Ads by Google Ads by Google

Faai’u i le Toese le vevesi a le Ekelasia ‘Church of Christ’ i Nuuuli

ausage@samoanews.com

Na fa’ai’u puta se vevesi na tula’i mai i le lotoifale o le Ekalesia Church of Christ i Nuuuli i le po o le aso Sa na te’a nei, ina ua vili e ni isi o le Ekalesia le Ofisa o Leoleo mo se fesoasoani, ma ta loka ai loa e Leoleo sui e to’a 8 o le Ekalesia, lea aofia ai ni isi o i latou o lo o avea ma Failauga o le Talalelei a le Ekalesia.

 

E pei ona taua e ni isi o molimau i Leoleo e faapea, o lenei vevesi na alia’e mai lava i totonu o le lotoifale o le Ekalesia, ma i’u ina faaoolima ai sui o se tasi o aiga o le Ekalesia i se ulugali’i lava o le Ekalesia.

 

O le tula’i mai ai o lenei fa’alavelave, e aofia ai ma le faaoolima sa faia i le Tama na aafia i totonu o le Malumalu e laugaina ai le Upu a le Atua, na taua ai e nisi o le Ekalesia i Leoleo lo latou fesiligia o le matua o le ola faaleagaga o i latou na aafia i lenei fa’alavelave, aemaise lava i latou ua faaigoaina o Failauga o le Talalelei.

 

O le mae’a ai ona fesiligia e Leoleo o molimau uma e faatatau i lenei fa’alavelave, na faia ai loa le faaiuga e taofia i le Falepuipu i le po lava lea o le Aso Sa sui e to’a 8 o le Ekalesia, ina ua manino i suesuega, o i latou ia sa aafia i le faalavelave.

 

O le taeao o le aso Gafua na te’a nei na tutula’i uma ai i latou nei e to’a 8 i luma o le afioga i le Tama’ita’i Fa’amasino o le Fa’amasino Faaitumalo, afioga Gwen Tauiliili-Langkilde.

 

O i latou e to’a 8 na ta loka e Leoleo e aofia ai Viliamu Ioane; o le susuga a Tautua Faapusi ma lona faletua ia Taua; Luao Soli Jr; Neru Soli; Minute Soli; Leua Vili poo Julie fo’i e pei ona iloa ai o ia e le to’atele, ma Kalepo Tineiafi.

 

O isi o i latou nei o loo molia i le faaoolima i le tulaga tolu ma le faatupu vevesi i nofoaga faitele, ae o isi o loo molia i le faaleaga meatotino ma le faatupu vevesi i nofoaga faitele.

 

O le mae’a ai ona iloilo e le Fa’amasinoga o le ripoti a Leoleo, na faia ai loa le faaiuga a le loia a le malo ia Jason Mitchell, o le a leai ni moliaga e faia faasaga i le susuga a Viliamu Ioane.

 

O le mae’a ai o le iloiloga a Ioane, na toe tatalaina ai loa o ia i tua ua faaleaoga tu’uaiga faasaga ia te ia.

 

O le mae’a ai o le ulua’i iloiloga o lenei mataupu i le aso Gafua na te’a nei, na faia ai loa e le afioga i le Fa’amasino le faaiuga ina ia tatala i tua sui e to’a 5 o le Ekalesia e aunoa ma ni tupe e totogi, e faatali ai le aso lea ua fa’atulaga e toe valaau ai a latou mataupu, se’i vagana ai sui e to’alua ua toe taofia nei i le Toese, ona o lo o fa’aletonu a laua pepa nofomau.

 

O sui e to’a 5 ua tatala i tua e aunoa ma ni tupe e totogi e aofia ai Tautua Suapusi; Luao Soli Jr; Neru Soli; Minute Soli ma Leua “Julie” Vili.

 

O i laua e to’alua o loo taofia pea i le Toese e aofia ai Taua Suapusi ma Kalepo Tineiafi.

 

TAGI A LE MALO

 

Na taua e le malo i le latou tagi e fa’apea, o le afiafi po o le aso Sa na te’a nei, Setema 13, 2019 i le itula e 7:19 i le afiafi, na logoina ai e nisi o le Ekalesia le Ofisa o Leoleo  mo se fesoasoani, ona o se vevesi sa tula’i mai i le lotoifale o le Ekalesia.

 

E to’atele Leoleo na tali atu i lenei valaau, ma amata ai loa ona faia a latou suesuega i le mafua’aga tonu o le fa’alavelave.

 

E to’atele sui o le Ekalesia na fesiligia e Leoleo e tusa ai o lenei fa’alavelave, aemaise lava i latou sa vaai tino i le mea sa tupu.

 

Na taua e se tasi o molimau i Leoleo e fa’apea, o le vevesi na tula’i mai ina ua fasi e ni isi o le aiga o Soli le ulugali’i na a’afia. O luma o le Falesa a le Ekalesia na fasi ai le fafine, ae o totonu o le Malumalu na fasi ai le tamaloa.

 

Ae pei ona taua e ni isi o molimau i Leoleo e fa’apea, o le vevesi lenei na amata mai i se fonotaga sa faia i le Lyons Park i le afiafi lava lea o le Aso Sa i le va o ni Tama se to’atolu o le Ekalesia. O i latou nei e aofia ai le Tama na aafia, o le susuga a Soli Jr ua molia, ma se tasi o Tama o le Ekalesia.

 

O lea fonotaga, sa talanoaina ai se mataupu e faatatau lava i le lotoifale o le Ekalesia. Na faai’u puta lea fonotaga ina ua tula’i mai ai ni lagona le fiafia o le susuga a Soli Jr, ma toe aga’i atu ai loa o ia i lona fale i le nofoaga o loo i ai le Malumalu o le Ekalesia ma faailoa i lona aiga, ua fasi o ia e Tama e to’alua sa latou talanoa.

 

Na taua e nisi o le Ekalesia i Leoleo, o le molimau lea a Soli Jr na fai i lona aiga na mafua ai loa le vevesi, ae o le mea moni lava, e lei fasia o ia i le taimi o le latou fonotaga sa faia i le Lyons Park, e leai fo’i se vevesi na tula’i mai i le taimi o le fonotaga.

 

O le logotala ai o tagata o le aiga o Soli Jr i le mea ua tupu, na aga’i ane ai loa ni Tama’ita’i se to’atolu e aofia ai Taua Faapusi, Minute Soli ma Leua “Julie” Vili ma fasi se Tina o le Ekalesia sa nofonofo i luma o le Malumalu, o ia lea o le to’alua o se tasi o Tama o le Ekalesia sa auai i le fonotaga sa faia ma Soli Jr i le Lyons Park.

 

O le taimi fo’i lea na alu ane ai le ali’i o Kalepo, faatasi ai ma le fesoasoani a se tasi o sui o le Ekalesia ma faaleaga le ta’avale a le Tina lea sa paka i luma o le Malumalu.

 

O le maea ai o le vevesi lea, na taumafai ai loa le susuga i le ali’i Faifeau o le Ekalesia e faia se leleiga, e ala i lona taloina o se feiloaiga faatopetope a Tama uma o le Ekalesia.

 

Na taua e le Tama na aafia i Leoleo e fa’apea, ina ua aga’i atu i totonu o le Malumalu mo le fonotaga e fa’aleleia ai le vevesi ua tula’i mai, na faateia ai o ia i le savali atu o Soli Jr ma faafetaui o ia, ma ia lu’iina loa o ia la te fusu.

 

Na faateia le Tama lea ina ua faapo o ia e le ali’i o Tautua Faapusi e ala i lona tu’iina o ona foliga ma palasi ai loa i lalo. O le taimi lea na tau fai laga atu ai loa isi sui o le Ekalesia e aofia ai tagata o le aiga o Soli Jr ma latou fasi fa’amo’amo’a loa o ia.

 

Na maua fo’i le avanoa e fesiligia ai e Leoleo le faletua o le Tama na aafia e tusa ai o le fa’alavelave. Na taua e le Tina lea i Leoleo e fa’apea, na matua faateia o ia ina ua aga’i atu Tama’ita’i e to’atolu o le Ekalesia ma fesiligia o ia i luma o le Malumalu, sosoo ai lava ma le latou faaoolima ia te ia.

 

E pei ona taua e le malo i le latou tagi e fa’apea, e le o se taimi muamua lenei ua tula’i mai ai se vevesi i le lotoifale o le Ekalesia lenei.

 

E i ai fo’i molimau ua oo atu i Leoleo, e fa’atatau i le i ai lea o nisi o sui o le Ekalesia na aafia i lenei fa’alavelave e le i mafai e Leoleo ona fesiligia ma molia. E le gata i lea, e i ai fo’i nisi o lo o i ai i lea nofoaga o lo o nonofo faasolitulafono i lalo o Tulafono tau Femalagaaiga. Ua fautuaina le Loia a le malo ina ia silasila toto’a i lenei mataupu, ma faatulaga se suesuega faapitoa ina ia saili ai pe faamaonia, o lo o i ai i lea nofoaga a le Ekalesia ni isi ua ova aso ae o loo aumau pea i le atunu’u.

 

O le aso 22 o le masina fou o Oketopa lea ua fa’atulaga e toe valaau ai le mataupu a le Ekalesia i luma o le Fa’amasinoga Faaitumalo.

 

O nisi o tuutuuga ua tatala ai nei i tua i latou e to’a 5, e le gata ia tausia le nonofo filemu i totonu o le Ekalesia ma le afioaga, ae le mafai fo’i ona latou toe taumafai i soo se auala e fa’afesoota’i le ulugali’i lea na a’afia i lenei fa’alavelave.