O le fa’aiuga o le tausaga nei lea ua fuafua e le malo e tatala ai se lala o le faletupe fou o le Charter Bank i Faleasao i Manu’a, e pei ona faamaonia e le Loia Sili ia Talauega Eleasalo Ale i se iloiloga sa faia i le maota o sui i le vaiaso nei.

O lea mataupu na fesiligia e le afioga i le ali’i faipule mai le itumalo o Manu’a #1 ia Vesi Talalelei Fautanu, i le taimi o le iloiloga a le komiti o le Tamaoaiga a le maota o sui, e fesiligia ai le tulafono e fa’avae le Ofisa na fa’afoeina galuega fa’a faletupe (OFI).

Saunoa Vesi e fa’apea, afai ua a’e se finagalo o le faigamalo e tatala se isi faletupe mo le atunu’u, e tatau fo’i la ona silasila mamao le faigamalo e fa’atula’i se isi lala o le faletupe fou lea mo Manu’a, aua i lona talitonuga, o se mea e lelei mo Tutuila e tatau fo’i ona lelei mo Manu’a.

“...o le mea moni o lo o fesouaina finagalo o le itumalo ma tu’u fesili mai, po o i ai se fuafuaga e tatala se isi faletupe fou i Manu’a”, o le saunoaga lea a Vesi.

Saunoa fo’i le ali’i faipule e fa’apea, ua ova ma le 10 tausaga e le i toe i ai se auaunaga fa’a faletupe i Manu’a, ma ua matua mana’omia lava e tagata Manu’a se faletupe i se taimi vave.

O lea saunoaga a Vesi na lagolagoina e lona soatau ia Fetu Fetui Jr, o ia fo’i lea o le sui fofoga fetalai o le maota o sui.

Saunoa Fetu e fa’apea, ua leva na tatau ona tatala se isi faletupe i Manu’a, ae mafua mai ona e le o i ai se faletupe e pulea e le malo, se’i vagana ai faletupe tumaoti sa i ai le latou tautua i Manu’a i tausaga ua mavae, peita’i ua le o toe i ai i le taimi nei.

“Ou te lagolagoina le finagalo o lo’u uso a faipule mai Manu’a, fa’apea ai ma se finagalo mai le afioga i le ali’i faipule mai Manu’a #1 ia Toeaina Faufano Autele, ua matua mana’omia lava e le itumalo o Manu’a se auaunaga fa’a faletupe e fesoasoani mo gaioiga a ona tagata”, o le saunoaga lea a Fetu.

Saunoa Talauega e fa’apea, o lo o i ai le fuafuaga a le Komiti Fa’afoe e fa’aaoga le nofoaga tuai o le Faletupe a Hawai’i i Tafuna e amata ai le tautua a le Charter Bank pe a tatala ia Iuni 2015, ona soso’o ai loa lea ma le tatalaina o le lala i Utulei, i le nofoaga o lo o i ai le isi lala a le faletupe o Hawai’i.

“A mae’a loa ona fa’amautu fuafuaga mo le tatalaina o le tautua a le Charter Bank i Tutuila nei, ona va’ava’ai loa lea mo le tatalaina o se lala i Manu’a i le fa’aiuga o le tausaga, ona ua i ai le manatu o le malo, ua faigata i faletupe tua ona toe tatala se isi a latou auaunaga i Manu’a”, o le saunoaga lea a Talauega na vaaia ai le fiafia o Vesi ma Fetu.

Saunoa atili le ali’i loia sili e fa’apea, sa i ai muamua le tautua a le faletupe o le ANZ Bank i Manu’a i ni tausaga ua mavae, peita’i o lea auaunaga sa toe fa’amuta ona o ni isi o fa’aletonu sa tula’i mai.

Na fesili Fetu i le loia sili pe aisea ua manatu ai le malo e tatala se lala o le Charter Bank i Manu’a, pe afai o lea ua mumusu faletupe tua ona e le tele se tupe fa’asili e maua mai ai, ae na toe saunoa le loia sili, “Ia mautinoa e le maota le tulaga lenei, e le galue le Charter Bank mo se tupe sili, ae o le agaga autu ia maua se auala e tautua ai i le atunu’u”.

Na fa’aopoopo atu le teutupe a le malo ia Ueligitone Tonumaipe’a i le saunoaga a le loia sili ma saunoa e fa’apea, e tatau fo’i ona tatala se lala o le faletupe i Aunu’u, ae fuafua lava i taumafaiga a le faletupe atoa ai ma se fautuaga mai le ali’i kovana.

Na fautua le afioga i le tama’ita’i faipule ia Vui Florence Vaili Saulo i molimau a le malo, ina ia taga’i toto’a i auala e fa’afoe ai le faletupe fou mo le atunu’u, ina ia manuia ma soloaga lelei fuafuaga uma.

E ui i le tele o finagalo fa’aalia e fa’atatau i le faletupe, o lea ua pasia e le Fono Faitulafono le pili e tu’u atu ai le malosi i le malo e fa’atula’i ai le faletupe fou mo le atunu’u.