E le gata ua fesiligia e le afioga i le ali’i faipule ia Taotasi Archie Soliai suiga ua faia e le Komiti Fa’afoe o le Falema’i o le LBJ, ae ua ia talosagaina fo’i le ta’ita’ifono o le Komiti o le Soifua Maloloina a le maota o sui, mo se iloiloga se’i fesiligia ai le Komiti Fa’afoe e tusa ai o lenei mataupu.

O suiga e pei ona saunoa i ai le alii faipule mai Ituau, e aofia ai le fa’aitiitia i le ta’i $5 le tupe e totogi e vaai ai le foma’i, fa’apea ai ma le fa’aopoopo o alauni a sui o le Komiti Fa’afoe.

Na fa’afetaia e Taotasi le vaai mamao a le Komiti Fa’afoe ma le naunau e fai ni mea lelei mo le atunu’u, e pei fo’i ona naunau i ai le to’atele o ta’ita’i o le atunu’u, peita’i o popolega e pei ona ia taua, o lea fa’atoa mae’a ona iloilo e le Fono le paketi a le malo mo le tausaga tupe fou 2015 ma ua fa’afofoga i manaoga tau tupe, aemaise ai fo’i o lea ua latalata mai le taimi e amata ai le paketi o le tausaga tupe fou, ina ne’i avea nei suiga ma itu e a’afia ai tulaga o tupe maua a le falema’i.

“E leai lava se isi e le naunau e fai ni mea lelei mo le atunuu, ae o popolega o lo’u sui faiopule, o le a se a’afiaga o le itu tau tupe a le falema’i i le suiga lea ua fa’alauiloa e le Komiti Fa’afoe”, o le saunoaga lea a Taotasi.

“E moni o lo o manaomia e le atunu’u se fa’amama avega mo pili a le falema’i, ae tatau fo’i ona tatou vaai toto’a i tulaga o tupe maua a le falema’i”, o le isi lea saunoaga a Taotasi.

I le tulaga o tupe fa’aopoopo mo alauni a sui o le Komiti Fa’afoe, o le isi lea mataupu na fesiligia e Taotasi, ona ua maua i ripoti le tupu o lea tulaga, ae i lalo o le tulafono, o lo o manino ai le maualuga o tupe e tatau ona agava’a i ai totino o le Komiti.

Na fa’ai’u le saunoaga a Taotasi i lona talosagaina o le Fofoga Fetalai ma le Komiti o le Soifua Maloloina a le maota, ina ia faia se iloiloga ma le Komiti Fa’afoe a le LBJ, ae se’i fesiligia i mataupu e pei ona laga.

Na fa’amoni Savali Talavou Ale i le taua o le saunoaga a le ali’i faipule, ma ia fa’aluaina ai le fautuaga aga’i i le Ta’ita’ifono o le Komiti, mo se iloiloga e faia i lenei mataupu, peita’i i lona finagalo e pei ona ia saunoa, atonu fo’i o lea ua lata ina mae’a le Tausaga Tupe tuai lenei 2014, ai fo’i ua tele se tupe maua a le falema’i, ma manatu ai loa le Komiti Fa’afoe e ave lenei fa’amama avega mo le atunu’u.

O le mataupu lava fo’i lea na saunoa i ai le afioga i le alii senatoa ia Laolagi Fonoti Savali Vaeao i luma o le maota maualuga i le vaiaso nei, ina ua ia fa’alogo ua sauni le falema’i e fa’aitiitia totogi o lana tautua i le $5, atoa ai ma le fa’aopoopo e le Komiti Fa’afoe o a latou alauni i le ta’i $1,000.

Na fautuaina e Laolagi le maota maualuga ina ia silasila toto’a i fa’aiuga a le Komiti Fa’afoe po o talafeagai ma le tulafono.