Pago Pago, AMERIKA SAMOA

Na faamanino e le Komesina o Leoleo ia Le’i Sonny Thompson i luma o le Komiti o le Puipuiga o le Saogalemu Lautele a le Maota o Sui i le vaiaso na te’a nei, o le fa’alavelave lea na tula’i mai i Aunu’u i le masina o Iuni o le tausaga nei, lea na maliliu ai soifua e to’alua ina ua goto se va’a alia na malaga ma se pasese, na mafua mai ina ua to’atele naua le pasese na ave e le va’a ao faaletonu tulaga o le tau i lea aso.

O le vaiaso na te’a nei na faia ai se iloiloga e fesiligia ai fuafuaga a le Matagaluega o le Puipuiga o le Saogalemu Lautele a le malo e fesoasoani ai i le puipuia o le saogalemu o tagata i Aunuu, pe a oo i le taimi faaletonu ai le tau ma sousou le sami.

Saunoa le Komesina o Leoleo ia Le’i Sonny Thompson, o le faaiuga o le suesuega sa faatautaia e le Ofisa o Leoleo i le fa’alavelave lea na maliliu ai tagata e to’alua ina ua goto le alia i Auasi, na manino ai le soli e le ave va’a o le tulafono i le to’atele o le pasese na malaga i le va’a i le taimi na tula’i mai ai le fa’alavelave.

Na faaopoopo i le saunoaga a le Komesina o Leoleo le saunoaga mai le Faatonusili o le Matagaluega o le Puipuiga o le Saogalemu Lotoifale, le susuga a Alfonzo Pete Galea’i ma ia taua ai e fa’apea, e ui sa tuuina atu le faatonuga e taofia ai alava’a i le va o Auasi ma Aunu’u, ae na le usitaia e le ave va’a alia le lapataiga ma fa’aauau pea lava ona alu le va’a, lea na mafua ai loa ona tula’i mai le fa’alavelave.

Na fiamalamalama le afioga i le ali’i Faipule ia Gafatasi Afalava, poo a ni fuafuaga a le Ofisa o Leoleo ua faia ina ia taofia ai le toe tula’i mai o faalavelave faapenei i le lumana’i.

Saunoa Lei, o lea ua mae’a ona faia ni suiga i Leoleo e galulue i le itu i Sasa’e, ma ua tuu atu ai fo’i ma le malosiaga i le Leoleo Lutena mai Aunuu lea ua tofi e Tiute i le Ofisa o Leoleo i Fagaitua, na te faia ai faaiuga mo le saogalemu o tagata lautele i Aunu’u, pe a vaavaai atu ua faaletonu tulaga o le tau.

Saunoa atili Le’i e faapea, o le galuega a le Leoleo Lutena e faia, faatasi ai ma le lagolago mai a isi Leoleo ua tofia e galulue mo le itu i Sasa’e, o le taamilo lea e mata’itu tulaga o le saogalemu o le atunuu, aemaise lava i le vaega o loo i ai le uafu i Auasi.

Sa ia faamautinoa i afioga i Faipule, o le maloiaga faa Komesina lea ua ia tuuina atu i le alii Leoleo Lutena, e mafai ai ona faia e le alii Leoleo soo se faaiuga e na o le Komesina o Leoleo e mafai ona faia, ina ia mautinoa lava e saogalemu le atunuu o loo feafioa’i i le va o Auasi ma Aunu’u.

Na lagolagoina e le afioga i le ali’i Faipule ia Vailoata Amituana’i fuafuaga a le Ofisa o Leoleo e pei ona folasia e le Komesina. Pau lana faamaite, e manaia fo’i ae tiute ai ni Leoleo se to’alua i luga o le uafu i Auasi, ina ia faigofie ai ona usitaia e le mamalu o le atunuu fautuaga ma lapataiga i taimi e faaletonu ai le tau.

Na fesili le Taitai Komiti ia Manumaua Wayne Wilson i le susuga Galea’i, pe i ai se vaega a lona Ofisa e fesoasoani ai i le Ofisa o Leoleo i le puipuia o le saogalemu o tagata i le va o Auasi ma Aunu’u.

Saunoa Galea’i e fa’apea, e leai se vaega a lona Ofisa e faia i le puipuiga o le saogalemu o tagata i le va o Auasi ma Aunu’u, pau le latou tiute, o le tu’u faatasia lea o ripoti o le Tau ma tufatufa atu i Ofisa o loo galulue i le puipuiga o le saogalemu e pei o le Ofisa o Leoleo ma le Pulega o Uafu ma Taulaga, ina ia latou nofouta ai i le tulaga o le tau ma faia ai loa faaiuga talafeagai.

E le i nofo lelei i le finagalo o nisi o faipule le saunoaga a Galea’i i le leai lea o se sao a lona Ofisa i le tulaga o le puipuiga o le saogalemu o tagata i Auasi ma Aunu’u.

Saunoa le Faipule mai Manu’a ia Tiaoali’i Fau Sai e fa’apea, o le Faatonusili o le Ofisa o le Puipuiga o le Saogalemu Lotoifale lea faatoa mavae atu ia Samana Semo Ve’ave’a, sa ia molimau i luma o le Maota o Sui i se taimi e le i mamao atu, o le tiute tonu lava lea a lona Ofisa, o le puipuia lea o le saogalemu o le atunuu e aofia ai tagata Aunu’u, ae faateia o ia i le saunoaga a le susuga a Galea’i.

Na fesili le afioga i le ali’i Faipule ia Timusa Tini Lam Yuen ia Galea’i, pe sa i ai se latou ripoti na tuuina atu i le Ofisa o Leoleo ma le Pulega o Uafu i le aso na tula’i mai ai le fa’alavelave i Auasi ma Aunu’u. Na tali Galea’i, sa tuuina atu le latou ripoti faatasi ai ma le lapataiga e taofia ai femalagaaiga a va’a i Auasi ma Aunu’u, peita’i, ua le usitaia e le ali’i ave va’a o le alia le lapataiga ma mafua ai loa ona tula’i mai le faalavelave.

Saunoa le afioga i le alii Faipule ia Vesi Talalelei Fautanu Jr e faapea, e fiu lava le malo ma le Fono e taumafai auala eseese e foia ai le faafitauli i le va o Auasi ma Aunuu, e le mafai lava ona foia, leaga o va’a o loo fa’aaoga, o va’a alia a aiga Aunu’u, o loo totogi e tagata ma fa’aaoga mo femalagaaiga.

Tusa lava la pe taumafai atu le malo i auala eseese e foia ai lenei faafitauli, e fa’aauau pea lava ona tula’i mai, leaga e faamuamua lava e aiga o loo fa’aaoga a latou alia mo femalagaaiga le tulaga o le seleni nai lo le soifua ma le saogalemu o tagata.

E faamaonia lea pine faamau e pei ona saunoa Vesi, o le fa’alavelave lea na maliliu ai tagata e to’alua i le masina o Iuni na te’a nei. E tiga lava ona iloa e le ave alia ua matua leaga lava le tau, ae fu’e lava le pasese toeitiiti atoa le to’a 20, faatasi ai ma le uta ua mamafa, ma i’u ai loa ona goto le va’a i le maualuluga o galu.

Saunoa atili Vesi e faapea, na pau lava le isi auala mautu e mafai ai loa ona foia le toe tulai mai o se faalavelave faapenei, o le fausia loa o se alalaupapa i le va o Auasi ma Aunu’u.

Na lagolagoina e le Faipule mai Fofo ia Andra Theresa Samoa le saunoaga a Vesi e faatatau i le fa’amuamua e tagata Aunuu o tupe nai lo le saogalemu o tagata. Saunoa Samoa e faapea, e tatau ona faia ni aoaoga ma mautinoa e ave laisene ave va’a i tagata o loo faatautaia alia i Aunu’u, ina ia latou malamalama i le taua o le saogalemu i luga o le sami.

O nisi o taimi e pei ona saunoa Samoa, e manatu ai lava le ave va’a alia i le tupe nai lo le saogalemu ma le tulafono, peita’i afai e malamalama i latou i le taua o le tulafono ma auala e tatau ona usitaia ai le tulafono, ona avea loa lea o se itu e faa faigofie ai le galuega.

O le motu o Aunuu e pei ona saunoa Samoa, o le isi lea nofoaga e toatele malaga asiasi a fanau aoga e aga’i i ai, ona fia maimoa i latou i le palapala susu faapea ai ma isi lava tulaga taua o loo i ai. 

Talu ai lea tulaga taua mo fanau aoga, e tatau ai ona mautinoa le saogalemu o femalagaaiga i le va o Auasi ma Aunuu ina ia foia ai le toe tula’i mai o se isi faalavelave matuia i le lumana’i.

Na fautuaina e nisi o sui o le Komiti le alii Komesina, pe mafai ona fa’aaoga le va’a Leoleo e malaga ai tagata Aunuu i le taimi e leaga ai le tau, ae taofi le toe feoa’i o va’a alia. I lea auala, e mautinoa ai le malu puipuia o soifua o tagata.

Na fautuaina e le afioga i le ali’i Faipule ia Vaetasi Tuumolimoli Saena Molia le Komesina, ina ia faia se feiloaiga ma Taitai o Aunuu, aemaise lava i alii va’a o loo faatautaia va’a alia, ina ia faamanino i ai le taua o le usitaia o tulafono mo le saogalemu, atoa ai ma gaioiga e faia pe a tula’i mai tulaga faaletonu o le tau.