Ads by Google Ads by Google

Faasala i le Toese tama’ita’i e to’alua na la gaoia tupe mai le TMO

ausage@samoanews.com

Ua fa’asala i le Toese i Tafuna tama’ita’i e to’alua ia na ta’usala i lo la taupulepule e faia ni gaioiga e gaoia ai se vaega tupe tele e tusa ma le $70,000 mai le Kamupani o le Tautua Mo Oe (TMO) sa la galulue ai mo le tele o tausaga.

 

E ta’i 12 masina lea ua fa’asala ai e le Fa’amasinoga Maualuga i laua i le Toese i Tafuna, e aofia ai ma le 9 masina lea ua mae’a ona la tuliina talu ona taofia i laua e fa’atalitali ai le faaiuga o lenei mataupu.

 

Lona uiga, toe ta’i 3 masina e tuli e i laua nei i le Toese i Tafuna, ona tatalaina loa lea o i laua i tua.

 

O le vaiaso na te’a ne na tutula’i ai Malia One ma Inosiaolouaiga Pauga i luma o le Fa’amasinoga mo le lauina o le la fa’asalaga. O le ali’i loia sili lagolago ia Doug Lowe na tula’i mo le malo, ae o le ali’i loia fautua lagolago ia Rob McNeill na tula’i mo i laua ua molia.

 

Talu mai le taimi na taofia ai One ma Pauga i le Toese i i le tausaga na te’a nei, sa i ai pea lava i laua i totonu o le Toese, ina ua le mafai ona la totogi vaega tupe sa fa’atulaga e tatala ai i laua i tua.

 

Na ulua’i molia i laua nei e to’alua i moliaga mamafa e 2 o le gaoi atoa ai ma le ave faagaoi o ni tupe sa tu’uina atu la te vaavaaia ma tausia lelei. Ae i lalo o le maliliega na sainia e i laua nei ma le malo, lea fo’i na talia e le Fa’amasinoga i le masina o Iulai na te’a nei, na malilie ai One ma Pauga la te tali ioe i le moliaga lea na toe teuteu e le malo, le moliaga o le taupulepule lea e fa’atino le solitulafono o le gaoi, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

 

I le tali ioe ai o One ma Pauga i le moliaga e pei ona ta’usala ai i laua e le Fa’amasinoga, na la ta’utino ai e fa’apea, i le va o le aso 1 o Ianuari e oo atui le aso 30 o Setema 2018, na la taupulepule ai e fa’atino ni gaioiga faasolitulafono a o galulue ai mo le TMO Inc, ina ia la gaoia ai ni tupe mai le kamupani.

 

Na ta’utino One e fa’apea, i le aotelega o le gaioiga sa ia faia, na ia ave faagaoi ai le tupe e tusa ma le $37,431.77, ae na ta’utino Pauga e fa’apea, i le aotelega o lana gaioiga sa faia, na ia gaoia ai le tusa ma le $33,381.35.

 

Ina ua tuuina atu le avanoa mo i laua nei e to’alua, na la faatoese ai loa i le Fa’amasinoga aemaise ai le malo o Amerika Samoa ona o le solitulafono sa laua faia. Na faapitoa le la faatoesega i le Pulega a le TMO Inc, ona o le solitulafono sa laua faia ua aafia ai le kamupani.

 

Na taua e One i lana faatoesega e fa’apea, o lona mana’o tele atoa ai ma lona manatu faapitoa ua mafua ai ona ia faia lenei gaioiga. Sa ia tuuina atu le fa’atuatuaga atoa a le TMO ia te ia e tusa ai o lana galuega sa fa’atino, peita’i, ua le aoga uma lea faatuatuaga ina ua ia faatinoina lenei solitulafono.

 

Ae na taua e Pauga e fa’apea, o lona faatamala ma lona le manatu mamafa i le faatinoina o ona tiute, ua mafua ai ona ia aveesea lenei vaega tupe mai totonu o le kamupani.

 

Na la tau fai talosaga i le Fa’amasinoga mo se avanoa e mafai ai ona tatala i laua i tua e saili ni la galuega e tausi ai o la aiga ma toe totogi ai le tupe i le TMO. Sa la faatoese fo’i i o la aiga aemaise ai a la ekalesia, ona o le ta’uvalea o i latou uma i le gaioiga sa laua faia.

 

Na talosaga le ali’i loia fautua ia McNeill i le Fa’amasinnoga ina ia faasala One ma Pauga i se fa’asalaga faanofovaavaaia, e aofia ai le 9 masina lea ua mae’a ona la tuliina i le toese i Tafuna.

 

Na taua e McNeill e fa’apea, o tama’ita’i ua molia, o nisi e galulue malosi ma faatuatuaina e o la aiga, peita’i, o le faatamala ua mafua ai ona laua faia lenei gaioiga. Ua lagona lo la salamo moni e tusa ai o le mea sa tupu, ma ua la sauni fo’i e toe totogi uma atu le vaega tupe i le TMO.

 

Na lagolagoina e le loia a le malo ia Lowe le talosaga a McNeill ina ia faasala i laua ua molia i se fa’asalaga faanofovaavaaia, e aofia ai le faatonu o i laua e toe totogi le tupe sa la gaoia.

 

E talitonu Lowe, e tatau ona faatulaga se auala lelei ma le mautu e toe totogi atu ai e i laua ua molia lenei vaega tupe tele, peita’i na saunoa le afioga i le ali’i Fa’amasino Sili lagolago ia Fiti Sunia e fa’apea, e le o se tiute o le Fa’amasinoga le taumafai e faatulaga auala e toe totogi ai e i laua nei le tupe na a’afia i le la solitulafono.

 

Saunoa Sunia e fa’apea, o lenei mataupu na tofu atu i le Ofisa o Leoleo ina ua masalomia e Su’etusi a le TMO Inc se vaega tupe ua misi mai teugatupe a le Kamupani, atoa ai ma faamaumauga ua masalomia le aveesea mai totonu o masini o lo o galulue ai i laua nei ua molia.

 

I suesuega atili sa fa’atinoina na mafai ai loa ona faamaonia, le tele o le vaega tupe na ave faagaoi e i laua nei e to’alua.

 

E 5 tausaga na manatu le Fa’amasinoga e faasala ai i laua nei e to’alua i le toese i Tafuna, peita’i ua faamalumalu lo la tuliina o lea faasalaga, ae ua faanofovaavaaiai laua mo le 5 tausaga i lalo o tuutuuga e ao ona la usita’i i ai.

 

O ni isi o ia tuutuuga e aofia ai lo la tuliina lea o masina e 20 i le toese, peita’i ua manatu le fa’amasinoga, o le fa fa’amalumalu le 8 masina, ae ua lava masina e 12 e tuli e i laua nei e to’alua, e aofia ai ma masina e 9 lea ua mae’a ona la tuliinai le toese. Lona uiga, toe ta’i 3 masina la te tuliina ona tatalaina loa lea o i laua i tua.

 

Ua faatonuina i laua e totogi le salatupe a le tagata e ta’i $2,000, atoa ai ma le la toe totogiina o tupe na la ave faagaoi mai le TMO.

 

E $37,431.77 lea tupe ua faatonu e le Fa’amasinoga ia One na te toe totogi, ae $33,831.39 ua faatonu Pauga na te toe totogi.

 

Na faailoa e Sunia ia One ma Pauga e fa’apea, e le na o le faigaluega e maua ai le tupe e toe totogi ai a la salatupe, e mafai fo’i ona la galulue i se faatoaga e maua mai ai se tupe e faatino ai le poloaiga a le fa’amasinoga.

 

O le aso 20 o Novema lea ua fuafua e tatau ona tatala ai i tua i laua nei e to’alua, ae o le masina o Me o le tausaga fou lea ua fa’atulaga e tatau ona la toe tutula’i ai i luma o le Fa’amasinoga mo le la ulua’i iloiloga.

 

O le finagalo o le Fa’amasinoga, e fia malamalama le Fa’amasinoga i le auala o le a toe totogi atu ai e i laua nei ua molia le tupe i le TMO faapea ai ma le la salatupe i le Fa’amasinoga.