’itaga e 2 sene, peita’i na taua e le Teutupe i lana saunoaga, e $400,000 le tupe e tatau ona maua mai.

 

O le eseesega o fuainumera sa tuuina atu e le Teutupe ma numera o loo i totonu o ripoti, na mafua ai loa ona tele fesili a afioga i Faipule e uiga i lenei mataupu.

 

Na fesili le afioga i le ali’i faipule ia Loia Gutu i le mafua’aga ua eseese ai fuainumera ua tuuina mai i luma o le maota, ae na saunoa Tonumaipe’a e fa’apea, o lana tali sa tuuina mai i le komiti, o loo faavae mai lea i luga o numera sa tuuina atu e lana aufaigaluega ia te ia. Sa ia taua atili fo’i e fa’apea, o lana aufaigaluega sa faia le suesuega o lenei mataupu, ma latou tuuina atu ai loa fuai numera e pei ona ia fa’asoa i luma o le Komiti.

 

E le i nofo lelei i le finagalo o le afioga a Loia le saunoaga a le Teutupe. Saunoa Loia e fa’apea, e le tatau i le Teutupe a le malo ona tu’u tia’i le galuega e fa’atino e lana aufaigaluega, ae tatau lava ona ia fa’atinoina le suesuega, ina ia faigofie ai fo’i ona ia malamalama i ana tali e tuuina mai i luma o le Fono.

 

Na lagolagoina e le afioga i le Sui Fofoga Fetalai ia Fetu Fetui Jr le saunoaga a Loia, ma ia taua ai e fa’apea, e le tatau i le Teutupe ona saunoa i nei ituaiga saunoaga faapenei.

 

“O lau saunoaga lea ua e faapea mai ai o numera lava na tuuina atu e lau aufaigaluega, e matua le talafeagai lava i la’u faalogologo atu. E le o ni saunoaga na e saunoa i ai se ta’ita’i,” o le saunoaga lea a Fetu.

 

Ina ua fesiligia le tulaga o tupe maua a le malo poo lelei, na saunoa ai le Teutupe, e eseese lava le tulaga e i ai tupe ao a le malo i masina ta’itasi. O isi masina ua malosi ma lelei ae o isi fo’i masina ua vaivai ma le lava.

 

Ae soo se taimi lava e le lava ai tupe maua a le malo, e fautuaina ai e le Teutupe le Ofisa o le Paketi, ina ia fa’aitiitia tupe fa’aalu a le malo ina ia mafai ona fetaui ma tupe maua mai.

 

O se tasi o fautuaga sa tuuina atu e le komiti i le Teutupe, o le auala e fa’amalosia atili ai le aoina mai o tupe a le malo, e le gata i Tutuila nei ae fa’apea fo’i ma Manu’a.

 

Saunoa le afioga i le ali’i Faipule mai le Itumalo o Manu’a #2 ia Tiaoalii Fauagiga Sai, e tatau ona i ai se Ofisa o Tupe a le malo i Manu’a mo le aoina mai o tupe a le malo o lo o maua ai, ona o le tulaga o lo o maitauina i le taimi nei i Manu’a, o tagata faigaluega a le Ofisa o le Kovana o lo o fa’atinoina lea tulaga, ma o lo o fesiligia fo’i le fa’amaoni o le auala o lo o fa’atino ai lea auaunaga.

 

Saunoa le Teutupe e fa’apea, o lo o fa’amaoni lava le faatinoina o le aoina mai o tupe a le malo mai Manu’a, ae o le a vaavaai toto’a i le fautuaga ina ia fa’aleleia atili lea auaunaga mo lona Ofisa.

 

Na fesili le Ta’ita’i Komiti ia Tupa i le mafua’aga ua maualuga ai le tupe maua mai i le suauu i le masina o Fepuari na te’a nei, fa’atusatusa i isi masina ua mavae atu faapea ai ma le masina o Fepuari o isi tausaga ua tuana’i.

 

O le tele o masina e i le va o le $2.5 miliona i le $2.7 miliona le tupe e o mai i le suauu, peita’i e $4.2 miliona lea na maua mai i le masina o Fepuari na te’a nei.

 

Saunoa le Teutupe e fa’apea, na maua i suesuega a lona Ofisa, e tele le tupe sa nofo aitalafu ai le kamupani o loo aumaia le suauu i le atunu’u, le Pacific Energy e le i mafai ona tuuina mai i le malo.

 

O le faaiuga la o le suesuega, na manino ai, e tusa ma le $1.7 miliona e le i totogiina mai i le tele o masina ua mavae atu, lea la na faaopoopo ai loa le tupe lea i le tupe e masani ona maua i masina ta’itasi, ma mafua ai loa ona maualuga le tupe na maua mai i le masina na te’a nei.

 

Ua faamoemoe le Komiti e palota i le faitauga fa’alua o le pili i se aso o le vaiaso nei, pe afai e mae’a ona toe fa’asao mai e le malo fuainumera i le aofa’i sa’o o le tupe e maua mai i le siitaga fou e 2 sene.