O le tina mai Aua lea na tu’uaia i lona gaoia o le silia i le $10,000 mai se kamupani fai pepa malaga, ua poloaina e le fa’amasinoga maualuga ina ia taofia o ia i le toese i Tafuna mo le umi e 28 masina.

O Maria Sailele-Tuilagi po o Tau Soliai fo’i e pei ona taua e le ali’i fa’amasino sili lagolago ia Lyle L. Richmond, sa alu ma faailoa i le kamupani fai pepa malaga o le J&J World Travel, o ia e faigaluega i le Matagaluega o Aoga, ma o lo o ia manaomia ni ticket se 6 e malaga ai ni tagata i fafo.

Na faaaoga e le ua molia le telefoni numera 731-3005 e faafesootai ai le kamupani fai pepa malaga, ma ia talosagaina ai ticket malaga se tolu mo le fa’ai’u ‘Salanoa’, mo le malaga i Amerika ma toe fo’i mai.

O le aso lava fo’i lea na fax ai e le ua molia se pepa faamaonia mai le Ofisa o Aoga aga’i i le kamupani fai pepa malaga, e faamaonia ai ticket e tolu o lo o manaomia mo le ofisa o aoga.

O le po o le aso 7 Iulai 2011 na malaga ai tagata e faai’u ia Salanoa mo Amerika, i ticket na maua mai i le kamupani fai pepa malaga.

I le aso 11 Iulai 2011, na toe faafesootai ai e le ua molia le kamupani fai pepa malaga, ma faailoa i ai o ia e faigaluega i le Matagaluega, ma o lo o manaomia se ticket mo lana tama teine e malaga ai i Amerika, ma sa malaga fo’i lana tama.

Ina ua taumafai le pule o le kamupani vaalele e faafesootai le Matagaluega ma fesili mo Sailele-Tuilagi, sa faailoa i ai e le matagaluega e leai se tagata faigaluega faapena i lea ofisa o le malo ma o le mafuaaga lea na tuuina atu ai loa e le pule o le kamupani lenei mataupu i le ofisa o leoleo.

E tasi le moliaga mamafa o le gaoi na tuuaia ai e le malo ia Sailele-Tuilagi, o le moliaga lava fo’i lea na ia tali ioe ai i le masina o Fepuari 2014, ina ua latou sainia se maliliega ma le malo ma talia fo’i e le fa’amasinoga.

O se tasi o vaega o lea maliliega e pei fofoga i ai le fa’amasinoga, o le malilie lea o loia ia aua nei i ai se faasalaga faa falepuipui e tuuina atu ia Sailele-Tuilagi, a ia poloaina o ia e le faamasinoga na te toe totogi le tupe atoa sa ia ave faagaoi.

E fa’atolu ona tolopo le lauina o le faasalaga a le ua molia i luma o le faamasinoga maualuga talu mai le masina na te’a nei, ona o ni isi o faamaumauga sa fia malamalama atili i ai alii faamasino, faapea ai ma le taimi na aafia ai le ua molia ma lana loia fautua ia Michael White i le fa’ama’i mata lea na pipisi i le atunuu i ni nai vaiaso e le i mamao atu.

Na faatoese le ua molia e tusa ai o lana solitulafono, ma ia talosagaina ai alii faamasino mo se isi avanoa mo ia. Na taua e le ua molia e faapea, ua ia lagona lona salamo e tusa ai o le solitulafono, ma ua ia aoaoina fo’i se lesona aoga mo ia i le taimi na taofia ai o ia i le falepuipui.

Na umi se taimi o iloilo e ali’i fa’amasino se ituaiga fa’asalaga talafeagai mo le ua molia, ae ina ua fofogaina le fa’asalaga a le fa’amasinoga, na saunoa ai le ali’i faamasino ia Richmond e faapea, sa faigata i le faamasinoga ona talia faafinauga a loia e aua nei tuuina atu se faasalaga faa falepuipui mo le ua molia, ona ua silafia e le faamasinoga le matuia tele o le solitulafono sa faia e Sailele-Tuilagi.

E 5 tausaga na manatu le faamasinoga e taofia moi ai le ua molia i le toese, peitai o le a faamalumalu lona tuliina o lea faasalaga faa falepuipui, ae o le a nofovaavaaia o ia mo le 5 tausaga i lalo o poloaiga a le faamasinoga.

O ni isi o ia poloaiga e aofia ai lona tuliina o le umi e 28 masina i le toese, o le a mafai fo’i ona talia e le fa’amasinoga se talosaga e faaulu e lana loia e tatala ai o ia i tua e faigaluega, ao tuli ai lona faasalaga.

Ua poloaina foi o ia na te totogiina le salatupe e $1,000 i le fa’amasinoga, atoa ai ma lona toe totogiina o le tupe sa ia gaoia mai le kamupani fai pepa malaga i le aofa’i e $12,368.

Saunoa Richmond, talu ai o le to’alua o le tama’ita’i ua molia, o se tasi o tagata faigaluega a le malo ua tele tausaga o faigaluega i le Matagaluega o Aoga, sa tatau ai i le ua molia ona vaavaai toto’a i lea tulaga i le taimi na ia faatinoina ai le solitulafono.

Ae i le toe totogiina o le tupe i le kamupani fai pepa malaga, na tuuina mai ai e le alii faamasino se fautuaga e ono vaavaai i ai le tama o le aiga mo le totogiina o le tupe, i le faia lea o se nonogatupe e totogi atoa ai lenei tupe, ma afai ae mafai ona toe totogi le tupe lea i totonu o le 2 tausaga, o le a iloilo e le faamasinoga pe tatau ona tatala o ia i tua mai le toese.

O le itula e 4:00 i le afiafi o le aso Gafua na te’a nei na poloaina ai loa e le faamasinoga ia Sailele-Tuilagi e tatau ona oo atu ai i le toese i Tafuna mo le amata tuliina o lana fa’asalaga.