Pago Pago, AMERIKA SAMOA - O le mataupu e faatatau i le sui tamaitai a le FEMA lea na toe faafoi e sui o le Matagaluega o le Soifua Maloloina i le vaiaso na te’a nei, ina ua masalomia le aafia o ia i le gasegase o le COVID-19, na alia’e ai ni isi o faasea mai afioga i Faipule i le tumau pea lea o le malu puipuia o le atunuu mai lenei faama’i oti.

O le mataupu la lenei na mafua ai loa ona valaau e le afioga i le Fofoga Fetalai se iloiloga faapitoa ma le Komiti Faafoe o loo gafa ma tapenaga mo puipuiga o lenei faama’i, ina ia oo atu i luma o le Maota e faamanino i Faipule tulaga uma e uiga i lenei mataupu.

[O le a faailoa atu i le isi lomiga a le Samoa News i le vaiaso nei se ripoti e tusa ai o le iloiloga i le va o le Komiti Faafoe ma afioga i Faipule]

O le afioga i le alii Faipule mai Manu’a ia Vesi Talalelei Fautanu Jr na tulai ma fesiligia i lenei mataupu i le taimi o folafolaga a le Maota o Sui.

Saunoa Vesi e faapea, e tusa ai o se ripoti ua ia maua, e to’atolu tagata na malaga mai i le va’alele a le FEMA lea na taunuu mai i le aoauli o le aso Faraile o le vaiaso na te’a nei i le malae vaalele i Tafuna. O i latou e to’atolu e aofia ai se sui tamaitai o le FEMA, faapea ai se alii Faipule o le maota ma lona faletua. 

O lea faipule, o le afioga a Faimealelei Anthony Fu’e Allen ma lona faletua.

O le itu e sili ona popole ai e pei ona saunoa Vesi, o le sui tamaitai o le FEMA lea na malaga mai ma toe faafo’i ai lava i le vaalele na sau ai, na aafia muamua o ia i le siama o le faama’i o le coroavirus i le masina o Iuni o le tausaga nei, e ui na toe faia le isi ana suega i ni nai vaiaso e lei mamao atu nei i Hawaii ma faamaonia ai, e le o aafia o ia i le siama.

Na taua e Vesi le toatele fo’i o nisi o le atunuu ua latou fesiligia lenei mataupu ona o popolega i le ono avea le malaga mai o le sui tamaitai o le FEMA ma auala e ono pipisi ai le siama i le atunuu.

Saunoa Vesi e faapea, na matua faateia o ia i le faaiuga na faia ina ia malaga mai lenei sui tamaitai o le FEMA i le atunuu, e ui sa aafia muamua o ia i le siama o lenei faama’i. 

“O lo’u popolega i lenei mataupu, ona o lea sa malaga faatasi mai lenei tamaitai o le FEMA ma le afioga i le Faipule ma lona Faletua, ina ne’i avea ma auala e pipisi ai siama o lenei faama’i i si o tatou atunuu,” o le saunoaga lea a Vesi.

Saunoa atili Vesi e faapea, e le o manino mai foi i le taimi nei le mafuaaga na ala ai ona malaga mai le afioga i le Faipule ma lona faletua i luga o le va’alele a le FEMA, a o lea o loo taoto le tulafono na faatulai e le afioga i le Kovana ia Lolo Matalasi Moliga e taofia ai femalagaaiga i le va o Amerika Samoa ma Hawaii, ona o taumafaiga lava ina ia puipuia le atunuu mai lenei faama’i.

Na lagolagoina e ni isi o faipule o le maota le mataupu na fesiligia e le afioga a Vesi. 

Saunoa le afioga i le Faipule mai Pago Pago ia Vesiai Poyer Samuelu ma ia taua i luma o le Maota lona popolega o lo o i ai i lenei mataupu, ona o lea ua ave i latou  na malaga mai i le vaalele e taofia faapitoa i le Fale Talimalo o le Tradewinds, ae o le nofoaga lea o loo toatele le atunuu o loo autova’a atu i ai.

Saunoa Vesiai e faapea, o le faaiuga o le vaiaso na te’a nei na totogi ai le potu a lana fanau e nonofo ma tafafao ai i le Fale Talimalo. Sa maua ai foi ma le avanoa e taeele ai latou i le swimming pool a le Fale Talimalo, ae o le itu na faateia ai o ia, ona o lea faatoa ia maua tala e faatatau i tagata na malaga mai i le vaalele a le FEMA lea o loo taofia ai foi i le Fale Talimalo.

Saunoa atili Vesiai e faapea, e toatele le mamalu o le atunuu o loo autovaa atu i le Fale Talimalo mo malologa ma tafaoga, atoa ai foi ma tagata faigaluega o loo galulue ai i lea nofoaga. 

Na toe tulai Vesi ma lagolago i le saunoaga a le afioga a Vesiai e faatatau i le toatele o tagata o loo autova’a atu i le Faletalimalo e pei o le atunuu, tagata faigaluega e aga’i atu i le Fale’aiga, faapea ai ma tagata faigaluega o loo galulue ai i le Fale Talimalo.

Na tulai le afioga i le alii Faipule ia Gafatasi Afalava ma taua lona popole tele pe afai o le tulaga tonu lea na oo i ai le malaga a le va’a a le FEMA i le faaiuga o le vaiaso. Saunoa Gafatasi e faapea, o loo manino i faamatalaga feaveai e faatatau i le gasegase o le coronavirus, e vave tele ona aafia atu ai ma tagata matutua i le siama lenei pe afai e le lelei ona puipuia.

E le i nofo lelei i le finagalo o le Fofoga Fetalai lenei mataupu. Na fesili Savali ia Vesi, o ia o le Taitaifono o le Komiti o le Soifua Maloloina a le maota, pe moni ripoti e faatatau i tagata faigaluega a le Fale Talimalo o loo galulue i le puipuia o tagata na malaga mai i le vaalele a le FEMA, ae poo fea o i ai tagata faigaluega faapitoa a le Soifua Maloloina na tofia faapitoa e gafa ma le vaaia o tagata nei, atoa ai ma le puipuiga malu a Leoleo ina ia mautinoa e leai se isi e sao atu i nei nofoaga.

Saunoa Vesi e faamanino, o le tulaga tonu lena o loo i ai, o tagata faigaluega faapitoa a le Matagaluega o le Soifua Maloloina o loo galulue ai i le Fale Talimalo, atoa ai ma i latou uma ua tofia faapitoa mo lenei galuega.

E tusa ai ma le ripoti na maua e le Samoa News e faatatau i le malaga a le vaalele a le FEMA, na taua ai le malaga mai ai o le tamaitai mai Florida faapea ai le afioga i le alii Faipule ma lona faletua. 

O le tamaitai lenei e galue o se konekarate mo le vaega a le FEMA. O le aso 15 o Iuni na faamaonia ai i se suega sa faia i lea tamaitai i le setete o Florida le aafia o ia i le virusi o le corona. Ae o le 2 vaiaso mulimuli ane ai i le aso 29 o Iuni, na toe faia ai le isi suega ma faamaonia ai, ua leai se siama o le virusi i lona tino.

Na faatoa maua e Foma’i a le Matagaluega o le Soifua Maloloina i le malae vaalele faamatalaga e uiga i lenei tamaitai, ma faia ai loa e Foma’i e to’atolu le faaiuga ina ia toe faafo’i lenei tamaitai i le va’alele, e le i maua se avanoa e ulufafo mai ai o ia i le vaalele. 

O i latou sa fesootai ma lenei tamaitai e pei o le afioga i le Faipule ia Faimealelei ma lona faletua, atoa ai ma se sui o le kamupani tumaoti e gafa ma le faia o siaki mo le malu puipuia o le vaalele i le taimi e taunuu mai ai, na auina atu faatasi ai foi ma ia ina ia taofia mo le 14 aso.

Ua taua i ripoti le malu puipuia o le afioga i le alii Faipule, o lona faletua faapea ai ma le tagata faigaluega sa i ai i le malae vaalele. O loo faagasolo pea siaki masani a le Soifua Maloloina ina ia mautinoa o loo malu puipuia tulaga uma i lo latou soifua maloloina.

E toatele isi o le atunuu na faaalia o latou finagalo le fiafia atoa ai ma le popole e faatatau i lenei mataupu, ina ua alia’e ripoti e faatatau i le alii Faipule ma lona faletua na malaga mai ai i le va’alele. 

Na taua e se tasi o Tamalii o le atunuu i le Samoa News e faapea, e tatau i le Kovana ona faamalosia le tulafono e taofia ai soo se tagata e ulufale mai i le atunuu i vaa a le malo, tusa lava poo lea tagata o se taitai o le atunuu.