Ads by Google Ads by Google

A’afia se alii leoleo i fusuaga i se fale kalapu


[ata: SN]

Pago Pago - AMERIKA SAMOA

I le 2:08 i le vaveao o le aso 28 o Oketopa, 2023, na tupu ai se fusuaga i le fale kalapu a le Bowling Alley Flames i Tafuna, lea o lo o masalomia ai le faaoolima o le pule o le fale kalapu ma lana aufaigaluega, i ni alii se toatolu.  Ina ua taunu’u leoleo i le fale kalapu, na vaaia ai se tagata o taatia i fafo o le faitotoa a le fale kalapu.

E tusa ai ma faamaumauga a le malo, ina ua taunu’u leoleo, sa faapea ona o latou sa’esa’eina le alii lea na taatia i luma o le faitotoa, i totonu o se taavale leoleo. Sa togafitia lenei alii e le vaega a le EMS i Tafuna ma faaooina atu ai i le falemai autu i Faga’alu ma taofia ai loa, mo le togafitiga o ona manu’a. 

Ae i se faatalatalanoaga a leoleo ma lenei alii, na faamautuina ai lona suafa o Aliitia Tauvela ma e galue o ia i le Ofisa a Leoleo.  E tupu lenei faalavelave, ae ua manava le alii leoleo mai ana galuega o le aso.

E tusa ai ma faamaumauaga a leoleo, sa faamatalaina e Tauvela e faapea, sa o la i fafo ma se tasi o ana uo (Mitchel Tuiolemotu) ae alu atu le susuga ia Frank Seko (lea o lo o molia i lenei mataupu) ma fesiligia la’ua po o ai na lavea ai lana taavale.  Sa faamatala e Tauvela e faapea, na tu’i e Seko lana uo ia Tuiolemotu ma sa ia taumafai e vaovao le la misa, ae oso mai Seko i ona tua ma u’unaia o ia i lalo – ma ona le toe manatua ai se mea.

Sa mafai ona matamata leoleo i se ata pu’e (video) i totonu o le fale kalapu, i le amataga o le misa, ma sa faasino ma faamalamalama e Seko ma lona to’alua (o la’ua ia e pulea le fale kalapu), ia le tagata ma lana gaioiga, i le taimi o le fusuaga.

Na faamatala e Seko, na amata mai le faalavelave i le va o se tagata e suafa ia Petaia Chang po o ‘Dice’, lea o lo o masalomia, na ia tu’i ina se sikulaki a le fale kalapu, o Daniel Palemia.  Ma na faateteleina le pisa ina ua taufetuli atu isi sikulaki e taofiofi le misa, ma i’u ina pa’u ai seisi e suafa ia Sa Sione, i luga o Chang.  O iina na oso mai ai ma seisi alii e suafa ia Apela Solofa, ona o lo o manatu ua fasi toatele e sikulaki a le fale kalapu ia Chang.  Ae tau ai ma le tu’i a se sikulaki a le fale kalapu, e suafa ia Fred Crichton, ia Solofa a’o latou taumafai e vaovao le fusuaga.

Na fa’aauau agai i fafo le fusuaga, i le faitoto’a pito i luma, ae e pei ona ta’ua i faamaumauga a leoleo, na ave Chang agai i le faitotoa pito i tua lea e oso atu i leisi foi fale kalapu, le Sports Bar.

Ae i le molimau a Seko, o le taimi lena o lo o tau vaovao mai ai e sikulaki a le falekalapu ia Tuiolemotu ma Tauvela mai fafo o le fale kalapu, ona o tausoga ia a Solofa ma o lo o fia o’o mai i totonu, e fesoasoani ia Solofa.

Sa faamatala foi e Seko e faapea, ina ua ta’ita’i atu i fafo ia Solofa, sa ia valaau mai i sikulaki a le fale kalapu, o le a alu e aumai lana fana e tafana ai latou.  Ma na ta’ua foi e Seko le u’uina e Tuiolemotu o se naifi ma fa’alala mai i ana sikulaki.  Ae sa tulieseina i laua ma faasa ona toe ulufale mai i totonu o le fale kalapu.

Sa faamatala e Seko i leoleo sa su’esu’eina o ia, na ia faalogoina le pa o se mea mai i fafo, ma ia manatu ai, ua lavea lana taavale.  E tamo’e atu o ia i fafo, o lo o tutu mai ai Tuiolemotu ma Tauvela i tafatafa o lana taavale ma ia fesiligia i la’ua po o ai na so’aina lana taavale, ae o lo o masalomia, o iina na tu’i ai o ia e Tauvela ma misi.

Sa o’o atu leoleo i le maota a Tuiolemotu i Aoloau mo le faatalanoaina o ia, ma sa ia faamatalaina i leoleo e faapea, na amata le fusuaga i totonu o le falekalapu, ae na te le iloa se mea, ona o la’ua ma Tauvela, sa i fafo.  Ae sa ia faamaonia lona taumafai e alu i totonu o le falekalapu ina ua na vaaia le a’afia o Solofa i le fusuaga i totonu o le falekalapu, ae peitai, sa taofiofi o ia e sikulaki i fafo.

Sa ia ta’ua foi lona lagona o le pa’o mai i le mea na tu ai.  Ma ina ua o’o atu Seko ma fesiligia i la’ua ma Tauvela po o ai na so’aina lana taavale, sa ia taumafai e tali atu e na te le iloa se mea, ae tu’i o ia e Seko.

Sa faatalanoaina foi e leoleo ia se tasi o sikulaki a le fale kalapu, le susuga ia Fred Crichton ma sa ia faamatalaina e faapea, na o latou tamomo’e atu ina ua o latou va’aia le fufusu mai o Seko ma ni alii i fafo o le fale kalapu.  O i latou na tamomo’e atu, na aofia ai ma Sa Sione, Samoa Fepuleai, To’o Peno ma Natia Natia Jr., po o ‘Skinna’.  O i latou uma ia e galulue i le fale kalapu, seia vagana ai Natia.

Sa ta’ua e Crichton, na mafai ona sola ese ia Tuiolemotu ae totoe ai na o Tauvela.  O lo o ta’ua i faamaumauga a leoleo e faapea, o lo o pu’eina i ata sa faasalalauina i luga o le Tusi o Foliga, ia le kikiina e Crichton ma Seko, o foliga a Tauvela.  Ma o lo o ta’ua foi i faamaumauga a leoleo, ina ua fesiligia e leoleo ia Crichton, sa ia ta’ua, o le tagata mulimuli na kiki ina ia Tauvela a’o ta’atia i lalo, o le alii o ‘Skinna’.

O lo o ta’ua foi i faamaumauga a leoleo le fa’aalia e le pule o le falekalapu ma lana aufaigaluega, lo latou faanoanoa ma le salamo i le mea na tupu.

Sa faatalanoaina e leoleo ia le taitai o sikulaki a le falekalapu, le tamaitai o Sarong Vaioge ma sa ia faamatalaina, lona iai i le taimi atoa na tutupu ai nei faalavelave i le falekalapu i le po lea.  Ma sa iai foi i le taumafaiga e taofi le fusuaga i le va o Chang ma Palemia.  Ae le gata i lea, sa ia molimauina foi le fusuaga lea na tupu i fafo, ae peitai, ona o le malolosi o timuga i lea po, sa le mautonu i le mea tonu na tupu.

I le molimau a Palemia, le tasi o sikulaki a le fale kalapu, sa ia ta’ua ai e faapea, na ia va’aia le tu’iina e Tauvela o Seko, ina ua fesili Seko e uiga i lana taavale.

O lo o ua molia nei ia Frank Seko, Fred Crichton, Samoa Fepuleai, Peno To’o ma Sa Sione i moliaga o le faaoolima I lona tulaga e lua ma le tolu, ma e ta’i $6,000 le tinoitupe sa faatulagaina e tatalaina ai uma i latou i tua e faatalitali ai o latou faamasinoga.