O FUAMOA TAUTALA

I aso a la ua leva, na iai se fafine ma sana fanau teine se toalua.  O leisi tamaitai e igoa ia Nina ae o leisi e igoa ia Susana.  O Mele, o se tamaitai saua tele ma le itaita gofie.  E leai seisi e fia so so i tafatafa o Mele, ona o ona uiga ia.

Ae o le tamaitai o Susana, o se tamaitai agaalofa ma le uiga tausa’afia ma e fiafia uma iai tagata.  

O le fafine la, e faapito lona alofa i lana tama teine o Nina, ona e matua’i so’o lelei le teine o Nina i lona tina.

O aso uma, e fa’atigaina ai lava e lenei fafine ia si teine o Susana i feau a le aiga, ae na o le la nofonofo faamaepaepa lava ma Nina.

Ae o aso uma, e talanoa ai lava lenei fafine ma lana tama teine o Nina, e uiga i le lumanai, lea o le a o la maua ai se fale tele, ma tupe se tele ma ni auauna se tele.

O se tasi aso, sa tuli ai e le fafine ia Susan e asu mai se vai mai i le vai eli.

Ina ua taunu’u Susana i le vai ‘eli, sa ia va’aia ai se loomatua ma sa talosaga atu lenei loomatua ia Susana, mo se ipu vai ona ua galala i le fia inu.

O le agalelei o Susana sa ia faatopetope atu ai ma asu mai se ipu vai ma tu’uina atu i le loomatua.

O ni nai aso na soso’o ai, sa otegia ai e le fafine ia Susana ma sasa o ia.  Ona o le fefe tele o Susan, na sola ese mai ai mai lo latou fale.  Ae peitai, ua le iloa e Susana po o fea o le a sulufai iai.

A’o tu Susana ma tagi, sa fa’ate’ia o ia i le fesili atu o se tasi ia te ia, po o le a le mea ua tagi ai.  Ma le tilotilo mai o Susana, o le loomatua lea sa ia aveina iai le ipuvai i le vai ‘eli.

Sa faamatala iai e Susana i le loomatua le mea ua tupu ma o lo’o tagi ona ua na leiloa po o fea o le a alu iai.

Sa faapea atu loa le loomatua lenei, “Ia sau mulimuli mai ia te a’u.  Ae tasi lava le mea ou te manao e te faia.  Aua ne’i e ata i se mea e te vaai pe faalogo iai.”

Ua savavali atu nei le loomatua ma Susana agai i totonu o le togavao.  Ma na faate’ia Susana ina ua ia vaaia ni mea uiga ese…e pei o le soso ese o la’au mai i le auala o lo’o la savavali atu ai ma le loomatua.  O ni to’i o lo’o tau mai, e aunoa ma se tasi o u’uina.  

Ua taunu’u nei Susana ma le loomatua i se fale i le ogatotonu o le vaomatua.  Ma na fa’atonuina e le loomatua ia Susana ina ia alu e fai se afi, e kuka ai le la meaai.

Ae te’i Susana i le vaai atu, ua savali atu le loomatua ma saofai i se nofoa faaluelue, ona tago lea to ese mai lona ulu mai ona tauau, ma tu’u i luga o ona vae ma seluselu lona lauulu.  Ina ua uma lea, ona toe tago lea o le loomatua ma toe tu’u lona ulu, i le mea sa iai.

O se tulaga na maofa ai tele Susana, ae peitai, e leai lava sana tala na faia.

Ua mumu le afi a Susana, ona tago lea o le loomatua ua tu’u ai i luga se ulo o lo’o iai se ponaivi se tasi.  Ua paso i le faiai o Susana pe faafefea ona fai se meaai i le na’o le tasi le ponaivi.  Ae na matua’i te’i Susana ina ua alu atu le loomatua ma asu mai le meaai mai totonu o le ulo, o se supo povi sili ona manogi ma manaia.

O le taeao na soso’o ai, sa faatonu ai loa e le loomatua ia Susana e tatau ona toe fo’i i lona aiga ae sa faatonu e le loomatua ia Susana, e alu i le pa moa ma aumai so’o se fuamoa e fai ifo ia te ia, “Ave a’u”.

O Susana, ua le toe te’i i se mea e toe tupu i le fale o le loomatua.  Ma sa ia faatopetope atu i le pa moa ma ia vaaia le afe ma afe o fuamoa.  O isi fuamoa, e pei lava o fuamoa masani.  Ae o isi fuamoa, o ni fuamoa auro, o isi e teuteuina i ni ma’a taua ma ario.

Ae o fuamoa masani e leai ni teuteuga, ia na valaau mai ia Susana “Ave a’u”.   Ua tago atu nei Susana ma la’u mai fuamoa ia e leai ni teuteuga pe auro foi ma faatumu ai lana ato.

Ua toe fo’i Susana i lona aiga, ae a’o savali o ia, sa ia tago ua u’u mai se fuamoa ma togi i lalo.  Sa matuai faateia lava Susana, ina ua vaai atu i le fuamoa lea na togi i lalo, ua ta’e le fuamoa ae o totonu, o lo’o iai ni auro.

Ua tago atu nei Susana ma tata’e uma isi fuamoa, ma ia maua ai i totonu o la’ei mananaia, o se taavale toso tele lava, ma isi mea taua, ina ua ia taunu’u i le latou fale, sa tau le mafai ona faaofi i totonu o le fale.

Sa fa’ataga fiafia le tina o Susana ina ua toe foi atu Susana ma nei mau oloa.  Ae o leisi taeao, sa ia musumusu atu ai i lana tama o Nina, e alu e su’e le loomatua lea na maua mai ai tupe ma mea mananaia a Susana.

Ua alu nei le teine o Nina, ae paga lea, sa le’i usiusitai o ia i le loomatua.  Manatua, sa faatonu o ia, e aua le ata i se mea, ae na ona vaai lava o Nina i to’i ia na tau, pa ma le ata a Nina.

Ina ua saofai le loomatua ma ave’ese lona ulu mai lona tau’au, sa ‘e’e Nina ma fai mai i le loomatua e inoino i lana mea o lo’o fai.

Ma sa faapea foi ona faatonuina e le loomatua ia Nina e alu i le pa moa e aumai ni ana fuamoa, ae na’o fuamoa lava e fai mai “Ave a’u”.  

Ia paga lea, o le le usiusitai o Nina, sa ia tago ai piki mai fuamoa auro ma fuamoa o lo’o teuteuina, ae o fuamoa masani ia sa fai mai, “Ave a’u”.

Ua tamo’e faatopetope ia Nina i le latou fale ma ana fuamoa, ma ata leotele.  Ae peitai, ina ua tago e tata’e le fuamoa muamua, ae feosofi mai ai lane, o isi fuamoa na feosofi mai ai gata, o namu, o iniseti.

Ua na o le tamo’e ma faataitaio le mea a Nina ua fai nei.

[IA MANUIA TOE FUAFUAGA O LENEI VAIASO]