Ads by Google Ads by Google

Fesoasoani aganu’u fa’amama fa’asalaga a se ali’i talavou

O ifoga e lua na faia e le aiga a le ali’i o Matulino Tauali’i i le aiga o le ali’i ua maliu, o se tasi lea o itu na fesoasoani tele i ali’i fa’amasino i le taeao ananafi, ma mafua ai loa ona mama lana fa’asalaga sa tu’uina atu e le ali’i fa’amasino ia John L. Ward II ma lona sui lagolago ia Fa’amausili Pomele.

 

O Tauali’i na ta’usala i le moliaga mamafa o le fasioti tagata i le tulaga lua, o se solitulafono o le vaega A i le fa’atulagaina o solitulafono mamafa, lea e mafai ona fa’asala ai o ia i le toese mo le olaga atoa, po o le isi fa’asalaga fa’a falepuipui, e le itiiti ofi i le 10 tausaga a le silia ma le 30 tausaga.

 

“Ae talu ai o ifoga e lua sa faia e lou aiga lea fo’i ua fa’amaonia e le tina o le ali’i ua maliu, ua manatu ai le fa’amasinoga e fa’aitiitia le mamafa o se fa’asalaga e fa’asala ai oe, mai le Vaega A i le Vaega B o solitulafono mamafa, lea e mafai ona faasala ai oe i le toese mo le umi e le itiiti ifo i le 5 tausaga ae le silia i le 15 tausaga, e pei ona taua i le Ulatala 46.1910 o le Tulafono Toe Teuteu a Amerika Samoa”, o se vaega lea o le saunoaga a Ward II, ma ia faasala ai loa Taualii i le fa’asalaga fa’

 

Na malaga mamao mai lava i Satupa’itea i Savaii le tuaa o le ali’i talavou ua molia, e tapuaia le aso e lau ai le fa’amasinoga a si ona atali’i, atoa ai ma le fa’aleoina o sana talosaga i le fa’amasinoga e uiga i lona atalii.

 

Na taua e le tama le faateia o ia ma le aiga atoa i le mea na tupu, ona e leai se isi na mafaufau e tula’i mai se fa’alavelave fa’apenei ia Tauali’i, ui o lea, ua latou talia lona aumau ai i le toese, atoa ai ma se faasalaga e tuuina atu e le faamasinoga, pau lana talosaga, ia alofagia e le faamasinoga se faasalaga mama.

 

Sa ia faailoa fo’i ifoga e lua sa fa’atinoina e lona aiga mo le aiga o le alii ua maliu, e tasi sa faia i Satupa’itea i Savaii, ma le isi tasi sa faia i matua o le ali’i ua maliu i Nu’uuli tai, ma sa talia uma fo’i ifoga ia e lua.

 

Na taua e le tina o le ali’i ua maliu i lana molimau e fa’apea, e ui i ni lagona mafatia sa ia te ia ona o le motusia o le mafutaga ma si ana tama, peita’i o le taimi lava na ia vaai ai i foliga o le alii na fasiotia lana tama, na toe suia uma ai ona lagona mafatia, ae pei lava ua toe fafagu mai i lona loto foliga o lana tama.

 

Na augani le tina i le fa’amasinoga mo se fa’asalaga mama mo Tauali’i, ua uma fo’i ona ia fa’amagalo ia te ia, ma ua ia fa’amanuia fo’i i le lumana’i o lona olaga.

 

Na fesili le ali’i fa’amasino ia Fa’amausili i le tina pe sa ia talia ifoga e lua sa faia e le aiga a Tauali’i, ae na tali le tina, “ua ou talia ifoga sa faia, ona o a’u o se tina kerisiano e malamalama i le Atua ma lana Tusi Paia”.

 

Na tau le mafai ona fa’aleo e Taualii lana fa’atoesega i luma o le fa’amasinoga, i le maligi o ona loimata, ao ia fa’aleo lona lagona salamo e tusa ai o le mea sa tupu. E le gata sa ia fa’atoese i le fa’amasinoga ma le malo a Amerika, ae sa ia fa’atoese foi i le aiga o le alii ua maliu ma ona matua, aemaise ai ona matua ma lona aiga atoa, ina ia fa’amagalo o ia.

 

O fa’amatalaga sa tuuina atu i le fa’amasinoga, o Tauali’i ma le ali’i ua maliu e nu’u fa’atasi i Satupa’itea i Savai’i.