Pago Pago - AMERIKA SAMOA

“Fai le mea sa’o” - o le talosaga lea a afioga i senatoa ia Dr. Aifili John Tufa i le taimi o lana iloiloga pu’upu’u mo tofiga a le kovana sili e avea ma totino fou o le Komiti Fa’afoe a le falema’i a le LBJ.

O le taeao o le Aso Gafua na tula’i ai Dr. Tufa i luma o le Senate, lea na tuuina atu ai e le afioga i le ali’i senatoa ia Tuiasina Dr Salamo Laumoli ma Fonoti Tafa’ifa ni fa’alototeleina o latou manatu, ona o mataupu o lo o tula’i mai i le falema’i i tulaga o le pulega fa’apea ai ma gasegase o lo o tuli i fafo mo togafitiga faafoma’i.

O Dr. Aifili na tofia e le afioga i le ali’i Kovana ia Lemanu P. S. Mauga e sui tulaga i le Sui Ta’ita’ifono o le Komiti Fa’afoe ia Dr Jean Anderson lea ua fa’amoemoe e fa’ai’u i le masina nei lana tautua i le komiti faafoe. 

I le taimi o le iloiloga, na muamua ai ona fa’afetaia e le afioga i le ali’i senatoa ia Tuiasina ia Dr. Tufa i lana galuega i le taimi o le fa’ama’i o le COVID-19 lea sa taulamua ai o ia i le Matagaluega o le Soifua Maloloina i le avea ai ma foma’i fa’ama’i.

Na taua e Tuiasina e fa’apea, o Dr. Tufa ua tofia i le komiti faafoe i le taimi o lo o faagasolo ai le falema’i i le tele o suiga.

“E fai si ou popolega ona o lou tofiga o se sui o le komiti faafoe e oo mai i le taimi o lo o faagasolo ai le tele o suiga a le falemai ma o le upu moni, o loo feagai pea le falemai ma faafitauli ae o le Komiti Faafoe na faia suiga talafeagai. Peita’i o lea ua toe sui se tasi o i latou na faia na suiga, ma toe tu’u ai le isi i luga o le komiti faafoe o le a fa’aauau pea ona silasila i nei suiga,” o le saunoaga lea a Tuiasina.

Sa ia toe talosagaina Aifili ina ia agai i luma ma le faaeteete ma faaauau le galuega a Dr Anderson.

“Fa’amolemole tu’u uma fa’afitauli e tula’i mai i le falema’i. Se’i ou faamanatu atu, o le soifua maloloina e le tatau ona faapolokiki, o le soifua maloloina lea o tatou tagata,” o le saunoaga lea a Tuiasina.