Na fa’aalia e sui o le Ofisa o Mataupu Tau Samoa lo latou lagolagoina o se pili mo suiga i le tulafono o suafa matai ua i luma o le Senate, e fa’asa ai ona umia e se tagata sa fa’amaonia i ni solitulafono se suafa matai o se aiga, po o lona taumafai fo’i e faila sana tete’e fa’asaga i se tasi ua soloai atu i le suafa.

O le iloiloga sa fa’atautaia e le Komiti o Mataupu Tau Samoa a le Senate, lea na molimau ai le Sui Failautusi o le Ofisa o Mataupu Tau Samoa ia Tuiagamoa Tavai, ma afioga i Kovana o Falelima, e aofia ai Lualemaga E. Faoa, Alo Dr. P. Stevenson ma Misaalefua J. Hudson.

Saunoa le afioga i le ali’i senatoa ia Soliai Tuipine Fuimaono o le sui ta’ita’i komiti e fa’apea, o le taua o lenei tulafono, o le a mafai ai ona puipuia tulaga o suafa matai a aiga mai le umia e tagata ua fa’amaonia i solitulafono mamafa.

Na taua e le tofa a Tuiagamoa e fa’apea, o le tulafono taufa’aofi lenei, “o se pili taua toe lelei mo le puipuia o measina a aiga i tulaga o suafa matai”.

Sa ia fa’afetaia i le komiti mo le fa’aulufaleina o lenei pili, e le o i ai fo’i se tulafono faapenei e puipuia ai measina a aiga mo le aga’i i luma.

“I lo’u lava taofi na o a’u, ou te lagolagoina lenei tulafono, o se tulafono lelei mo le atunu’u ma aiga”, o le saunoaga lea a Tuiagamoa, lea fo’i sa lagolagoina e Kovana o Falelima fa’atasi ai ma fautuaga.

O le fautuaga a le afioga a Lualemaga, o le taimi lava e pasia ai e le fono lenei tulafono ma sainia e le kovana, o le taimi fo’i lena e amata fa’amalosia atu ai le tulafono mo tagata e soloa’i i suafa matai o aiga, ae aua ne’i toe a’afia ai taimi ua tuana’i.

Saunoa le afioga a Misaalefua e fa’apea, e le tatau lava i se tagata na ta’usala i ni solitulafono mamafa ona ia umia se suafa matai maualuga o se aiga, aua, o le tagata e avea ma matai, “o se tagata na te faia fa’ata’ita’iga lelei, e fa’ata’ita’i atu uma i ai tagata o le aiga”.

Ae na saunoa le afioga a Alo e faapea, e leai lava se tulafono e te’i lava ua fai e aunoa ma le silasila mamao o le Fono Faitulafono, i itu lelei e manuia ai le atunu’u atoa fa’apea aiga.

Sa ia toe fa’aluaina le finagalo o Lualemaga, ina ia aua ne’i toe aapa i tua le tulafono i le taimi e pasia ai, a ia amata atu lava i le taimi e sainia ai ona fa’amalosi le tulafono.

Saunoa atili Alo e fa’apea, pau lona popolega o lo o i ai, ina ne’i avea le fa’atulafono o le malosi o aiga ma auala e tula’i mai ai ni fa’afitauli i le lumana’i, aua o aiga o lo o fa’alagolago i ai le malosi o nu’u ma itumalo o le atunu’u.

Na fa’afetaia e afioga i senatoa finagalo fa’aalia o sui o le Ofisa o Mataupu Tau Samoa.

Saunoa le afioga i le Maoputasi ia Mauga Tasi Asuega, o le manuia o Tutuila ma Manu’a, e fa’alagolago lea i le tofa saili a tama o le atunu’u, o i latou o matai o aiga na tofia e faia mea lelei mo le manuia o fanau i le lumana’i.

I le tino o le tulafono o lo o taua ai e fa’apea, o lenei pili, e fa’asa ai se tagata na fa’asala i se solitulafono mamafa, ma e lei fa’amagaloina fo’i, ona ia umia se suafa matai o se aiga, e le mafai fo’i ona ia faila se tete’e i se tasi e soloa’i i le suafa matai.

O le taeao ananafi na pasia ai e le maota maualuga lenei tulafono i lona faitauga fa’alua, ma ua fa’amoemoe o le taeao nei e faitau tolu ai.