Ads by Google Ads by Google

Iloa tonu le fa’ai’uga mo le LBJ i le Aso Lulu

Na toe fa’alaua’itele e Kovana Togiola Tulafono isi ana upu tau fa’afefe fa’asaga i le Komiti Faafoe a le LBJ i luga o lana polokalama i le faaiuga o le vaiaso na te’a nei, e ala i lona fa’amalolo o totino uma o le Fono Fa’afoe, ae toe tu’uina atu le fa’atautaiga o le falemai i lalo o le malo, pe afai e o’o atu i le Aso Lulu o le vaiaso nei, e le suia lava sa latou fa’aiuga e tusa ai o suiga ua latou faia i le falemai i le taimi nei.

O lea folafolaga a le alii kovana sa tu’uina atu i sui o le pulega a le falemai o le LBJ i se latou fonotaga sa faia i le taeao o le Aso Faraile lea na te’a nei, ae o le taimi lea o lo o fa’atalitali sui e to’afa mai i le fa’alapotopotoga a Foma’i ma Tausima’i ma le ma’ave eseese o le aufaigaluega a le falema’i, mo so latou avanoa, aua le to’atele o i latou ua fa’amalolo mai i galuega.

Na folafola e Togiola i tagata faigaluega uma lava a le falema’i, aemaise foma’i ma tausima’i, “E leai se isi e alu ese mai se galuega, e le tupu foi le mea lea ua folafola e le fono faafoe ma le pulega a le falemai, o a lava a latou folafolaga ua faia, o a foi tusi ua tuuina atu ia te outou, ia outou onosai pea ma galulue, ae o le a matou toe vaavaai i tulaga o totogi o tagata faigaluega o loo umia tulaga maualuluga i le falemai, ma saili nisi auala e foia ai lenei faafitauli”.

O le vaiaso na te’a nei na amata tufa ai i le silia ma le to’a 200 o tagata faigaluega a le falemai, tusi fa’ate’a mai i le komiti fa’afoe ma le pulega.

O lea fa’aiuga na taua e le alii kovana, o se fa’aiuga ua le talafeagai tele, ona o lea ua sauni le pulega a le falemai e fa’amalolo tagata faigaluega, ae o lo o fa’aauau pea ona fa’a faigaluega tagata e ova atu i le tai $100,000 totogi.

“E le taitai fetaui i lou mafaufau le mea lea o le faamalolo o tagata faigaluega ae sii i luga totogi, aumai tagata mai fafo ma ulugalii e tai $90,000 le totogi o le isi ae ova atu i le $100,000 le totogi o le tasi,” o le saunoaga lea a Togiola.

“Sa ou fautua faafia i le fono a le kapeneta a’o i ai ma le fono fa’afoe a le falemai, ina ia taofiofi manaoga ae fetufaai i auala e maua ai le fesoasoani tau tupe, ma ia fesoasoani mai i le malo, peitai o lea ua atagia mai, e leai ma se mea o fesoasoani mai i ai le falemai, ae na o le faa faigaluega o tagata e maualuluga totogi,” o le saunoaga lea a Togiola.

Na ta’utino Togiola e fa’apea, e le taitai ona taliaina le fuafuaga a le falemai lea ua fa’ailoa atu e pei o le fa’aitiitia o tagata faigaluega, aemaise le vaea o fomai ma tausi mai.

“O la’u fautuaga sa ave i le fono faafoe i le matou fonotaga i le aso ananafi (aso Faraile na te’a nei), vavae ese muamua le vaega pito i luga lea e maualuluga o latou totogi, aua tusa lava pe vaea i latou ia, e le afaina ai lava se soifua o le atunuu, ae o le taimi lava e vaea ai fomai ma teine tausi ma’i, ona afaina loa lea o le soifua o tagata,” o le isi lea saunoaga a le alii kovana.

Na fesiligia e se tagata faigaluega a le falemai le alii kovana, pe fa’amata la e taunu’u le fuafuaga a le falemai lea ua faia e vaea ai latou mai a latou galuega pe a o’o atu i le aso 19 Fepuari, na tali Togiola, e le mafai ona ia talanoa atu i le tulaga lea ona e le aia o ia i fa’ai’uga a le fono fa’afoe i le taimi nei, ae o lana folafolaga lea ua tu’uina atu i ai, afai e o’o atu i le Aso Lulu o tumau pea la latou fa’ai’uga e fa’amalolo ai tagata faigaluega e aofia ai ma teine fomai, o le a ia fa’amaloloina le fono fa’afoe a le falemai.

O le vaiaso na te’a nei na tuu atu ai e Togiola se pili i luma o le Fono e toe faafoi atu ai le faatautaiga o le falemai i lalo o le malo, ma o lea pili o loo galulue ai pea loia a le fono, e lei tuuina atu i luma o maota e lua.