Ads by Google Ads by Google

IPU Saddam Hussein maua ane Fale’aiga i Niu Ioka

Ua fa’ailoa mai e nisi o leoleo su’esu’e i Niu Ioka, ua toe fa’afo’ia atu nei i tagata maualuluga o le malo o Iraq, le tele o Ipu e faia ai taumafataga a le Aiga o Saddam Hussein ma le Tupu o Faisal 11, sa mua’i fa’ailoa mai o lo’o leiloa mai ma ua masalomia sa gaoia, ma ua fa’ae’e mai e nisi o tagata fa’atau ‘oa, ma fa’atauina i le eBay i Niu Ioka.

Fai mai e 19 lelei Ipu mafolafola ma ipu ai salati, o nisi ipu e i ai lava le fa’amau fa’ailoga a le Malo o Iraq, na fa’aaogaina lea i le Park Avenue Autumn Restaurant, o se vaega o le latou fa’aaliga fa’apitoa sa faia. O nei la Ipu uma ua toe fa’afo’ia nei i le Malo o Iraq e toe fa’ao’o sa’o lava i le Maota o le latou Tupu e toe fa’aaogaina sa’o ai lava i le aso Lua na te’a nei.

“Ina ua mae’a fa’ailoa atu i lea fale’aiga o lo’o latou fa’aaogaina ni Ipu sa sa’ilia ona ua ‘ave’esea fa’anana, ma ia i latou e ona nei mea totino, na toe fa’amatu’u mai lava e le ali’i e ona le fale’aiga, ina ia toe fa’afo’ia nei ipu ia i latou e ona moni.”

O le tala o le toe maua ma fa’afo’ia atu o nei Ipu i Iraq, o le aso tonu fo’i lea ua fa’alauiloa aloa’ia ai e Pres. Obama le tulaga fa’amae’a lelei o le taua i Iraq i le to’atele o le vaega au ua toe fo’i mai i Amerika, “Ua mae’a le fesoasoani a Amerika i Iraq Freedom.” O se saunoaga lea a Obama i Fort Braggs i North Carolina. O le aso Lulu fo’i na maka ai le 8 tausaga na maua atu ai Hussein o lafilafi i le tano i le nu’u sa fanau ai, ma saisaitia mai ai e fitafita a Amerika.

O nei Ipu ma mea nei i le Umukuka a le afioga le Tupu o Iraq ua na’o ni nai mea nei sa ave’esea fa’anana mai lea e tagata mai totonu o le Maota o nei tagata milionea o Iraq ina ua osofa’ia o latou fale ma fasia le tele o latou fitafita leoleo malu sa i ai. Ua aumaia ma ua fiafia tagata e fa’atau e avea ma fa’amau fa’ailoga o le taua, ma le fa’ato’ilaloina fo’i o lea ta’ita’i ta’uta’ua lona leaga o ana pulega i le lalolagi nei. O le tausaga e 2003 na solopala atoa ai e tanetau a Amerika le tele o nei fale tetele o Iraq, ma o lea ua ala ai ona toe fausia e le vaega au fale tetele mo le malo o Iraq ua mae’a lelei nei.

Aumai: AP,  saunia: Leua Aiono Frost