O LE LA’AU KERISIMASI LA’ITITI

I se tulimanu o se faleoloa tele lava, na tu ai se la’au kerisimasi, o lo’o faatalitali po o ai se aiga o le a faatauina o ia ma ave i lo latou fale.

Ae peitai, ona o le laititi o lenei la’au la’au kerisimasi, sa na’o na fepasia’i lava o tagata, ae leai lava se tasi e tilotilo i le la’au Kerisimasi la’ititi.

Sa faatumulia le faleoloa i teuga eseese o le Kerisimasi, o lipine felanulanua’i, o fetu ‘emo’emo, o sukalati ma mea ta’alo a le fanau.

Ua atoa le masina talu ona taunu’u le la’au kerisimasi laititi ma isi la’au kerisimasi, i le faleoloa.  Ma ua toeititi ave uma isi la’au kerisimasi ona o le ‘u’umi ma le lausiusi o o latou lau.  Ae paga lea, sa leai lava seisi na fia mana’o i le laau kerisimasi laititi.

O se tasi aso, a’o tu tu ma le faanoanoa le la’au kerisimasi laititi, e faatalitali se aiga o le a fia avea o ia i le latou fale, ae taunu’u atu loa se aiga e su’e se latou la’au kerisimasi.

“O a’u lea! Fa’atau atu a’u.  E moni ou te laititi ma le tele ni o’u laula’au, ae ou te aulelei foi ma e le tumu ai le tou fale ia te a’u.  E mafai ona outou faatuina a’u i luga o se laulau ma e mafai foi ona teuteuina a’u e le fanau,” o le tauvalaau atu lea a le laau kerisimasi laititi.

Ae paga lea, e le’i lagonaina mai o ia e le aiga ma o latou faatauina ai se la’au kerisimasi umi ma le lautele.

Ua saofa’i ane nei i lalo le la’au kerisimasi laititi ma ua tagi.

A’o tagi le tamai la’au kerisimasi, ae taunuu atu foi ma seisi aiga, o se ulugalii ma se la teineititi laititi. O le igoa o le teineititi o Rosa ma na iloa mamao mai lava i o e le tama’i la’au kerisimasi, le ulavale o le tamaitai.

“Fa’atope mai Rosa e piki se tatou la’au kerisimasi, ua toeititi tapuni le faleoloa,” o le valaau atu lea o le tama a Rosa.

Ua savali atu le teineititi ma ua tu tonu lava i autafa o le tama’i la’au kerisimasi ma faasino iai lona lima ma faapea atu i ona matua, “Ou te mana’o i le la’au lea.”

“Hooray!! Ua ia filifilia a’u!” o le ‘e’e leotele lea a le tamai la’au kerisimasi.

Na matua’i faate’ia o le la’au kerisimasi ina ua faapea atu iai Rosa, “E mafai ona e tautala?”

“Auoi, e te lagona mai a’u?” o le fesili leotele mai a le tama’i laau kerisimasi ia Rosa.

“Aua e te ‘e’e o lea ou te lagona atu oe,” o le ‘ote mai lea o Rosa.

Ua ‘ata leotele le tama’i la’au kerisimasi ma faapea mai, “O taimi uma lava ou te tautala ai, e leai lava seisi e na te lagonaina a’u.”

“Alu loa e fai i lou tama e fa’atau a’u,” o le faatonu atu lea a le tama’i la’au kerisimasi ia Rosa.

Ma tamo’e atu loa Rosa i le toso mai le lima a lona tama i le mea o tu ai le tama’i la’au kersimasi.

[IA MANUIA FUAFUAGA O TOTOE O LENEI VAIASO]