Ads by Google Ads by Google

Fa’asala i le Falepuipui i latou e to’atolu sa galulue i le O&O Enterprises

ausage@samoanews.com

E 20 masina i le Toese lea ua faasala ai e le Fa’amasinoga Maualuga i latou e to’atolu sa galulue i le Faleoloa o le O&O Enterprises i Nu’uuli i le vaiaso nei, ina ua fa’amaonia moliaga o le taupulepule faatasi lea e ave faagaoi le tele o oloa ma tupe a le kamupani i se auala faasolitulafono.

 

Na tutula’i uma ai i latou nei e to’atolu i luma o le afioga i le ali’i Fa’amassino Sili lagolago ia Fiti Sunia mo le fofogaina o le latou faasalaga.

 

O i latou nei e aofia ai Siueli Blake, Kalala Leilua ma Arona Ma’a. O le alii Loia Fautua lagolago ia Rob McNeill na fai ma sui o i latou nei, ae o le ali’i Loia Sili lagolago ia Doug Lowe na tulai mo le malo.

 

Talu mai lava le taimi na pu’e faapagota ai e Leoleo i latou nei ia 2018, sa taofia ai lava i latou i le Toese e le’i tatalaina i tua, ina ua le mafai ona latou totogi tupe sa faatulaga e tatala ai i latou i tua.

 

E $20,000 le tupe na faatulaga e tatala ai i tua Leilua, e $5,000 mo Ma’a, ae o Blake sa taofia e aunoa ma se tupe na fa’atulaga, ona o le tulaga fa’aletonu i ona pepa nofomau.

 

E ta’i 9 moliaga o le gaoi atoa ai ma le ave faagaoi o meatotino sa i lalo o le latou vaavaaiga na molia ai e le malo i latou nei.

 

Ae i lalo o le maliliega na sainia e le malo ma i latou uma nei e to’atolu, lea fo’i na talia e le Fa’amasinoga i le masina na te’a nei, na malilie ai i latou nei e tali ioe i le moliaga lea ua toe teuteu e le malo, le solitulafono o le taupulepule lea e ave faagaoi meatotino a le kamupani sa latou galulue ai, o le vaega D lea o solitulafono mamafa, lea e mafai ona fa’asala ai se tasi i le toese mo le umi e oo atu i le 5 tausaga, pe faasala foi i le salatupe e mafai ona oo atu i le $5,000.

 

I le tali ioe ai o i latou nei e to’atolu i le moliaga e pei ona ta’usala ai i latou, sa latou ta’utino ai e fa’apea, i le va o le aso 5 o Iulai e oo atu i le aso 28 o Aokuso o le tausaga e 2018, na latou taupulepule e faia se gaioiga ina ia ave faagaoi ai oloa ma tupe a le O&O Enterprises.

 

O lea gaioiga sa latou faia, na mafai ai ona latou ave faagaoi le silia i le $19,000 tupe e aofia ai ma oloa mai le kamupani, e aunoa ma le iloa e le Pule o le Kamupani.

 

E pei ona taua atili i tuutuuga o le maliliega a le malo ma i latou nei e to’atolu e fa’apea, o le  aso 28 o Novema 2018, na taofi ai e le Pule o le Kamupani se ta’avale Leoleo sa aga’i atu i luga o le alatele, ma ia talosaga i ai pe mafai ona latou suesueina le mataupu e fa’atatau i ana tagata faigaluega lea na taupulepule e ave faagaoi ana tupe ma oloa, ae faatau atu i isi faleoloa ina ia maua mai ai tupe mo i latou.

 

Na faailoa e le Pule o le Kamupani i Leoleo e fa’apea, o ia sa malaga i fafo, ae tu’u atu le vaaiga o le Kamupani i lona nephew. Ae ina ua toe fo’i mai lana malaga, sa faailoa atu e lona nephew ia te ia le faaletonu o le pisinisi, ina ua le tutusa faamaumauga o tupe ma oloa o loo i totonu o le Fale e teu ai oloa a le Kamupani.

 

Na amata ona fesiligia e le Pule o le Kamupani ana tagata faigaluega e faatatau i le tulaga faaletonu ua alia’e mai, ma faailoa atu ai e Blake i le alii Pule, lo latou ave faagaoi o oloa ma faatau atu i isi faleoloa ae maua mai ai tupe mo i latou.

 

Sa fesiligia fo’i e le Pule o le Kamupani ia Leilua ma Ma’a, ma la ta’utino ai fo’i i le tulaga lava lea e tasi. Na faailoa e Leilua i le Pule o le Kamupani e fa’apea, o tupe sa maua mai i oloa na faatau faagaoi, na latou vaevae ai ma isi tagata faigaluega.

 

Ina ua maua le avanoa mo i latou uma nei mai le Fa’amasinoga, na latou faatoese ai loa e tusa ai o le latou solitulafono, ma latou talosagaina ai se isi avanoa mo i latou, se’i toe fo’i atu ai i tua e tausi o latou aiga ma saili ni galuega e fesoasoani ai i le toe totogiina o le tupe na latou ave faagaoi mai le kamupani.

 

Sa latou faatoese fo’i i le Pulega a le O&O Enterprises ma tagata faigaluega uma o loo i ai, e tusa ai o le solitulafono sa latou faia, atoa ai ma le faaleaogaina o le faatuatuaga ma le talitonuga sa tuuina atu ia tei latou.

 

Na talosaga McNeill i le Fa’amasinoga mo se fa’asalaga faanofovaavaaia mo i latou nei e aunoa ma le toe tuuina atu i ai o se isi taimi latou te tuliina i le toese, ae ua lava le umi e 12 masina lea na taofia ai i latou ao faatalitali ai se faaiuga o lenei mataupu, e fai ma a latou faasalaga.

 

E ui i le matuia o le gaioiga sa faia e i latou nei, peita’i e talitonu le latou loia fautua, e agavaa i latou i se faasalaga mama, ona o lea ua latou ta’utino ua latou salamo e tusa ai o le mea sa tupu. Na lagolagoina e Lowe le talosaga a le itu tete’e.

 

Saunoa le afioga i le ali’i Fa’amasino ia Sunia e fa’apea, o le solitulafono lenei o le gaoi o oloa o le pisinisi sa galue ai, o se tasi lea o solitulafono ua maitauinale faatupulaia i le atunuu i le taimi nei.

 

O le itu e matuia ai lea solitulafono e pei ona saunoa Sunia, e le gata e aafia ai le tamaoaiga o le pisinisi, ae aafia ai fo’i ma tagata fa’atau. E mafua ona aafia tagata fa’atau, ona o lea ua manatu le faipisinisi e si’i le tau o oloa ina ia tau faapaleni ai lana tupe lea ua gau i le solitulafono.

 

Na faailoa e Sunia ia i latou uma ua molia e fa’apea, e le mama i le Faamasinoga le gaioiga sa latou faia, e le gata ua latou aveese mai tupe sa tatau ona alu i totonu o le tamaoaiga o le malo, ae ua latou aveesea fo’i tupe mai tagatanu’u o Amerika Samoa.

 

O tuutuuga o le faasalaga faanofovaavaaia e 5 tausaga mo i latou uma nei e to’atolu, e aofia ai lo latou tuli o le umi e 20 i le Toese, atoa ai ma le totogi e le tagata e to’atasi o le salatupe e $1,500.

 

Ua fautuaina fo’i e le Fa’amasinoga le Tina o Blake, ina ia oo atu i le aso e magalo ai i tua ua mae’a ona toe faaleleia ona pepa nofomau.