Ads by Google Ads by Google

Faafetai aloaia Lemanu ma Talauega i le atunu’u mo le lagolago


Feiloa’i atu le Kovana ma le Lutena Kovana filifilia ia Lemanu Palepoi P. Mauga faapea ai Talauega Eleasalo Ale i sui o le Komiti faapea ai le au palota sa lagolagoina le la faamoemoe, i le latou feiloaiga sa faia i le vaiaso na te’a nei i le nofoaga autu a Lemanu ma Talauega i Matu’u [ata AF]
ausage@samoanews.com

Pago Pago, AMERIKA SAMOA

 

O le ulua’i feiloaiga a le vaega a Lemanu ma Talauega i le aso Tofi o le vaiaso na te’a nei ina ua faatoa mae’a le faiga palota tele a le atunu’u i le aso 3 o Novema, 2020, e pei ona filifilia ai i laua e avea ma Ta’ita’i o le malo mo le isi 4 tausaga, na faaleoina ai lo la agaga faafetai i le atunu’u atoa, ae faapito augafa ia i latou uma na lagolagoina lo la faamoemoe, i lo latou talitonuina o i laua e avea ma Ta’ita’i o le atunu’u.

 

Na faatumulia le nofoaga autu a Lemanu ma Talauega i Matu’u i Komiti mai afioaga eseese atoa ai ma le mamalu o le au palota, na lolofi atu e fia faafofoga i se saunoaga mai lo latou Kovana filifilia, le afioga a Lemanu Palepoi P. Mauga, faapea ai ma le Lutena Kovana filifilia, le tofa a Talauega Eleasalo Ale.

 

“Ua fa’aalia le finagalo tu malele o le Atua e ala i la outou faiga filifiliga, o la tatou manumalo fo’i, o le manumalo mai le Atua,” o le saunoaga lea a Lemanu.

 

Na tatala le mafutaga i se sauniga lotu puupuu na taitaia e le susuga i le Faifeau o le Ekalesia Faapotopotoga a Iesu Keriso mai Pago Pago (CCJS), susuga Rev. Patolo Mageo, lea na ia faamamafa ai i lana saunoaga le taua o le faalagolago i le mana o le Agaga Paia o le Atua, na te faafeao i soo se faamoemoe e faia i lenei olaga.

 

Na faamalosi’au Rev. Mageo ia Lemanu ma Talauega e faalagolago i le Atua faaiuga fai o le la ta’ita’iga, ma ia faamaoni i tiute ua valaauina e le Atua i laua la te faatinoina.

 

O isi saunoaga mo lenei feiloaiga e aofia ai le saunoaga a le afioga i le Maoputasi ia Mauga Tasi Asuega, o ia fo’i lea o le Failautusi o le Ofisa o Mataupu Tau Samoa, e fai ai a sui o tagata palota uma sa lagolagoina le faamoemoe o Lemanu ma Talauega, o le saunoaga mai le Tofa i le Tootoo ia Malemo Tausaga, o ia lea sa faauluulu i ai le taitaiina o le Komiti a Lemanu ma Talauega, ma le saunoaga faai’u mai le afioga i le ali’i Kovana filifilia ia Lemanu.

 

Na faafetaia e le afioga ia Mauga le mamalu o le atunuu, ina ua i’u ma le filemu le faiga palota o lenei tausaga, e aunoa ma se faalavelave na tula’i mai. Sa ia faafetaia isi sui tauva, o le tapuaiga mau i faauluuluga o le atunuu, aemaise ai le tapuaiga a le mamalu o le atunu’u o loo aumau i atunuu i fafo. 

 

Na faapitoa le faafetai a Mauga i le aufai pisinisi, atoa ai ma tagatanu’u mai atunuu eseese o le lalolagi o loo aumau i Amerika Samoa, i lo latou lagolagoina o le faamoemoe a Lemanu ma Talauega.

 

E ui e eseese gagana ma aganu’u, ae o le aumau ai o atunuu eseese i laufanua o Tutuila ma Manu’a, na saunoa ai Mauga e faapea, “O i tatou uma lava o tagatanuu o Amerika Samoa. Tatou te galulue faatasi e filifili ni o tatou sui e taitaia le malo mo le isi 4 tausaga.”

 

O lenei ua mae’a le  faamoemoe sa alo atu i ai le atunu’u e ala i lana palota. O le fautuaga a Mauga i sui uma o le vaega a Lemanu ma Talauega, ia faailoa pea le loto maualalo ma le fa’aaloalo i isi paga ma isi sui tauva, ina ua mafai ai ona maua le fealofani ma le loto e tasi i le atunu’u.

 

Sa ia fautuaina aiga uma o loo i ai laupapa o faailoilo mo le taumafaiga a Lemanu ma Talauega ina ia tatala i lalo faailoilo uma lava. E oo fo’i i pepa o loo faapipi’i i ta’avale ma faitoto’a o maota ma laoa, sa ia fautuaina le atunuu atoa ina ia aveese.

 

“O lea ua mae’a le palota tele a le atunu’u, ae ou te tatalo atu Amerika Samoa, ia tumau pea lo tatou fealofani ma lo tatou galulue faatasi. Tusa lava pe sa eseese vaega na tatou tausinio ai, ae a tatou feiloa’i ma isi o tatou uso ma tuafafine, faailoa atu i ai le alofa o le Atua, faailoa atu i ai le loto maualalo ma le fa’aaloalo, ina ia fusia ai le atunuu i le filemu o le Atua,” o le saunoaga lea a Mauga.

 

Sa ia taua le tele o faafitauli o loo alia’e mai i le atunuu i le taimi nei, ma o loo tu’u fesili lava fo’i fanau ma tupulaga lalovaoa pe faapefea ona foia nei mau faafitauli.

 

“O le tatou tiute lena pe afai tatou te toe fo’i i fanua, faatino o tatou tiute faamatua ma faailoa i fanau le olaga e tatau ona ola ai, ina ia avea tupulaga o le atunuu o nisi e tua i ai le malo, atunuu ma aiga i aso o i luma,” o le saunoaga lea a Mauga.

 

O le lagona lava fo’i lea na faaleo e le afioga a Lemanu ina ua maua lona avanoa. Sa ia faafetaia le au palota atoa a le atunuu i lo latou lagolagoina o le la faamoemoe ma Talauega. 

 

“E le o se galuega faigofie sa tatou alo atu i ai. Sa tele faafitauli na tatou fetaia’i, tele fo’i lu’itau na osofia ai lo tatou Sa, ae sa ou maitauina le mau pea o le to’ovae ma uumau la outou faautaga loloto. Faafetai atu i le atunuu aemaise ai Komiti taitasi mai afioaga uma i le atunu’u,” o le saunoaga lea a Lemanu.

 

Na taua e Lamanu le to’atele o le atunuu mai atunuu i fafo na valaau atu ia te ia e faamanuia atu le la taumafaiga, ma faamalo atu e tusa ai o le faamoeome. O nisi o i latou na valaau atu e aofia ai le Ao o le Malo o Samoa, le afioga i le Tui Aana ia Tuimalealiifano Sualauvi II ma le afioga i le ali’i Palemia o Samoa, le susuga a Tuilaepa Sa’ilele Malielegaoi.

 

Sa ia taua fo’i le valaau mai o se tasi o Tama matua o le atunuu o loo poloka i fafo, le Tofa i le Tootoo ia Fofo Sunia ma faamalo atu i le faamoemoe ua taunu’u. Na faai’u le la talanoaga ma Fofo i le faapea atu o Fofo ia te ia, “Lemanu, ia manuia le lua tula’i mai ma Talauega, aua ne’i galo le atunuu. Ia e manatua fo’i, o matou fo’i o loo poloka i fafo, o i matou fo’i o isi sui o le atunu’u.”

 

O le uiga o le saunoaga a Fofo e pei ona saunoa Lemanu, saili se auala latou te toe fo’i mai ai, ua leva ona latou toe fia fo’i mai i o latou aiga ma le atunu’u.

 

O le vaiaso atoa lava na te’a nei ina ua faatoa mae’a le palota, o le vaiaso lea o Talosaga ma Anapogi a le vaega a Lemanu ma Talauega. O le vaiaso atoa lenei ua faapitoa mo le vaiaso o le “leleiga” i le va o aiga, afioaga faapea ai fo’i ma ulugali’i na masesei ona o le faiga palota. 

 

Na taua e Lemanu le taua tele o le toe faia o se leleiga i le va o aiga, nu’u ma afioaga. E ui e eseese uma lava finagalo o tagata i le taimi o le palota, ae o le mea moni lava, e tasi lava le atunu’u, e tasi fo’i le Sa o loo folau ai le atunu’u atoa. 

 

O le vaiaso fo’i lenei ua fuafua ai talanoaga ma feiloaiga ma le afioga i le ali’i Kovana ia Lolo Moliga, mo le faailoa i ai o fuafuaga a le vaega fou, atoa ai ma le ulua’i gaioiga, o le tofia lea o se Vaega Faapitoa e aga’i atu i totonu o Matagaluega ma Ofisa eseese uma a le malo, ina ia faamasani sui o le vaega fou i auala e faatino ai galuega e sauni ai mo le tauaveina o le galuega i le tausaga fou.

 

O le isi fonotaga a Lemanu ma Talauega o le a sosoo ai, e talanoaina ai loa isi fuafuaga mo le aga’i atu i le tausaga fou, e aofia ai ma le polokalame mo le faauuga o le Kovana ma le Lutena Kovana.

 

“O le agaga atoa o maua ma Talauega, o le tatou malo e fau faatasi. O tatou na amataina lenei faamoemoe, o tatou fo’i e galulue faatasi mo le faatinoina, e le nao maua ma Talauega le faamoemoe, o tatou uma,” o le saunoaga lea a Lemanu.

 

Na taua e le Tofa a Malemo, o le mea lilo o le manumalo a Lemanu ma Talauega, o le galulue faatasi lea o Komiti eseese uma lava i le faatinoina o a latou tiute tauave.

 

“Soo se faamoemoe lava e tatau ona i ai sau sini e taula’i i ai lau vaai. Afai e leai se sini e leai fo’i se taunuuga manuia. O le sini mo soo se faamoemoe, o le vaai mamao lea i le lumana’i, atoa ai ma le naunau ina ia ausia ni matatia fo’u,” o le saunoaga lea a Malemo.

 

O le matati’a fou e pei ona ausia i lenei faiga palota e pei ona saunoa Malemo, o le manumalo lea o Lemanu ma Talauega i le silia i le 60% o palota.