Ads by Google Ads by Google

E FAI O LENEI AE O LENA


[ata: SN]

O PATO VAO E SEFULU MA LE LUA

I aso a la ua leva, na iai se Masiofo ma sana fanau tama e to’asefulu ma le lua, ae paga lea, e ui i lona mana’o, ae sa le maua sana tama teine e la te to’alua.

O se tasi aso, a’o alu ai se tietiega solofanua a le masiofo i le togavao, sa ia tau atu ai i se teineititi aulelei tele.  Na faatu e le masiofo lana solofanua, ma si’i atu e lana auauna ia lenei teineititi i lima o le masiofo ma sa sogi atu le masiofo i alafau o lenei teineititi.

Na umi se taimi o tilotilo le masiofo i foliga aulelei o le teineititi ma ia mafaufau faapea, maimau pe ana iai sa’u tama teine.  Ou te alofa faamaoni i si a’u fanau tama e to’asefulu ma le lua, ae maimau pe ana iai sa’u tama teine.

O le taimi lena na tu atu ai se faataulaitu lelei ma le agaalofa.

“E mafai ona ou avatuina ma oe sau tama teine,” o le tala lea a le faataulaitu.  “Ma o le a e maua se tama teine sili ona pele ma agaalofa, i teine uma o le malo e sefululua, pe afai e te aumai ma a’u, le tagata po o se manu e muamua faafeiloa’i oe i luga o le ala laupepe e tau i lou maota.”

Ua toe fo’i nei le masiofo i lona maota ma sa mafaufau o ia, o le a muamua mai nei lana tamai ta’ifau lea e masani lava ona faafeiloa’ia o ia i so’o se taimi e toe fo’i atu ai.  Na lagona le fiafia o le maisofo ona o lea o le a maua sana tama teine ae e mafai ona avel ana ta’ifau ma le faataulaitu.

Ae peitai, o le fiafia na liua i le faanoanoa, ina ua taunu’u tonu lava le solofanua a le masiofo i luga o le alalaupapa, ae tamomo’e mai lana fanau tama e to’asefulu ma le lua, e faafetaui o ia.  Ae le o lana taifau.

E le’i iai se taimi e valaau atu ai le masiofo i si ana fanau e aua le tamomo’e mai, ae liliu loa i latou e le faataulaitu i ni pato ma felelei ese atu ai.

Sa matuai faanoanoa le masiofo, ua fiu le tupu e taumafai e faafiafia lana masiofo ae ua na o le tagi o le masiofo ma tauvalaau igoa o si ana fanau tama e to’asefulu ma le lua.

Ua o’o i se tasi aso, ua toe fanau le masiofo ma faamanuiaina ai i la’ua ma le tupu i se purinisese aulelei tele.

Ua tuputupu a’e lenei purinisese ma ua a’ave tala i lona lalelei ma lona agalelei.  Ma e ui i le fiafia o le masiofo i si ana tama teine, ae peitai, sa iloa atu lava e le purinisese le faanoanoa o si ona tina, i le tele o taimi.

I se tasi aso, na vaaia foi e le masiofo ia foliga faanoanoa a si ana purinisese, ma ia fesiligia ai le tamaitai po o le a le me aua faanoanoa ai.

Sa faateia le masiofo i le tali a le purinisese, lea na faapea mai, “Maimau pe ana iai so’u uso po o so’u tuagane ma te tafafao ma ta’a’alo.”

Ua tago loa le masiofo i le faamatala i le purinisese le mea sa tupu i ona tuagane e toasefulu ma le lua.

Ina ua uma ona faamatala e le masiofo ia le mea na tupu i tuagane a si ana tama teine, sa faapea mai le purinisese, “O le a ou alu e saili o’u tuagane ma lavea’i mai i latou.”

Na fiu le masiofo e tagi ma ‘ai’oi atu i le purinisese, ae e leai lava, ua tonu i le purinisese, e tatau ona ia alu e lavea’i mai nai ona tuagane, ona o ia lea na mafua ai ona faaliu pato e le faataulaitu.

Ua alu nei le purinisese e su’e mai nai ona tuagane.  Ua alu alu le savaliga a le purinisese, ua ia lagona lona lelava tele ma lona fia moe.  O lea na ia taoto ifo ai i luga o se pupuvao ma moe loa, ma fai ai sana miti.  Fai mai le miti a le purinisese, na savali agai i totonu o le togavao ma tau atu ai i se tamai fale, ma ina ua ia tatalaina le faitotoa o le fale, sa ia vaaia ai ona tuagane ma o latou feiloai fiafia ai.

Ua te’i ifo i luga le purinisese mai lana malologa, ma faatu loa lana savaliga agai i totonu o le togavao i le mea lea na ia vaai ai i lana miti.  Ma sa tau atu foi le purinisese i le fale lava e tasi lea na ia vaaia i lana miti.

Ua ulufale atu nei le purinisese i totonu o le fale, ae e leai seisi na iai.  Ae a’o faasolosolo le vaai a le purinisese i totonu o le fale, na ia vaaia ai se tulaga uiga ese, e le gata i lona vaaia ia ni moega e sefulu lua, sa ia vaaia foi se laulau o iai ni nofoa e sefulu lua ma ni ipu ai i luga o le laulau, e sefulu lua.  Ua oso le fiafia i le purinisese, aua ua ia iloa nei, o le fale lea o loo nonofo ai ona tuagane.

Ua savali atu loa le purinisese ma saofai ma faatali le toe fo’i atu a ona tuagane.

E le’i umi lava ae faalogoina e le purinisese, le gase mai o fafo ma matala mai le faitotoa.  Sa fa’ate’ia le purinisese, ina ua vaai atu, o ni pato ia o lo’o savavali mai i totonu o le fale, ae o le taimi lava na o’o mai ai nei pato i totonu o le fale, na liua uma i latou i ni perenise talavou.

“Oka se manaia o le mafanafana o totonu o le fale, o ai lea na faamumuina le afi ae tatou te le’i o?” o le tu’ufesili lea a Perenise.  Ae e leai ma seisi o i latou sa faapea mai, o ia na faamumuina le afi.  Ma o le taimi lea na oso mai ai loa le purinisese mai tua o le faitoto’a ma faapea mai, “Talofa nai o’u tuagane.”

Ua feiloai fiafia nei ia le purinisese ma nai ona tuagane e to’asefulu ma le lua.

[IA MANUIA TOE FUAFUAGA O LENEI VAIASO]