Ua toe taoto atu fo’i i le Komiti o le Paketi a le maota o sui le pili e sii ai totogi a le kovana ma le lutena kovana, ina ua toe fesiligia fo’i e ni isi o faipule suiga na fa’aulu e le komiti ananafi e aunoa ma le toe faia i ai o se isi talanoaga a le komiti.

Sa molimauina e le Samoa News le tuu fesili o ni isi o faipule i isi faipule, i le taimi na faia ai se malologa puupuu a le maota mai lana tauaofiaga ae se’i fa’atali suiga a le komiti, pe aisea ua fa’afuaseia ai ona ripoti le pili i luma o le maota mo lona faitauga fa’alua, ae le i toe talanoaina lava e le komiti le mataupu e fa’atatau i suiga o le tulafono lenei.

O le afioga i le alii faipule ia Fatulegae’e Palepoi Mauga na fa’auluina le ripoti i le taimi o le tauaofiaga a le maota, ina ia ripoti mai loa le pili mo lona faitauina fa’alua ina ia pasia, ae ina ua fautuaina le afioga a Fatulegae’e e le sui fofoga fetalai ia Talia Fa’afetai Iaulualo, o lo o i ai suiga a le komiti e mana’omia le pasia muamua, sa toe tula’i le ali’i faipule ma ia fa’atu le mau e pasia ai suiga, e aunoa ma lona fa’ailoa i luma o le maota po o a suiga.

O suiga e pei ona taua sa tuuina atu i luma o le maota, e na o suiga i pasene o faamanuiaga e maua e le kovana ma lona faletua i le taimi la te le toe nofoia ai le nofoa, ae leai se suiga i le aofa’i o le siitaga i totogi.

Mo se fa’ataitaiga, ia sui mai i le 60% i le 50% o alauni e maua e le sa avea ma kovana, ae suia mai le 30% i le 25% e maua e le sa avea ma faletua o le kovana.

A o tau faamanino suiga i luma o le maota, na tula’i le afioga i le ali’i faipule ia Larry Sanitoa ma ia fesiligia le mataupu lava fo’i lea e tasi sa fesiligia e le afioga i le ali’i faipule ia Taoasi Archie Soliai i le taimi fo’i na tu’uina mai le tulafono lenei e faitau lua i luma o le maota o sui i le tolu vaiaso talu ai, ina nei avea le suiga lenei ma itu e a’afia atu ai ma i latou sa avea ma kovana po o i latou sa avea ma faletua o kovana, pe afai o le a faaitiitia le aofa’i o pasene (%) e maua i le taimi e tula’i ese ai ma le nofoa.

Saunoa Sanitoa e fa’apea, afai o le suiga lea a le komiti o lo o naunau i ai, o le mea moni e tele le aafiaga o i latou sa avea muamua ma kovana po o lona faletua fo’i pe a pasia le tulafono lenei.

E mafua lea tulaga e pei ona faamanino e Sanitoa i le Samoa News, o le tulafono o lo o i ai nei, o lo o talosagaina ai le sii o le totogi o le kovana ma le lutena kovana, mai le $85,000 ma le $75,000 i le $125,000 ma le $100,000.

Afai la e faaitiitia pasene (%) e maua e le kovana ma le lutena kovana ae ua sii la totogi, e tele lava le tupe e maua e le kovana ma lona faletua pe afai e le toe avea i laua ma ta’ita’i o le atunu’u, aua o lo o maualuga lo la totogi lea ua maua nei, ae mo kovana sa nofoia le nofoa i tausaga ua mavae ma o latou faletua, o le a tele le afaina o i latou i le tulafono lenei, ona o le a totogi pea a latou alauni i le totogi tuai o lo o i ai nei.

O le fautuaga sa tuuina atu e Taotasi i luma o le maota lea fo’i na toe faamanatu e Sanitoa ananafi, ia fai se suiga i le tulafono, e aua ai nei aofia i latou sa avea ma kovana ma lo latou faletua i le suiga o pasene o le tulafono, ae ua lava le kovana o le taimi nei ma le lumana’i e a’afia ai.

Na taua e le taitaifono o le Komiti o le Paketi ia Timusa Tini Lam Yuen ina ua fesiligia e le Samoa News i le vaiaso na te’a nei e tusa ai o le pili tupe lenei, e talitonu o ia ua tatau ona sii totogi o ta’ita’i o le atunu’u aemaise ai o le faatulaga ai loa ma se isi aiaiga o le tulafono, ina ia faamuta loa ona toe i ai se isi tagata faigaluega i totonu o le malo poo vaega tumaoti e sili atu lo latou totogi i le totogi o le kovana ma le lutena kovana.