Ads by Google Ads by Google

Ioe ave pasi lona faatamala na maliu ai tama 72 tausaga

O le alii ave pasi lea na aveina le pasi na so’aina se tama e 72 tausaga le matua i Nuuuli i le masina o Aokuso na te’a nei, ua ia tautino i luma o le faamasinoga maualuga i le taeao ananafi e faapea, o lona faatamala na mafua ai ona maliu Malele Forsythe ina ua so’a e lana pasi, a’o kolosi o ia i luga o le laina kolisi i luma o le CBT.

O le alii o Reino Esera, 35 tausaga le matua na ulua’i tuuaia e le malo i moliaga e fa, peitai i lalo o le maliliega lea sa ia sainia ma le malo ma talia e le faamasinoga maualuga ananafi, sa ia ioeina ai le moliaga muamua o le maliu lea o se tagata i le taavale sa ia faafoeina, ae solofua ai isi moliaga laiti e tolu o lo o totoe ai i le pepa o tagi sa faaulu e le malo.

I le tali ioe ai o Esera i le moliaga e pei ona ta’usalaina ai o ia e le faamasinoga, sa ia tautino ai e faapea, i se taimi o le aso 25 Aokuso o le tausaga nei i Nuuuli, sa ia faatupu ai i se auala na te le’i faamoemoeina le maliu ia Forsythe, ina ua so’a e lana pasi o ia a’o kolosi o ia i luga o le laina kolosi i luma tonu o le faleoloa o le CBT i Nuuuli.

Na tautino Esera e faapea, sa faafuase’i ona moe a’o alu pea lana pasi, ma faafuase’i ai loa ona so’a e le pasi Forsythe a’o kolosi i luga o le alatele ma mafua ai lona maliu.

Ua malie le alii ave pasi o le a ia totogiina le tupe e $4,238.83 ia Pepesina Tofili, mo le pili o le falema’i a Forsythe faapea ai ma le toe totogiina o tupe na faaalu mo le maliu o Forsythe.

Na faailoa e le alii faamasino sili Michael Kruse ia Esera e faapea, o le solitulafono o le maliu o se tagata i se taavale, e faia e se ave taavale pe afai e lei usitaia e le ave taavale tulafono i luga o le alatele, ma mafua ai loa le maliu o se tagata na aafia.

Mo se faataitaiga e pei ona saunoa Kruse sa ia taua ai e faapea, o lo o i ai le tiute o le ave taavale, na te tuu atu ai le saolotoga i le tagata savali e kolosi ai i luga o le ala kolosi, a’o tu le taavale e le alu, peitai o le mea sa tupu na mafua ai le maliu o Forsythe e pei ona saunoa le alii faamasino, ua faatamala le ua molia i se auala na te lei faamoemoeina, ma mafua ai loa ona so’a e lana pasi le na aafia ma maliu ai.

E ui o lo o i ai le avanoa e finau ai loia i le faamasinoga mo se faasalaga mo Esera, peitai ua malamalama le ua molia ma ia iloa, e mafai lava e le faamasinoga ona teena fautuaga a loia e tuuina atu mo se faasalaga mo ia.

Ua malamalama foi le ua molia, e le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le tusa ai ma lona loto.

O le solitulafono lea ua nofosala ai  Esera, e mafai ona faasala ai se tasi i le toese mo le umi e le silia ma le 5 tausaga, pe faasala foi i se salatupe e le silia ma le $5,000, poo le faasala foi i faasalaga uma ia e lua.

O le te’a laititi o le itula e 6:00 i le taeao o le aso Toonai, 25 Aokuso na tulai mai ai le faalavelave, ina ua so’a e le pasi a Esera ia Forsythe, ma faanatinati atu ai lona tino i le falemai i Fagaalu mo togafitiga, peitai na maliu ai lava o ia i ni nai minute mulimuli ane ai.

O Forsythe e pei ona taua i faamaumauga a le faamasinoga, o se tasi o tama ua litaea mai le Matagaluega o Leoleo a le malo, e pei ona galue ai i le tofiga o le Commander.

O lo o taofia pea Esera i le toese i Tafuna ina ua le mafai ona ia totogiina le $15,000 sa faatulaga e tatala ai o ia i tua, e faatali ai le aso 28 Tesema lea ua faatulaga e lau ai lona faasalaga.

O le alii loia fautua ia Michael White sa tulai mo Esera i lenei mataupu, ae o Kimberly Hyde sa tula’i mo le malo.

O le afioga i le alii faamasino sili ia Michael Kruse na taulimaina lenei mataupu, i le lagolagosua a le afioga i le alii faamasino lagolago ia Faamausili Faasua Pomele.