O LE AETO MA LE TAMALOA TA LA’AU

I aso a la ua leva, na nofo ai se tamaloa i totonu o le togavao.  Ma o le galuega a lenei tamaloa, o le taina i lalo o la’au e fa’atau atu i aiga ma pisinisi i totonu o le ‘a’ai.

O lenei tamaloa ta la’au, ua lauiloa i totonu o le ‘a’ai i le loto alofa.  E le gata i tagata ae faapea i manu.

O se tasi aso, sa ia fesoasoani ai i se aeto sa mau i totonu o se a’upega.

Ma na iai se aso na alu ai lenei tamale ta la’au, i luga o se mauga e ta la’au ai.  Ma sa fai lava sina maualuga o le mauaga na a’e ai lenei tamaloa ta la’au.

Ina ua mae’a lana galuega, sa tupu le faaletonu.  Ua le maitau e le tamaloa ta la’au, le auala e toe fo’i mai ai i lalo.

Ona nofonofo lea o le tamaloa i luga o le mauga ma taumafaufau se auala e toe fo’i ifo a’e ai mai luga o le mauga.

Ae fa’ate’ia o ia, i le lele ‘ese o lona pulou mai luga o lona ulu.  Ma lona tilotilo a’e, o se aeto lea ua na ta eseina lana pulou mai luga o lona ulu.

Ua matua’i ita tele le tamaloa ta la’au ma tamo’e atu ma tuliloa le aeto.  Aua o le taimi lena i le aeto, ua le lele maualuga e pei ona masani ai aeto, ae lelelele lava e latalata i luga o la’au.

E le’i umi ona fai tuliga a le tamaloa ta la’au ma le aeto, ae toe tilotilo ifo le tamaloa i ona siosiomaga, ua o’o mai lalo o le mauga.

Ae o le taimi lena ua lele atu ai le aeto ma tu i luga o se la’au ma tilotilo mai i le tamaloa.  Na ‘ata le tamaloa ina ua ia toe manatua le aeto sa ia fa’asaoina ma ia malamalama ai i le mafuaaga na lele ai le aeto ma ave lona pulou.

Sa valaau atu le tamaloa ta la’au i le Aeto, “Faafetai la’u uo mo le ta’ita’iina mai o a’u i lalo mai le mauga.  O oe lava o se uo moni.”

[IA MANUIA FUAFUAGA O LENEI VAIASO FOU]