Ads by Google Ads by Google

Fetufa’aiga Kovana ma le atunu’u i luga o le ea

AMATA FAUSIAINA NISI O ALALAUPAPA I LE ATUNU’U

O le masina lenei ua faalauiloa mai e le alii kovana o le a amata ai nisi o galuega mo alalaupapa ua leva ona faataoto mo nisi o afioaga i le atunuu, e pei o

O galuega na faamaonia e le alii kovana le sauni e amataina i le masina nei e aofia ai le auala laupapa i Leone, Nuuuli, faapea ai galuega mo Aunu’u.

O le vaiaso na tea nei na faapaiaina ai le galuega tele i Ta’u, Manu’a, lea e tusa ma le $8 miliona le tau aofai o le galuega mo le fausiaina o le auala i totonu o Ta’u.

O le afioga i le Lutena Kovana na fai ma sui o le malo e malaga atu i ai mo le faapaiaina o lenei galuega, lea foi sa molimauina e taitai o le itumalo o Manu’a.

Saunoa Togiola Tulafono, o galuega ia ua fuafua e amataina i le masina nei, na mafua ona faatuai ona o nisi o vaega taua sa manaomia e pei o ata ma vaega tupe e faatino ai lea faamoemoe, peitai o lea ua avanoa mai vaega uma ia, ma ua faamoemoe loa o le a amataina nei galuega.

E le o toe  umi se taimi ae faamaeaina foi se tasi o galuega tele i le afioaga o Malaeloa, mo le fausiaina lea o alavai e tatai i ai le vai pe a malosi tafega i totonu o le afioaga.

O isi galuega o loo faaauau pea ona saili tupe i ai le malo mo le faamaeaina o auala i soo se vaega o le atunuu, e aofia ai ma le auala i Vaitogi lea ua tele i ai faasea ona o le tulaga leaga ua i ai le auala.

Saunoa Togiola, e le o faagalo e le malo ia galuega, ae ona o le leai lava o se vaega tupe e faatino ai, ae o le fuafuaga o loo i ai, o le taimi lava e maua ai vaega tupe ma faaauau galuega mo le faaleleia o auala i soo se vaega o le atunuu.

AVEA LAFOGA TOE FA’AFO’I O SE VAILAAU AOGA MO TAGATA

O le faaauau ai pea o le toe faafoi atu o lafoga i le mamalu o le atunuu i vaiaso taitasi, o se tasi lea o vailaau aoga na taua e le alii kovana, o loo maua ai e le atunuu le loto fiafia, ma faagaeetia ai le aufai pisinisi i le vaai atu o loo agai atu tagata ma tatala atu a latou ato tupe, mo le faia lea o faatau mai faleoloa, ma fesoasoani malosi ai i le faatuputeleina o le lelei o le tamaoaiga o le atunuu i le taimi nei.

O le aso Tofi na tea nei na tufatufaina atu ai foi siaki mo i latou sa faila a latou lafoga, talu mai le aso 25 e oo atu i le aso 31 Ianuari.

E tusa ma le $1.3 miliona le tupe na mafai ona toe faafoi atu i le atunuu i tulaga o lafoga i le vaiaso na tea nei, ma o lea vaega tupe e aofia ai le $449,000 na maua i lafoga toe faafoi, ma le $849,491 na maua mai i lafoga a fanau (child tax).

O le taimi nei la, o i latou uma lava sa faila a latou lafoga amata mai i le aso 1 - 31 o Ianuari, ua maea ona toe faafoi uma atu a latou lafoga, ae o lea ua sauni atu mo le masina o Fepuari.

SOLOGA LELEI GALUEGA I GUAM

O loo sologa lelei le polokalame o aoaoga ia na malaga atu ai le silia i le toa 30 alii ma tamaitai i le teritori o Guam, e pei ona faamaonia mai e le alii kovana i luga  o lana polokalame i le faaiuga o le vaiaso na tea nei.

Saunoa Togiola Tulafono e faapea, e leai se faafitauli o feagai ma le au malaga lea na malaga atu i le masina na tea nei, sei vagana ai lava se vaega e  toalua o loo aafia i le gasegase o le manatu (home sick), peitai o loo galulue le aufaigaluega ma aiga o i laua nei ina ia faamalosia i laua nei e faamalolosi i le galuega.

O popolega o le alii kovana e pei ona ia taua i lenei polokalame, afai ae alu alu tulaga o aoaoga ae faavaivai se tasi o ia latou ia ua malaga atu, o lona uiga o le a toe faafoi mai i le atunuu e aunoa ma se avanoa e mafai ai ona toe faatumu le avanoa lea.

O lona uiga, o le a maimau le avanoa ae o le a tumau pea le tupe e totogi atu e le malo mo le malo o Guam ona o aoaoga o loo faagasolo ai i le taimi nei.

“O le fautuaga i aiga o i latou o loo malaga, faamalosi i a i latou i taimi e valaau mai ai i le telefoni, ina ia faamaea aoaoga ma galuega na mafua ai ona malaga ese atu, ina ia tau ai se ‘ai o le malo atoa ai ma aiga,” o le saunoaga lea a le alii kovana.