O le afiafi nei e fa’ataunu’uina ai pesepesega o le Kerisimasi i lalo o le polokalama fa’aletausaga o le Kerisimasi a le ofisa o le Arts Council, o lo’o galulue fa’atasi ma le Matagaluega o Tupulaga ma Tamaitai (DYWA).

O le aso 15-17 o Tesema sa uluai fa’atulaga ai lea polokalama a le Arts Coucil, ae sa taofia e Kovana Lolo Matalasi Moliga, talu ai lana poloaiga fa’alauaitele i le aso 8 o Tesema, ona ua fa’amaonia le pepese o le misela i Amerika Samoa.

O se vaega o lea poloaiga sa fa’asaina ai fa’atasiga o tagata i nofoaga faitele, ma sa aofia ai ma le polokalama a le Arts Council.

Ae o le aso 16 o Tesema sa faia ai suiga a le kovana i lana poloaiga, ma fa’atagaina ai fa’atasiga a tagata lautele i nofoaga faitele.

I le fonotaga a le kapineta i le aso Gafua o le vaiaso lenei, sa fa’ailoa ai e Lolo suiga i lana ulua’i poloaiga ma o lea ua mafai ai nei ona fa’aauauina le polokalama a le Arts Council, ina ua ma’ea ona fono le kovana ma totino o le Komiti Fa’afoe a le Arts Council.

Saunoa le kovana sili, ua tigaina ma tele taimi sa faia ai sauniuniga a autalavou ma ekalesia mo lea fa’amoemoe, ma ua tatau ai loa ona fa’ataunu’uina.

E pei ona fa’aalia i le polokalama, o le a fa’ataunu’u pesepesega ma fa’aaliga o le Kerisimasi a le Arts Council i le Fagatogo Pavilion, i le Malae o le Talu i Fagatogo. E tolu po ua fa’atulaga ina e amata i le afiafi nei i le itula e 6p.m. - Tesema 15 e oo atu ia Tesema 17.

O le afiafi nei o le a saunoa fa’apitoa ai le afioga i le kovana sili, soso’o ai male ti-ina o moli o le laau Kerisimasi, e le faletua o le kovana, Cynthia Malala Moliga.

E 14 fa’alapotopotoga, e aofia ai ekalesia ma autalavou, e fa’afiafia i le afiafi nei, ma e tala-malae ai le Pago Pago CCCAS Choir, soso’o ai ma Vaitogi CCCAS Youth ae fa’aiu i fa’afiafiaga a le Sosaite o Fa’afafine i Amerika Samoa (SOFIA).

O le po o le aso 20 o Tesesma e 13 fa’alapotopotoga e fa’afiafia, ae o le po mulimuli, Tesema 21, e 14 i latou ua lautogia e fa’afiafia ai. Ma o le afiafi foi lea e saunoa ai le afioga i le Lutena Kovana, Lemanu Palepoi Sialega Mauga e fa’aiu ai lenei fa’atasiga.

O le polokalama a le Arts Council o lo’o lagolago sua i ai vaega uma o le malo, fa’atasi ai mase vaega tupe mai le National Endowment for the Arts.

Valaaulia le mamalu o le atunu’u e auai i lenei polokalama, e fa’amanatuina ai le Fanau mai  le Mesia.

O lomiga a le Samoa News i le lumana’i o le a auaina atu nisi o ata o pesepesega. Ma o le loia o nei ata i le Samoa News, o lo’o sapaia ma lagolagoina e le kamupani a le Pentagon Samoa, ma ana kamupani eseese i le atunu’u.