Ads by Google Ads by Google

Faasala mo le 10 tausaga i le Toese le alii na maua i ai fualaau faasaina

ausage@samoanews.com

Pago Pago, AMERICAN SAMOA

E 10 tausaga lea ua faasala ai e le Fa’amasinoga Maualuga se alii e nofosala ai i le Toese i Tafuna, ina ua faamaonia le moliaga o lona umia faasolitulafono o vaega o le pauta faasaina o le aisa ma le faamoemoe e tulei ma faatau atu isi tagata.

 

E to’alua ali’i o lo o tu’uaia e le malo i lenei mataupu, o le susuga a Daisy Mareko ma le susuga a Faafetai Lefatia Jr lea o lo o taoto pea i luma o le Fa’amasinoga Maualuga lana mataupu i le taimi nei.

 

O le vaiaso na te’a nei na tula’i ai Mareko i luma o le afioga i le Faamasino Sili ia Michael Kruse mo le lauina o lana fa’asalaga.

 

Na ulua’i tu’uaia e le malo ia Mareko i moliaga e aofia ai le umia faasolitulafono o vaega o le pauta o le aisa; umia faasolitulafono vaega o le pauta o le aisa ma le faamoemoe e tulei ma faatau atu i isi tagata; umia faasolitulafono se a’upega malosi, faapea ai ma le umia faasolitulafono o ni pulufana, o vaega uma ia o solitulafono mamafa.

 

Ae i lalo o le maliliega na sainia e Mareko ma le malo, lea fo’i na talia e le Fa’amasinoga Maualuga i le masina o Fepuari, na malie ai le ua molia e tali ioe i le moliaga o le umia faasolitulafono o vaega o le pauta faasaina o le aisa ma le faamoemoe e tulei ma faatau atu i isi tagata, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua.

 

I le tali ioe ai o Mareko i le solitulafono e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le aso 7 o Novema 2019, sa ua umia faasolitulafono ai vaega o le pauta faasaina o le aisa ma le faamoemoe e tulei ma faatau atu i isi tagata.

 

Ina ua maua le avanoa a le ua molia mai le Faamasinoga, sa ia faatoese ai loa e tusa ai o lana solitulafono, atoa ai ma lona talosagaina o se isi avanoa mo ia se’i toe fo’i atu ai i tua i lona aiga e saili sana galuega e tausi ai ona matua aemaise lana fanau.

 

Na fesili Kruse ia Mareko poo fea lea la e alu e saili ai sana galuega pe afai ae tatala o ia i tua, na tali le ua molia, o le a saili i le tele o kamupani i le atunuu e pei o le kamupani i’a, o le McConnell Dowell, faapea ai ma le tele lava o isi kamupani e ono mafai ona maua ai sana galuega.

 

Na talosaga le loia a Mareko, le susuga a Rob McNeill i le Fa’amasinoga mo se faasalaga nofovaavaaia mo le ua molia, ina ia maua ai le avanoa e vave ai ona fo’i i lona aiga e saili se isi lumana’i lelei o ia.

 

Na tete’e le loia a le malo i le talosaga mo se avanoa mo le ua molia. Na taua e le tamaitai loia ia Kristine Soule, e tatau ona i ai se faasalaga faa falepuipui mo le ua molia, ona o le matuia o le gaioiga sa ia faia, e le gata i le umia o fualaau faasaina ma le faamoemoe e tulei ma faatau atu i isi tagata, ae sa maua ai fo’i le fana ma pulufana ia te ia.

 

A o le i tuuina mai le faasalaga a le Fa’amasinoga, na maua le avanoa e toe faatepa ai e le Faamasinoga itu e lua o lenei mataupu.

 

MAU FAAMAONIA O LE TAGI A LE MALO

 

O le mataupu faasaga ia Mareko e pei ona taua e le Fa’amasinoga, na alia’e mai ina ua maua e Leoleo se ta’avale o le ituaiga o le Hyundai, numera o le laisene 991C o loo paka i luma o se faleoloa, ae o le ta’avale lea e fetaui lelei ma le ta’avale lea sa fai tuliga ma Leoleo i le 3 po ua tuana’i atu.

 

Na aga’i atu Leoleo ma talanoa atu i le ave ta’avale o le ta’avale uliuli lea, ma iloa ai, o le ave ta’avale, o le susuga a Faafetai Lefatia Jr, o se tasi o lo o molia i lenei mataupu. Na faailoa e Leoleo ia Lefatia Jr le mafua’aga o le la talanoa atu, ona o le ta’avale tonu lea o loo ia faafoeina sa aofia i se tuliga ta’avale sa faia ma Leoleo i ni nai aso ua mavae atu, peita’i sa teena e Lefatia Jr lona iloaina o lea fa’alavelave, faapea ai ma lona faailoa i Leoleo, e le o ia na faafoeina le ta’avale i le po e pei tula’i mai ai le fa’alavelave.

 

A o talanoa Leoleo ma Lefatia Jr, sa fa’afuase’i ona vaaia se ta’avale pikiapu lanu pa’epa’e ua afe atu ma paka i le isi itu o le ta’avale i luma lava o le Faleoloa lea i Puapua, ona vaaia lea o se ali’i ua oso i fafo mai le ta’avale, numera o le laisene, 7999 ma aga’i mai i le ta’avale a Lefatia Jr.

 

O le ali’i lea na savali mai ma talanoa atu ia Lefatia Jr o Daisy Mareko, se tasi o lo o molia i lenei mataupu, lea sa la to’alua mai ma se isi fo’i alii sa ia faafoeina mai le ta’avale 7999 lanu pa’epa’e.

 

Ina ua taunuu Mareko ma talanoa ma Lefatia Jr, sa faatonuina loa e Lefatia Jr ia Mareko e tago e aveese atu le fa’atau o loo i totonu o lana ta’avale (Lefatia Jr) ma ave i le ta’avale 7999, faatasi ai ma le ato lanu uliuli o loo i le nofoa pito i tua o le ta’avale.

 

Na fesili Leoleo ia Lefatia Jr poo ai e ana le ato lea ua alu ese atu ma Mareko, ae na tali Lefatia Jr, o le ato a Mareko. Na ona alu atu lava o Mareko tuu le fa’atau i totonu o le ta’avale, oso i totonu o le ta’avale ma la aga’i ese atu loa.

 

Ina ua aga’i ese atu le ta’avale a Mareko ma le ali’i o loo la to’alua, sa maitauina e Leoleo e le o faia a laua fusipa’u mo le saogalemu, o le mafua’aga lea na tuli tatao ai loa e Leoleo le taavale o loo alu atu ai Mareko ma taofi mai ai i le isi pito nu’u lava o Futiga. E leai se laisene poo se ID e mafai ai ona faamaonia Mareko ma le ali’i ave ta’avale i Leoleo, o le mafua’aga lea na taofia ai loa e Leoleo le ta’avale faatasi ai ma Mareko ma le ave ta’avale.

 

Ae o le taimi fo’i lea ua mae’a ai ona taofia e Leoleo ia Lefatia Jr ma ua auina atu nei o ia i le Ofisa o Leoleo i Tafuna mo suesuega.

 

Sa fesili Leoleo ia Mareko poo ai e ana le ato uliuli lea na ia avese mai i totonu o le ta’avale a Lefatia Jr, ae na tali Mareko, o le ato a Lefatia Jr. Na malie Mareko e su’e e Leoleo le ato, ma, i totonu o le ato, sa maua i ai fana, pulu, fualaau fa’asaina ma se tinoitupe.

 

E taunuu atu Leoleo sa momoliina atu Mareko ma le ali’i ave ta’avale i le Ofisa o Leoleo i Tafuna, o lo o i ai Lefatia Jr.

 

Na tatala e Leoleo le ato uliuli i totonu o le potu sa i ai Lefatia Jr, ae la’u uma i lalo mea sa i totonu ao molimauina fo’i e Lefatia. O mea sa maua i totonu o le ato e aofia ai fana e 2 (tasi le fana o le ituaiga o le .22 faapea ai ma le fana e tasi o le ituaiga o le .35); sa maua ai fo’i pulufana e 11 i totonu o le ato (o pulufana o le fana .22 ma le .35); sa maua ai fo’i straws e 4 ua uma ona ta tipi tulimanu ae utu ai i totonu le pauta fa’asaina o le aisa; o le tinoitupe e $2,949; e 2 isi pepa iila feololo sa maua i ai vaega o le pauta fa’asaina o le aisa; 99 pepa iila laiti e fa’aaoga e utu ai le pauta o le aisa; o telefoni faapea ai ma isi lava mea eseese na mafai ona taofia uma e Leoleo.

 

FAASALAGA

 

Saunoa Kruse e fa’apea, e leai lava se isi ituaiga faasalaga e talafeagai mo lenei mataupu, se’i vagana ai le faasalaga faa falepuipui e tuli atoa, ina ia aoaoina ai le mafaufau o le ua molia i le matuia o lana solitulafono.

 

O le faasalaga a le faamasinoga mo Mareko, e tuli atoa le 10 tausaga i le Toese, faapea ai ma le totogi o le salatupe e $5,000.