Na sasa’a le fafao i le potu fono o le Ekalesia Katoliko i Fatuoaiga e tusa ai o manulauti atofa mo fofoga e to’afa sa tofia fa’apitoa mo le tapunia aloa’ia o le masina e fa’ataua ai e Amerika Samoa, galuega tima’i ma taumafaiga eseese e ao ina fa’aitiitia ma taofia ai le tele o sauaga o a’afia ai soifua o tina ma fanau i totonu  o latou aiga.

O le fofoga tofia muamua o le ali’i foma’i o le mafaufau Dr. Peni Biukoto mai le LBJ Medicat Center i Faga’alu. O ia sa ia toe fa’atepa le tagata, i le afuaga ona faigata ona ave’esea motu o sauaga mai totonu o aiga, “O le ita ma misa, e afua i totonu o mafutaga uma, aua e le tasi se loto o nisi e to’alua, ma ua mae’a i ai i natura o tagata ola uma, e tali tutusa ai ma meaola uma, e i ai lona naunauta’iga e fia tauva, tauivi ma ia manumalo.”

“O natura o tatou tagata Samoa o tagata tau, ma ua i ai fo’i lea i o tatou tupu’aga mai. Peita’i, e ui ona o le ita ma fete’ena’iga o lagona e i ai pea, e ao ina a’oa’oina i tatou, ia tatou tauivi, tauva ma fia manumalo i mea lelei, o mea e aoga mo tagata uma, ma atina’e ai o tatou tagata ta’ito’atasi ma fa’asolo atu ai i o tatou aiga.”

“O lona uiga, afai ae matauina se tasi e i ai pea lea tulaga, e le mafai ona ia pulea lona ita ma a’afia ai nisi, e ao ina matua lava le taimi e tapena ma toe talanoa vavalalata ai sui faufautua i lea sui.”

I lana toe tima’i, sa ia fa’ailoa ai, “O lou malamalama i le vaivaiga o le ita, ma le tapuia o lou tagata i auupega o fa’asoa eseese ina ia le fa’aalu ese atu ita e afaina ai se tasi, o se mea sili lea ona lelei mo mafutaga uma i totonu o le li’o o lou aiga.”

I le folasaga lona lua, sa vala’auina ai Robert Toelupe mai le Ofisa o le VA a le malo, lea e avea ai o ia ma se sui faufautua mo vetereni po’o fitafita tuai.

“E ao ina fa’agaogaoina le fafao ua tumu ma ua tauosooso i mea fita, o lo’o toe taliu mai ma le fitafita tuai, ina ia mafai ona toe fa’aofi atu i ai nisi mea fou e avea ma ni mea e fa’aitaita gofie ai fitafita nei,” o le saunoaga lea a Toelupe.

O lana lea vaifofo na ofo mai, o ia lea e talatalanoa, ma fa’amanatu i le vasega o fitafita tuai, “Ua mae’a le taua, sa avea ai outou ma taliupupuni muamua o le saogalemu o lou atunu’u ma lou aiga, ae o lea ua suia nei fa’afitauli o le a toe feagai ma oe, ua tatau la ona sasa’a uma ese lena ato ua tumu, ae se’i fa’aofi atu nai mea masani sa fetaui ma le tina ma fanau a’o to’esea oe.”

O nisi o ana fa’asoa sa fa’ailoa mai, e masani ona aoga tele i nai a tatou tama fanau ua taliu mai.

“Manatua, afai e tumu le ato, ae taumafai ona fa’aofi atu i ai nisi fa’afitauli, itiiti pe tetele, e o’o lava ina masa’a ma ua fa’aleaogaina, o le ata lea o lo’o fa’atino ai lea fo’i tautua mo i latou ua taliu mai nofoaga o vevesi, ma e tatau lava ona utagia lea suiga.”

Fofoga na soso’o ai o le tama’ita’i o Peseta Tia Seloti ma le fa’asoa mai o le aganu’u ma sauaga ua matauina i fanau ma tina i le malu o latou lotoifale. O iina sa tele ai se fia fa’alogo o le fola, aua o le to’atele o matua.

Peita’i, sa fa’afofogaina le fa’asoa e fa’apea, “Sa tonu lava le tasi tala mai le ulu o le aiga, ona aga’i mai lea i fanau ma ia fa’atino loa, i tausaga ua te’a a’o tatou talavou, peita’i, o nei aso, ua manatu fanau e fia fa’ailoa mai latou lagona, aua ua tima’ia i latou e le ala o le tulafono.”

“O se suiga, e ao ina tatou utagia, ma tatou fautuaina ai o latou taofi, ae ia fa’aleo mai lagona o le fanau, o se suiga fou lena i olaga o tatou aiga fa’alotoifale. E le o pulea mai e i latou i tatou, ae ia tatou fa’alogo i o latou omiga ma manatu, e aoga fo’i mo le fa’aiuga e tatou faia matua.”

Na fa’auma le aso i le folasaga a le tama’ita’i o Athena Mauga, lea sa avea ma sui o le SOFIA i lea fonotaga, ma sa ia toe fa’ailo ai le mau, “O i matou e tusa pe ese i matou i lo isi fanau, ae alofagia lava i matou e o matou matua, aiga ma le atunu’u. E leai ni omiga o matou o ola ai e pei fo’i ona matauina i nisi atunu’u i fafo, ma latou sauaga o lo’o feagai ma ituaiga tagata e pei o i matou. O SOFIA fo’i o lo’o a’otauina i matou e faia mea lelei mo matou aiga, le matou malo ma o tatou tagata lautele.”