O le aso lea ua fa’amoemoe e faia ai loa se fa’aiuga mautu a le afioga i le ali’i kovana ia Lolo Matalasi Moliga, pe a mae’a sa latou fonotaga ma le Komiti o Tuuga Fautasi, pe tatau ona tutu’u fua Fautasi ua lautogia mo le tuuga fautasi o lenei tausaga e aunoa ma le totogiina o le lesitala e $300.

I se feiloaiga a le Samoa News ma le afioga i le ali’i kovana i le taeao ananafi, na fa’amaonia mai ai e le ali’i kovana lea tulaga, ina ua fesiligia o ia i sona finagalo, pe o se tulaga talafeagai le tutu’u fua o Fautasi mo le tuuga o lenei tausaga e aunoa ma le totogiina o le lesitala e $300.

“O le matou fonotaga mulimuli ma le Komiti o le Fu’a e aofia ai ma le Komiti o Tu’uga Fautasi i le aso a taeao (taeao nei), o le a fa’amautu ai loa tulaga uma e fa’atatau i le lesitalaina o fautasi mo le tuuga o lenei tausaga, pe tutu’u fua fo’i”, o le saunoaga lea a le ali’i kovana.

Ae ina ua fa’ailoa i ai e le Samoa News, o lea ua mae’a ona fa’alauiloa e le Ta’ita’ifono o le Komiti o le Tuuga Fautasi ia Lualemaga E. Faoa, i le fonotaga mulimuli ma Kapeteni o Sa ua lautogia mo le tuuga, le ono mafai lea ona toe fa’afo’i atu a latou ta’i $300 ua mae’a ona totogi mo le lesitalaina o a latou Sa, pe afai ae finagalo le ali’i kovana e tutu’u fua fautasi e aunoa ma se lesitala, na soisoi le ali’i kovana ma fa’apea mai lana saunoaga, “Tago la e fa’alauiloa i le atunu’u, o lea ua folafola e Lualemaga e tutu’u fua fautasi e aunoa ma se lesitala e $300”.

Saunoa le ali’i kovana e fa’apea, o le latou fonotaga mulimuli i le taeao nei ma le komiti o le fu’a, e fa’amautu ai loa tulaga uma i fa’ailoga mo vaega eseese o le sisiga fu’a, e aofia ai fa’ailoga o pese ma siva fa’aleaganu’u, fa’ailoga o tuuga fautasi, atoa ai ma isi lava fa’ailoga tupe e masani ona tufatufa atu e le malo i aso o le sisiga fu’a.

O se tasi lea o mataupu na tele i ai finagalo faaalia a ni isi o kapeteni o fautasi ua lautogia mo le tuuga o lenei tausaga, o le tutu’u fua lea o Sa e aunoa ma se lesitala e mana’omia.

Na mafua lea manatu ona sa taua e ni isi o kapeteni e fa’apea, e le talafeagai i fautasi le totogi o le lesitala e $300 ina ia mafai ai ona tutu’u ma manumalo i se fa’ailoga tupe, ae o pisa ma siva fa’aleaganu’u, e leai se tupe e lesitala ai, ae fai lava si tetele o fa’ailoga tupe o lo o fo’i ma i latou i le fa’aiuga o le fu’a.

Na fa’ailoa e le kapeteni o le Fuao mai Vatia, le afioga i le Tama’ita’i o le Ao ia Gaoteote Palaie Tofau i le fonotaga lea e fa’apea, o le tulaga sa’o lava e tatau ona i ai, e le tatau ona toe lesitalaina fautasi mo le tuuga, ae ua tatau ona tutu’u fua uma fautasi, ina ia tutusa ma ausiva ma pese fa’aleaganu’u.

LIKI LAKPI O LE FU’A

Ae ina ua fesiligia po o i ai se fuafuaga a le malo e tu’uina atu se fesoasoani tupe i le Iuni Lakapi a Amerika Samoa (ASRU), mo le fa’atautaiga o le ta’amilosaga lakapi ta’ito’a 7 o le fu’a mo lenei tausaga, na saunoa ai le ali’i kovana e fa’apea, e le o i ai se fuafuaga e tu’uina atu se tupe mo le ASRU ona o le ta’amilosaga Lakapi o le fu’a, pau le gaioiga a le malo e fai, o le fa’avanoa lea o le malae taalo i Tafuna e fa’ataunu’u ai le ta’amilosaga lakapi.

“O tulaga i le ta’amilosaga lakapi, o lo o i ai lava kamupani o lo o lagolagoina le ASRU mo le fa’atautaiga o lea faamoemoe, e o o fo’i i tupe o lo o ao e le ASRU mai le fa’aaogaina o le Stadium i Tafuna, o lo o ave uma lava e le ASRU, pau la le sao o le malo e tu’u atu i ai, o le fa’aaoga fua lea o le malae”, o le saunoaga lea a le ali’i kovana.

O le ta’amilosaga lakapi ta’ito’a 7 o le fu’a i lenei tausaga, ua fa’alauiloa ai e le ASRU le fa’ailoga tupe mo le manumalo i le Ipu autu e $12,000, atoa ai ma le toe valaauliaina o au mai Samoa e auai mai i le ta’amilosaga.

Saunoa le Ta’ita’ifono o le ASRU, le afioga i le Matua ia Togiola T. A Tulafono, ua mae’a ona tu’uina tusi valaaulia mo kalapu lakapi mai Samoa e auai mai ai i le ta’amilosaga o lenei tausaga, ma o lo o fa’atali i se tali e tu’uina mai, ae o lo o faia fo’i feso’otaiga mo ni isi kalapu mai fafo e ese mai ia Samoa.

Ae mo kalapu lakapi i le atunu’u, ua vaaia le vevela o tapenaga a le tele o kalapu i le atunu’u, mo le fa’amautuina o a latou tapenaga mo le ta’amilosaga o le fu’a i lenei tausaga, lea ua fa’amoemoe e faatautaia e le ASRU, i le mae’a ai lea o tausaga soso’o e tolu ua tuana’i atu, o faatautaia e le Kalapu a Tama Tuai a Malisi.