E 80 masina lea ua faasala ai e le Fa’amasinoga Maualuga le susuga a Sierra Isaia e taofia ai i le Toese i Tafuna, ina ua ta’usala o ia i moliaga mamafa e 2 o lona umia fa’asolitulafono lea o vaega o le fualaau fa’asaina o le aisa, e mafua mai i ni tagi se 2 sa tu’uaia ai o ia e le malo, lea na mulimuli ane fa’amaonia e le Fa’amasinoga.

O le vaiaso na te’a nei na tula’i ai Isaia i luma o le afioga i le ali’i Fa’amasino Sili ia Michael Kruse mo le lauina o lana fa’asalaga. O le alii Loia Fautua lagolago ia Rob McNeill na tulai mo Isaia, lea sa taofia i le Toese mo ni nai masina e le i mamao atu e fa’atali ai le aso e lau ai lana fa’asalaga, ae o le tama’ita’i loia sili lagolago ia Laura Garvey  na tula’i mo le itu a le malo.

E 2 tagi eseese sa faila e le malo fa’asaga ia Isaia. I le tagi muamua, sa tu’uaia ai o ia i moliaga mamafa e 2 o lona umia faasolitulafono o vaega o le pauta fa’asaina; ma le moliaga o lona umia faasolitulafono o le pauta o le aisa ma le fa’amoemoe e tulei ma faatau atu i isi tagata; o moliaga mamafa uma.

Ae i lalo o se maliliega na sainia e le malo ma Isaia, lea fo’i na talia e le Fa’amasinoga Maualuga, na malie ai le ua molia e tali ioe i moliaga e 2 uma ona toe teuteu e le malo.

I le tagi muamua, na malie ai Isaia e tali ioe i le moliaga na toe teuteu e le malo lona mamafa, le solitulafono o le umia faasolitulafono o vaega o le pauta fa’asaina o le aisa, o se solitulafono mamafa o le vaega D, lea e mafai ona fa’asala ai se tasi i le toese mo le umi e le silia i le 5 tausaga, pe faasala i le salatupe e le silia i le $5,000, poo le fa’asala fo’i i fa’asalaga uma ia e lua.

Ae i le tagi lona lua, na malie ai fo’i le ua molia e tali ioe i le moliaga na toe teuteu e le malo le mamafa o lona fa’asalaga, le solitulafono o le umia faasolitulafono o vaega o le pauta faasaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

I le tali ioe ai o Isaia i moliaga e pei ona ta’usala ai o ia sa ia ta’utino ai e fa’apea, i le aso 26 o Aokuso 2017, sa ia umia ai se paipa tioata o lo o i ai vaega o le pauta fa’asaina o le aisa.

Sa ia taua atili fo’i e fa’apea, a o tatala ai o ia i tua e faatali ai taualumaga o lana ulua’i mataupu, sa toe taofia e Leoleo lana ta’avale i le aso 11 o Tesema 2017 e mafua mai i se solitulafono i luga o le alatele, ma toe maua ai fo’i e Leoleo se isi paipa tiata i lona tino o lo o i ai vaega o le pauta fa’asaina o le aisa.

E pei ona taua e le Fa’amasinoga e fa’apea, ina ua talia le maliliega a Isaia ma le malo i le masina o Oketopa o le tausaga nei, na malie ai le Fa’amasinoga e fa’aauau pea ona tatala Isaia i tua ina ua maea ona ia totogi le $17,000 e faatalitali ai le aso e lau ai lana fa’asalaga.

O tuutuuga sa tatala ai o ia i tua, ia auai i le faamasinoga i soo se taimi e valaau ai lana mataupu.

Ae ina ua le auai Isaia ina ua valaau lana mataupu ia Oketopa, na faia ai loa le faaiuga a Kruse e taofia ai o ia i le toese i Tafuna e aunoa ma se tupe e totogi, e faatali ai le aso e lau ai lana fa’asalaga.

Ina maua le avanoa o Isaia i le vaiaso na te’a nei, sa ia fa’atoese ai loa i le Fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga aemaise lona to’alua ma lona atalii pepe e le i leva ona fanau mai.

Na talosaga McNeill mo se faasalaga faanofovaavaaia ae tuli faatasi mo moliaga uma e 2. Na taua e McNeill e faapea, o Isaia o se alii na sese lana filifiliga sa faia, ae o ia o se tagata e aoga i lona aiga. Sa ia talosaga i le faamasinoga ina ia faamama se faasalaga mo Isaia faapea fo’i o faasalaga o lo o tuuina atu i isi fo’i tagata e ta’usala i le ituaiga solitulafono lenei.

Na lagolagoina e Garvey le talosaga a le itu tete’e mo se fa’asalaga faanofovaavaaia. Sa ia taua e fa’apea, e ui lava i le matuia o le gaioiga sa faia e le ua molia, o lona toe solitulafono lea a o tatala ai o ia i tua e faatali ai se faaiuga o lana ulua’i mataupu, ae ua manatu le malo e aloaia pea tuutuuga o le maliliega sa latou sainia ma Isaia, e ala i le talosagaina lea o se faasalaga faanofovaavaaia mo ia.

Ao le i tuuina mai le faaiuga a le Fa’amasinoga, na maua le avanoa e toe faatepa ai e Kruse itu e lua faapea ai ma le ua molia i mau faamaonia o lenei mataupu.

Saunoa Kruse e fa’apea, o le mataupu muamua na molia ai Isaia, na mafua mai lea ina ua taofi e Leoleo lana ta’avale ia Aokuso 2017 na maua ai fualaau faasaina i totonu. O isi mea na maua i ai e aofia ai ni telefoni se lua, lea sa i ai ni feau na faamaonia ai lona aafia i le tulei atoa ai ma le fa’atauina atu o fualaau fa’asaina i isi tagata, atoa ai ma se tinoitupe e $514.

E $15,000 le tinoitupe na totogi e Isaia ma tatala ai o ia i tua e faatali ai le faaiuga o le tagi faasaga ia te ia, i lalo o tuutuuga, e le tatau ona ia toe solia se tulafono a le malo.

Fa masina mulimuli ane ai ia Tesema 2017 ae toe taofia e Leoleo le ta’avale a Isaia i luga o le alatele ona o lona le usitaia o tulafono i luga o le alatele, ma toe maua ai fo’i e Leoleo isi fualaau fa’asaina ia te ia, ma molia ai loa o ia i le tagi lona lua.

E $2,000 le tinoitupe na faatulaga e tatala ai Isaia i tua i le mataupu lea, lea na mafai ona ia totogi ma toe tatala ai fo’i o ia i tua e faatali ai taualumaga o lana mataupu.

Saunoa Kruse e fa’apea, o le itu e sili ona matuia ai le gaioiga sa faia e le ua molia, o lona toe soli lea o le tulafono a o tatala ai o ia i tua e faatali ai le faaiuga o lana ulua’i mataupu. I le silasila a le Fa’amasinoga, e le nofo lelei lea tulaga i le finagalo o le Faamasinoga.

Mo le moliaga o le umia faasolitulafono o vaega o le pauta faasaina na ta’usala ai Isaia i le tagi muamua a le malo, e 5 tausaga ua faasala ai o ia i le toese, peita’i ua faamalumalu lona tuliina o le faasalaga, ae faanofovaavaaia ai o ia i lalo o tuutuuga e ao ona ia usita’i i ai.

O nisi o ia tuutuuga e aofia ai lona tuliina o masina e 20 i le Toese i Tafuna.

Mo le moliaga o le umia faasolitulafono o vaega o le pauta faasaina o le aisa mai le tagi lona lua, e 5 tausaga poo le 60 masina ua faasala ai Isaia i le toese i Tafuna, o lea faasalaga e tuli uma lava le 5 tausaga poo le 60 masina.

Saunoa Kruse, o faasalaga nei e lua e tuli eseese, e muamua ona tuli le 20 masina, a mae’a, ona faatoa tuli lea o le faasalaga lona 2 e 60 masina, tusa lea ua 80 masina le aofa’i atoa o le umi o le a tuli e Isaia i le toese.