Ads by Google Ads by Google

Falepuipui le stepfather i le faia o uiga mataga i lona afafine fai

ausage@samoanews.com

E 7 tausaga i le Toese lea ua faasala ai e le Faamasinoga Maualuga se Tama e 50 tausaga le matua, ina ua faamaonia moliaga o lona faia o uiga mataga i lona afafine fai e 16 tausaga le matua sa tu’uaia ai o ia e le malo.

 

I le tuuina atu ai o le faaiuga a le Fa’amasinoga, na manatu ai le Fa’amasinoga, e leai se isi faasalaga pito sili ona talafeagai mo le ua molia, nai lo le tuuina atu i ai o le faasalaga faa falepuipui e pito sili ona maualuga o lo o faatulaga mai e le Tulafono, e le gata ia aoaoina ai e le ua molia se lesona taua mo lona olaga, ae avea foi o se auala e momoli atu ai le feau i isi fo’i o lo o faia lenei amioga, e le manatu mama le Faamasinoga i ituaiga solitulafono faapenei.

 

[Talu ai puipuia i le ono mafai ona silafia e le toatele le tamaitai na aafia i lenei mataupu, ua le mafai ai e le Samoa News ona faailoa le igoa o le alii o loo aafia i lenei solitulafono]

 

Talu mai le taimi na pu’e faapagota ai e Leoleo le alii ua molia, na taofia ai pea lava o ia i le Toese i Tafuna ina ua le mafai ona ia totogi le $30,000 sa faatulaga e tatala ai o ia i tua. O le vaiaso na te’a nei na tula’i ai le ua molia i luma o le Fa’amasinoga mo le lauina o lana fa’asalaga.

 

E 2 tagi eseese na ulua’i tu’uaia ai e le malo le ua molia. I le tagi muamua, e 22 moliaga sa tu’uaia ai o ia e le malo. O ia moliaga e aofia ai moliaga e 5 o le faiaiga ma se tamaitai e talavou i lalo o le tulafono; tasi le moliaga o le faia o faia o uiga faasotoma; ma moliaga e 8 o lona tagofia o itutinosa o se tamaitai e talavou i lalo o le tulafono.

 

I le tagi lona lua a le malo, na tu’uaia ai le ua molia i le moliaga o lona umia faasolitulafono o vaega o le pauta faasaina o le aisa.

 

Ae i lalo o se maliliega na sainia e le alii ua molia ma le malo, lea fo’i na talia e le Faamasinoga Maualuga i le amataga o le tausaga nei, na malie ai le ua molia e tali ioe i le solitulafono o lona tagofia lea o itutinosa o se teineititi e 16 tausaga le matua e aiga i ai, e aunoa ma se faatanaga faaletulafono, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala fo’i i faasalaga uma ia e lua.

 

I le tali ioe ai o le ua molia i le moliaga e pei ona ta’usala ai o ia e le Fa’amasinoga, sa ia ta’utino a e faapea, i le va o le masina o Ianuari e oo atu ia Aukuso o le tausaga e 2018, sa la faiaiga ai ma lona afafine fai e 16 tausaga le matua. O nofoaga na ia faatinoina ai nei solitulafono e aofia ai lo latou fale, o lana fale faigaluega i Tafuna, faapea ai ma totonu o lana ta’avale. Sa ia taua atili fo’i e faapea, o le la mafutaga faaleulugalii ma lona afafine fai na faia mo le umi e 10 masina, sa malie atoatoa i ai lona afafine fai.

 

Ina ua maua le avanoa o le ua molia mai le Fa’amasinoga, sa ia faatoese ai loa e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i tua e mafuta i lona aiga. Sa ia faatoese faapitoa i lona afafine fai na aafia i lenei maupu, ina ia faamagalo sona sese, atoa ai fo’i ma lona to’alua, e tusa ai o lana solitulafono ua faia.

 

Sa ia faailoa i le Fa’amasinoga e faapea, o le faafitauli o lona tagofia o fualaau faasaina, lea ua mafua ai ona aafia lona olaga ma lona aiga.  Talu lava le taimi na ia tagofia ai fualaau faasaina, o iina na amata mai ai loa faaiuga sese i lona olaga, seia oo lava ina tula’i mai le faalavelave e pei ona aafia ai o ia i le tulafono.

 

Na talosaga lana loia fautua i le Faamasinoga mo se faasalaga feololo mo ia, ina ia maua ai le avanoa e toe fo’i atu ai i tua e mafua i lona to’alua ma lona aiga. Na taua e le loia fautua le salamo moni o le alii ua aafia mai lana solitulafono, e i ai fo’i lona talitonuga maualuga e le toe tula’i mai se isi solitulafono i le lumana’i.

 

Na tete’e malosi le loia a le malo mo se faasalaga mama. Na taua e le itu a le malo e fa’apea, e tatau ona tuu atu se faasalaga pito mamafa i le alii ua molia, ona o le matuia o lana gaioiga sa faia.

 

Na faatepa foi e le loia a le malo i le Faamasinoga tuutuuga o le maliliega sa sainia e itu e lua, lea e aofia ai le solofua o moliaga pito mamafa sa tu’uaia ai le ua molia, atoa ai ma le tagi atoa o lona umia faasolitulafono o fualaau fa’asaina o le aisa.

 

A o le i tuuina mai le faaiuga a le Fa’amasinoga, na maua le avanoa e toe faatepa ai e le Fa’amasinoga itu e lua o lenei mataupu i mau faamaonia na manatu le malo latou te folasia i le taimi o le faaamasinoga autu o lenei mataupu.

 

MAU FAAMAONIA

 

O lenei mataupu na tofu atu i le Ofisa o Leoleo ina ia alia’e mai se faalavelave na faaoolima ai le ua molia i lona to’alua i le masina o Aokuso 2018. O le vevesi na mafua mai ina ua taumafai le Tina o le aiga e fesiligia le ua molia e faatatau i le la mafutaga faaleulugalii ma lana tama e 16 tausaga le matua, ae na avea ma itu na ita ai le ua molia ma fasi ai lona to’alua.

 

Na taua e le tama’ita’i na aafia i Leoleo, o le ua molia lava na mafua ai ona tula’i mai le mafutaga faaleulugalii i lo la va, ina ua faamalosi e le ua molia o ia i totnou o lona potu i le masina o Ianuari o le 2018, ma amata mai ai loa iina le la mafutaga.

 

Ua faatele ona ia faailoa i lona Tina uiga ma mea sa tutupu i lo la va, ua faatele fo’i ona talanoa lona Tina i le ua molia e tusa ai o lenei mataupu, peita’i sa matua teena malosi e le ua molia nei tu’uaiga, ae faaauau pea lana amio o le alu atu i lona potu i le tele o po ma tauanau oia la te momoe, afai e musu, na te folafola lona fasiotia o ia.

 

FAAIUGA A LE FA’AMASINOGA

 

E manatu le Faamasinoga, o le gaioiga sa faia e le ua molia, e matua matuia lava, ona o le umi o le taimi na faatino ai le mafutaga faaletulafono ma lona afafine fai. E ui i le faatuatuaga sa tuuina atu e lona afafine ia te ia, peita’i na avea lea faatuatuaga ma itu na le manatu mamafa ai le ua molia i ona tiute faa Tama i totonu o le aiga.

 

O lana gaioiga e pei ona saunoa le Fa’amasinoga, ua atagia mai ai, o ia o se tagata e mata’utia, e faaeteete gata ai fo’i le saogalemu o fanau tama’ita’i talavou i totonu o le atunu’u. O le tele o taimi e tutupu mai ai faalavelave faapenei, e tuuina atu lava e le Faamasinoga faasalaga e le gata e aoaoina ai i latou ua aafia, ae momoli atu ai fo’i le feau i isi tagata o loo faatino faalilolilo nei ituaiga solitulafono, e matua le talia lava e le Faamasinoga nei ituaiga amioga ona alia’e mai i totonu o aiga.

 

O le faasalaga a le faamasinoga, e 7 tausaga e nofosala ai le ua molia i le Toese i Tafuna, faapea ai ma le salatupe e $2,000. Ua faatonu e le Faamasinoga le sponsor a le ua molia ina ia totogi le salatupe ua poloaina.