Ads by Google Ads by Google

Fa'ailoa kovana aso malolo mo le Kerisimasi ma le Tausaga Fou


[ata: SN]

I se tusitusiga a le kovana sili ia Tesema 16, sa fa’ailoa ai e le tofa ia Lolo Matalasi Moliga aso fa’atulagaina mo aso malolo i Amerika Samoa ma le fa’aiuga o le tausaga. O le aso Kerisimasi, Tesema 25 ma Ianuari 1, 2020, le Tausaga Fou, o aso malolo ia i le atunu’u ma o le a tapunia ai ofisa uma o le malo mo ia aso e lua.

 

O tagata faigaluega uma a le malo e le o mana’omia mo ia aso, o le a malolo mai i galuega, ae o i latou uma e tatau ona galulue o le a totogiina e pei ona i ai tulafono fa’ataoto a le malo.

 

I tausaga ua te’a i lenei vaitau o aso fiafia, a masani le toatele o tagata galuega a le malo ona ave aso livi ae le’i o’o i le Kerisimasi ma le Tausaga Fou. Ae o nisi e galulue e afa aso ia Tesema 24 ina ia mafai ona vave o’o i o latou aiga, ona o le pisi i luga o le alatele, ae maise lava luma o le Laufou Shopping Center, lea o le tiute ai leoleo i lenei vaitau i le fa’amalosiga o galuega a leoleo i luga o le alatele.

 

I le Kerisimasi i lenei tausaga, ua leva ona sauniuni le atunu’u i le fa’amanatuina o le fanau mai o le Mesia.

 

Ma o le aso a taeao, Tesema 25, o le a tapunia ai foi le tele o pisinisi i Amerika Samoa, ae maise ofisa o le fetarale i le teritori.

 

O le Kerisimasi o se tasi o vaitaimi taua i tagata Kerisiano o le lalolagi ma o le tele o aiga, e agai i le lotu i le po nanei, ae o le aso a taeao o fa’atasiga o fiafiaga a aiga. I le Ekalesia Metotisi, e masani ona faia manuao e pepese i nofoaga o aiga a lea Ekalesia.

 

A’o agai atu le atunu’u i fiafiaga o le Kerisimasi, aua ne’i galo o lo’o galulue leoleo i soo se vaega o le atunu’u ina ia sefe lenei tausaga.

 

Mai le Puleaga ma le aufaigaluega a le Samoa News, matou te fa’amanuia atu le Kerisimasi ia Amerika Samoa, ae maise alo ma fanau a le atunu’u o lo’o tautua i Vaega ‘Au a le malo tele i so’o se nofoaga i le lalolagi