Ua tu’uina atu nei e le afioga i le ali’i kovana ia Lolo Matalasi Moliga se lu’itau mo sui uma o lana kapeneta, e fuafua le toe fa’aauauina o a latou konekarate mo le isi lua tausaga o lo o totoe o lana nofoaiga, i se fa’aiuga la te faia ma Lemanu Peleti Mauga fuafua lea i luga o a latou galuega fa’atino.

I se tusi sa tu’uina atu e Lolo i lana kapeneta i le aso 8 Iuni 2014, o lo o ia fa’amanino ai vaega uma e ao i fa’atonusili a le malo ona tausisi i ai.

Na taua e Lolo i lana tusi e fa’apea, o le auga o aute o lo o autu i ai le fa’atinoina o galuega a le faigamalo o lo o i ai nei, “o le manatunatu lea i fafo atu o le li’o o le faigamalo” (thinking outside the box), atoa ai ma le lu’itau o lo o fetaia’i pea ma i latou i aso ta’itasi, o le ofoina atu lea o le mea sili e tautua ma auauna ai i tagata lautele, e tusa ai o taleni ua tu’uina mai e le Atua i ta’ita’i o le atunu’u.

Saunoa Lolo e fa’apea, o mafaufauga ia ma le mafua’aga na ala ai ona a’e se tofa ina ia tatala atu i tua mai le li’o o tagata sa lagolagoina lo la fa’amoemoe i tulaga fa’apolokiki, ni isi e avea ma sui o le la kapeneta ma Lemanu.

E le gata i lea, o se tasi lea o fa’anaunautaiga na alia’e i le faigamalo, ina ia fa’aaoga le tomai fa’ata’ita’i o lo o i ai i sui o le kapeneta ua tofia nei, latou te faia ai fa’aiuga mo le manuia o le tautua a le malo.

“O a outou konekarate uma e mafai ona fa’amuta i so o se taimi e tusa ai, ma ou te fa’ailoa atu ia te outou uma, o le a ma iloiloina tulaga uma e fa’atatau ia outou konekarate, i le fa’aiuga o le tausaga lona lua o la tatou faigamalo”, o se vaega lea o le tusi a Lolo.

Ina ia talafeagai ai ma le fuafuaga a le alii kovana ma le lutena kovana, ua fautuaina ai le kapeneta ina ia fa’aalu se taimi e fa’ailoa atu ai tulaga uma o galuega na mafai e a latou ofisa ona ausia, ae o a fo’i auala na mafai ona fa’amanuiaina ai le atunu’u mai tulaga maualuga na ausia e o latou ofisa taitasi.

“Ou te le mana’omia ituaiga ripoti ia e masani ona fautuaina outou ina ia tuuina mai i masina taitasi, ae ou te manaomia se ripoti e faia ma le fa’amaoni, e fa’ailoa mai ai tulaga o lau auaunaga, ma ia i ai ni mau fa’amaonia e lagolagoina ai ia tulaga uma”, o se vaega lea o le tusi a Lolo.

E le gata la i tulaga ua ausia e le faatonusili, ae ua talosagaina foi e le alii kovana le tatau lea ona faailoa atu e faatonu i lana ripoti, auala e mafai ai ona siitia le tautua ma le auaunaga a le matagaluega mo le isi lua tausaga o lo o totoe o le faigamalo.

Ua ia poloaina fo’i le kapeneta ina ia tuuina atu fa’atasi ma ia ripoti, ia ripoti o le kuata tolu ma le kuata fa o le tausaga tupe lenei 2014, ina ia fuafua ai fo’i a laua iloiloga ma le alii lutena kovana, i auaunaga sa mafai ona oo i ai le tautua a matagaluega taitasi.

O le aso 30 Setema 2014 e pei ona faatonuina e le alii kovana sui o lana kapeneta, e tatau ona tauaao atu ai ripoti uma nei i totonu o se teutusi e malu puipuia lelei, o le a ia teuina malu fo’i nei faamaumauga uma, fa’atoa tatala lava i le taimi la te fa’afesaga’i ai ma le fa’atonusili e ana le ripoti mo le iloiloina o tulaga uma o lo o i ai i totonu.

“O le fa’aauauina o lau konekarate, o le a fuafua lea i se fa’aiuga ma te faia ma le lutena kovana, fa’avae lea i luga o le tulaga sa i ai lau tautua atoa ai ma ripoti o le a tuuina mai”, o le saunoaga fa’ai’u lea a Lolo.

O lo o i ai pea i Honolulu le ali’i kovana i le taimi nei, mo le fa’aauauina o tulaga o ana talavai ma lana foma’i, i le tulaga o lo o i ai lona soifua maloloina, ma e le’i mautinoa pe o afea e toe taliu mai ai i le teritori, ae fuafua lava i talavai.